عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي
حوار مع صانع القرار

حوار مع صانع القرار

بقلم : طارق العكاري

إنه في يوم 25/1/2015، إجتمع كلاً من:



السيد/ صانع القرار

السيد / صانع قرار الأمن

السيد / صانع قرار المالية

السيد / صانع قرار التنمية الإدارية

السيد / صانع قرار الصناعة

لمناقشة الموضوع الآتي لإتخاذ القرار المناسب.

إحالة 50% من الجهاز الإداري (3.5 مليون موظف) إلى التقاعد مع استمرارهم في صرف رواتبهم وعلاوتهم حتى سن المعاش، واستحقاقهم مكافأت نهاية الخدمة عند الوصول للسن القانوني للمعاش لتصبح النسبه الخدميه الحكومية بواقع موظف لكل 25 مواطن بدلاً من موظف لكل 12 مواطن حالياً.

صانع قرار التنمية الإدارية: بكده يافندم نقدر نطور المنظومة ونميكنها ويبقى فيها سوفت ويرز ونحسن الخدمة كتير عن دلوقتى ونقيّم أداء الموظفين بشكل دوري مرتبط بحوافز علي الإنتاجيه وجودة الخدمه.

صانع قرار الأمن: والناس اللى هتمشي دي هتروح فين؟

صانع قرار التنمية الإدارية: هنديهم حق يشتغلوا في أي مكان تاني بتأمينات مزدوجه، مع الوضع في الاعتبار إنهم هيستمروا في صرف كل مستحقاتهم وده هيخفف المصروف الغير مباشر واللي هيرفض ساعتها حيبقي منتفع من الوظيفة ومش بيعيش بمرتبه بس.

صانع قرار المالية: المقترح يافندم يتضمن الحد من استهلاك الوقود المُستهلك في المواصلات العامه وهيبقي في مواصلات موحدة للوزارات والهيئات لأننا هنوكل لوزاره النقل مسئوليه نقل الجهاز الاداري والمركزي عن طريق عمل خطوط موحدة وثابتة أو إعطاء بدل مواصلات نقدي وبكده نستغني عن كل الورش والجراجات وادارات النقل في كل الوزارات والهيئات.

صانع قرار الصناعة: المقترح  يافندم يتضمن مشروع لإعاد تأهيل وتوظيف الناس اللي خرجت في أعمال حرة و صناعات صغيره.

صانع القرار: أنا شايف إن في إجماع على القرار ده مش جزر منعزلة زي كل مرة.

صانع قرار الأمن: أنا متحفظ يافندم. كده الناس هتنزل الشارع ولو 1000 واحد نزلوا هيتركبوا من الجماعات ومن اللي في نفسهم البلد تقع لمجرد إنهم مش بيحكموا. واحنا ما صدقنا البلد تستقر.

صانع القرار: مردود الكلام ده على الميزانية نحس بيه امتي  ؟

صانع قرار التنمية الإدارية: يافندم بيع الأصول ودمج الهيئات والوزارات وتوحيد خطوط النقل وتوفير وقود المواصلات العامة هيوصلنا في الثلاث سنوات الأولى لحوالي 40% من الإنفاق الحكومي المباشر.

صانع قرار الصناعة: يافندم احنا عاملين دراسة لإعادة توظيف الموارد والأصول اللي تم تفريغها من مباني وأراضي ومركبات وخلافه. والدراسة دي فيها توفير فرص عمل كتيره.

صانع قرار المالية: يافندم احنا بنتحرك بفيل كبير أوي مترهل خطواته بطيئة وغير موجهه ولإحداث نقله نوعيه في كفاءة الجهاز الإداري للدولة وضبط معدلات أدائه لازم نخف وزنه من منظور الأعباء المالية والاداريه ولتحسين الخدمات المقدمه وخلق مناخ عمل يسمح بالثواب والعقاب والترقي وإيجاد كادر وظيفي للعاملين المتبقين، علاوة على الاحتفاظ بكل من يقل سنه عن 35 سنة.

صانع قرار الأمن: والقرار ده هيتطبق على قطاع الأمن كمان يافندم؟

صانع قرار التنمية الإدارية: لأ طبعاً يا فندم.

