غادة كريم
عزيزتي المحجبة .. اقلعي
بقلم : غادة كريم
عايزة افضفض بكام حاجة محشورين في زوري، والكلام موجه للمحجبات اللي بتفكرتقلع الحجاب، لا هو للي خلعته ولا اللي مش لابساه، الهدف شاكوش علي دماغ الشيطان اللي بيزن في ودن المحجبة كل يوم مع الفتنة حواليها.. اقلعيه
خليني اجاوب علي كام سؤال ..
- الحجاب بيحرر في الصيف
من نفس المنطق السطحى بيدفي في الشتا
- في ناس بتقول مش فرض
وناس أكترمتخصصة في الدين - وليسوا مجرد صحفيين- فسروا الآيات والاحاديث وقالوا أنه فرض.
- مش حتة قماشة اللي هتدخلني الجنة
لكن نيتك واقتناعك أنك بترضى ربنا هترفع أجرك درجات، ليه بتقفلى باب مفتوح بينك وبين اللى خلقك !
- فلانة قلعته ومبسوطة
ما يمكن مش مبسوطة ونفسيا مكتئبة وحياتها بايظة وبتغطى بالدوشة، الناس مش بالصورعلى الفيسبوك.
- جوزي مش بيحبه .. ممكن يخوني ؟
اوعى تلبسيه عشان جوزك ولا تقلعيه عشان مش بيحبه، جوزك كده كده عينه زايغة يامدام !! .. دي اخلاق ملهاش دعوة بالطرحة، مابيشوفك من غيرها في البيت ولا لازم يفرج الناس عليكي !
- شكلي هيبقي أصغرمن غيره
الناس شكلها أبسط وملائكية اكتربيه، الجمال احساس أنتى اللى بتنقليه للاخرين ملوش علاقة بعدد قطع الهدوم اللى عليكى.
- مش عارفة البس علي الموضة
تابعي التصميمات العالمية اللى بكم طويل والطرحة ممكن يبقي لونها مبهج ولفة حلوة تخلى شكلك أجمل، فى حسابات كتيرعلى الانستجرام بتقدم للمحجبات ازاى يبقى شكلها أكثراناقة.
- أنا تخينة .. أنا مطلقة .. أنا عايزة اتجوز .. أنا مخنوقة منه
كل مشاكل الانسان النفسية حلها مش أنه يسقط الفرض، الجواز نصيب والتخن حله أنك تخسي، والملل هتبقي بشعرك أيضا مش راضية عن نفسك.
- عايزة اشتغل ومش نافع بالحجاب
الشغل رزق مش متعلق بالشكل ويمكن الحجاب يفتحلك باب جديد أويقفل فى وشك باب شر.
- عمروخالد هو اللي حجب البنات وبعد الاخوان قلعوا وأيام عبد الناصرمفيش حجاب
طب وأيام الرسول والناس اللي عايشة خارج مصراللي ملهاش علاقة بالاخوان، وهل هنبطل نصلي عشان السياسة سرحت علي الدين، هتقفي قدام الكعبة في يوم تقولي لربنا الداعية الفلانى وحش أنا هصلي هنا بشعري، اتفرجى على الناس اللى بتطوف حوالين الكعبة من كل الجنسيات وهتعرفى الاجابة فين.
- أنا ايماني مش قوي وبلبس ضيق وحاسة أني منافقة
الحجاب درجات، خدي خطوات تبقي أحسن مش ترجعي لورا، وادعى ربنا دايما يهدينا أكترلأن محدش بيوصل لاخرالطريق فجأة، لكن الناس بتموت فجأة.
- في بنات محجبة بتشيش وسلوكها في الشارع زفت والمحجبات مش قدوة
التعميم مرفوض لأن الغلط مش علي الحجاب نفسه لكن في سلوك البنت، يعني لوشخص سايق مرسيدس وعمل حادثة يبقي العيب في السواق ولا العربية .. خليكي أنتي قدوة كويسة.
- أنا لما اقلعه هبقي اكيد بشعري أحلي
هتجيلك لحظة هتتشلي لما تعدي جنب محجبة حلوة وهتندمي.
- ربنا رب قلوب
صح ونبطل صوم وصلاة كمان !!
- الطرحة بتتنكش مني
اعرفي ليه واجتهدي، فى أيام كتير شعرك مش فى أحسن حالاته، وبتقفى قدام المراية ساعة تظبطى شعرك، اقفى نصهم ظبطى الطرحة.
- نص اصحابي قلعوا الحجاب
صلى على النبى .. وأنتي مالك هيدفنوا ويتحاسبوا معاكي ؟!
جوجل نيوز
