عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي
زميلة جوزى فى الشغل

زميلة جوزى فى الشغل

بقلم : غادة كريم
وصلتني هذا الأسبوع مشكلة زوجية مهمة تقول صاحبتها:أنا سيدة على مشارف الاربعين، اكتشفت أن جوزى مصاحب زميلته فى الشغل وقعدت أفكر أزعق وأصرخ واقوله طلقنى ولا أعمل خطة تخليه يتوجع على قد الوجع اللى فى قلبى، وأنتصر قرار الخطة، فضلت اراقبه تسع شهور وأجمع أدلة ضده من مكالمات لرسايل لاعترافات من زمايله فى الشغل، وعزمتها فى عيد ميلاده عندنا فى البيت علشان اتفرج على شكلهم سوا وهما فاكرنى مغفلة، حتى انى رحت لمديره فى الشركة وتعاطف معايا وقالى أن الكاميرات صورتهم وهيهدده بالرفد الا أنى رفضت أفضحه، وفى ليلة راس السنة زينت الشجرة وقعدت جنبه قلتله ..
 
ها يا حبيبى مستعد للمفاجاة اللى بعملهالك من تسع شهور؟ .. سمعته مكالمة وقلتله كل حاجة، يمكن البصة اللى شفتها فى عينه ساعتها من كسرة وندم شفت غليلى منه، وانفصلت عنه فى اوضة تانية ست شهوربيجرى ورايا ويعتذر ويقولى أنها مجرد واحدة أقل منه وكانت بتحاصره باهتمامها مش أكتر، ومامته اللى كانت بتعاملنى وحش بقت بتسأله كل يوم صالحنى ولا لسه ! .. والورد والهدايا والاعتذرات لم تتوقف طول الست شهور ورجعتله علشان خاطر بناتى تتربى فى حضنهم أبوهم، وعلشان أهلى ماتوا مليس سند فى الحياة، وبغبائى استقلت من شغلى وقعدت أربى العيال .. وسافرنا عملنا شهر عسل جديد بعد ما علمته درس عمره ما هينساه ابدا ولا هيفكر يوم يخون تانى.
 
 ولصاحبة المشكلة أقول..عزيزتى ..
 
مفيش شك واحد فى المية أنك ست ذكية جدا وشالت كتير لشهور وقدرت تعمل خطة جهنمية للحفاظ على البيت والزوج وكسبت حماتها، لكنك عايشة بنص قلب مابقاش فى حاجة تفرحك اوى ولا حاجة ممكن تكسر قلبك زيادة، عقلك انتصر للنهاية وأنا مش عارفة دى حاجة كويسة فى الدنيا ولا وحشة، بس أنتى ست تستحق التقديرونشرت قصتك علشان الستات تتعلم منها، لأن فى ستات من مدرسة أنها ماتقدرش تكتم غضبها ولا تتعامل مع راجل عارفة أنه بيخونها لشهور لأن الارهاق النفسى المصاحب للموضوع هيشتتها عن الهدف، بتتعامل بنص عقل والتانى طار من الخضة .. أتمنالك حياة جميلة زى البصة فى وش ولادك.



تابع بوابة روزا اليوسف علي
جوجل نيوز