صانع قرار الصناعة: يافندم أنا عندي هيئات كاملة مش هتبقى موجودة وهنوكل أعمالها لمراكز تحديث الصناعة. الناس دي مؤهله وفاهمه كويس جداً أبعاد الدعم التسويقي للصادرات وتأهيل الشركات للحصول علي الشهادات المؤهله لدخول الأسواق العالميه.

صانع القرار: وهتمشوا الناس بالوظيفة ولا بالسن؟

صانع قرار التنمية الإدارية: المقترح فيه معادلة ثلاثيه يافندم. الوظيفة والسن والمؤهل. بس كل اللي تحت سن 35 سنة مستبعد من المقترح لأن دول الشباب اللي هُما الأمل في استيعاب الميكنة والسوفت ويرز وتطبيقات التكنولوجيا.

صانع قرار المالية: يافندم احنا بنصرف مصروفات غير مباشرة نتيجة تضخم الجهاز وده مزود الدين على كل الوزارات، الكهرباء مديونة للبترول والبترول مديونة للمياه والمواصلات مديونة للصناعه كل الوزارات يافندم شغالة بنظام المقاصة سيادتك عارف احنا عندنا 50% توفير في الكهرباء في المقترح ده وأكثر من 70% توفير استهلاك وقود بعد توحيد خطوط المواصلات الحكومية زي ما شرحنا لسيادتك.

 صانع قرار الأمن: يافندم اللي هيسيبو شغلهم دول هيعملولنا مناحة "مشونا من شغلنا واحنا بقينا عواطلية"، وهيسخنوا علينا الناس والإعلام والناس ليها الظاهر ومتعرفش الواقع. ولسه متحفظ على القرار يافندم.

صانع القرار: إيه هي الوظائف الاكثر عُرضه للتقاعد؟

صانع قرار التنمية الإدارية: علي سبيل المثال وليس الحصر محصلين الكهرباء، العدادات المشحونة مسبقاً كافية جداً، عمال النظافة، الـ (outsourcing) هتوفر كتير أوي، عمال البوفيه كل دور في مبنى هيبقى فيه ماكينات للمشروبات. وفي وظائف كتير يافندم محدش بيستفيد منها، في أمريكا موظف بيخدم كل 256 مواطن والخدمة زي ما سيادتك عارف. احنا حاليا موظف لكل 12 مواطن. يا فندم احنا بنغير أوضاع مترسخة منذ عقود طويله. الوضع صعب جداً والجهاز بوضعه الحالي أقوى من أي قرار وقادر على عرقلة أي قرار بسهولة للحفاظ على مكتسباته واحنا مش هنيجي جنبهم في حاجة، مرتباتهم وعلاوتهم ومعاشاتهم ماشية زي ما هي بالعكس اللي عاوز يحسن دخله حيشتغل بمرتب تاني ومعاشه حيزيد لانهم حيستفيدو من إزدواجيه التأمينات. يعني مفيش أي ضرر واقع على أي طرف من أطراف المعادله.

صانع القرار: تحفظك مبني على إيه يا صانع قرار الأمن؟

صانع قرار الأمن: تقارير المعلومات وتحرياتنا يافندم كلها بتشير لأن القرار مش هيتقبل من معظم اللي هيتقاعدوا.

صانع القرار: يعني هو الموظف اللي بيزوغ من شغله الحكومي ويروح شغلانة تانية ده هيزعل لما يمشي وهو بيأخد نفس المرتب؟؟!!

صانع قرار الأمن: أيوه يافندم إنما اللي بقاله 10 أو 15 سنة في نفس الوظيفة والمكان مش هيسبها بسهولة وأكيد هيبقى في رد فعل.

صانع القرار: ما هو ده أكيد منتفع من وظيفته وده أهم واحد لازم يمشي.

صانع قرار الأمن: يافندم أنا ببلغ سعادتك تحفظ الأمن وسيادتك صاحب القرار النهائي.

أترك لكم القرار.   

 

 

تابع بوابة روزا اليوسف علي
جوجل نيوز