الحلبثه

بقلم : محمد دويدار

ديسمبر يعنى الشتا والشتا يعنى الذكريات والذكريات يعنى الساعه اتنين بليل في عز التلج وانت فاتح الشباك ولافف نفسك ببطانيتين ومولع الدفايه الحمرا وسجارتك فايدك وكوباية حمص الشام جنبك وضى القمر خابط فالسقف وسيادتك سرحان فالماضى الجميل وفشعرك الذى طار وفشكلك من غير كرش زمان وفبنت الجيران الحب الذى كان اللى هيه أساسا كانت كل ماتشوفك ترزع فوشك الشيش وانت مصمم ان ده على سبيل ان التقل صنعه لحد ما صحيت فيوم لقيت امك بتقولك انت مادريتش باللى حصل يا منيل مش البت سهير بنت ام سهير دُخلتها كانت انبارح عالواد حوكشه بن سلامه الجزار ,طبعا انت في الوقت ده كنت لسه بتعيد تانيه ثانوى, وبعدها حسيت باكتئاب شديد وبما ان ماكنش فيه فيسبوك فمقدرتش تخلى الستاتس بتاعك فيلينج ساد والبروفايل بتاعك صوره سودا وفوسطها مكتوب حبيبى ضاع منى وهوه ده اللى كاسرنى ولا كتبت بوست تانى يوم تقول فيه برغم كل ما حدث سأكمل حياتى وحيدا وسأثبت للجميع انى احبك .... هييييييييييح ..ايام مالهاش أي تلاتين لازمه ..ماعلينا

             

المهم ياسيدى كل اللى فات ده مايهمنيش فحاجه انا اللى يهمنى وهتكلم عنه دلوقتى هيه كوباية حمص الشام اللى كانت جنبك وانت بتستدعى ذكرياتك السوده دى .. ايووون كوباية حمص الشام

 

حمص الشام ده يا ساده هوه المشروب الرسمي للشتا يعنى زى مالعرقسوس والتمر مشروب رمضان الرسمي وزى مالشربات مشروب الافراح الرسمي وزى مالموغات مشروب الست اللامؤاخده والده فحمص الشام بالنسبه للمصريين يعتبر جزء لا يتجزأ من الشتا وده بيكون ابتداءا من اول ديسمبر لحد نص مارس وبعد كده ماتشوفش وشه لحد ديسمبر اللى بعده .. المشكله بقى ان انا كنت مستغرب اوى وهتجنن ازاى وليه يبقى اسمه حمص الشام .. الموضوع ده كان مزعلنى فعلا وماكنتش عارف هل هيه فرط وطنيه وغيره على الصناعه المصريه ولا أيه بالظبط  ..لكن كنت بسأل نفسي هوه ليه يارب كل حاجه حلوه ماتبقاش مصريه وليه تبقى شاميه بالذات يعنى ليه يبقى اسمه بلح الشام , وليه الدماغ تبقى اسمها بر شام , وليه العيش اللى بحبه يبقى اسمه عيش شامى , وليه الل مش عارف ايه يبقى  "شامى" برضو , كنت بسأل نفسى ليه ما نقولش مثلا حمص الشرقيه او حمص الهيئه الهندسيه او حمص الجيش يعنى اى حاجه تحسسنا ان الشتا ده بتاعنا وان المشروب ده يخصنا احنا مش حضاره مستورده لكن بعد تفكير وتمحيص لقيت ان الموضوع ده ما فاتش المصريين ولا يعدى عليهم  بالساهل ابدا وافتكرت ان احنا بنقول على حمص الشام حلبثه وعالكركديه والتمرهندى بنقول عناب والسحلب الحلبى بنقول بندق وعالقهوه التركى نقول مانو وعلى بلح الشام بنقول صوابع زينب , طب ياراجل ده احنا اللى شربنا الكشرى فالشاى , طب عايز التقيله بأه تصدق ان الحاجه الوحيده اللى عندنا اكتفاء ذاتى منها وبنصدرها لكل دول العالم هيه المعسل القص والزغلول !!

وأخيرا تعظيم سلام من غير كلام لكل واحد او واحده بيحط نص كيلو شطه على كوبايه الحلبثه.