إن غدا لناظرة قريب

بقلم : محمد دويدار

*اللى اتسببو فى هزيمة 67 من قاده فاسدين واعلاميين منافقين ومواطنين من طبقة الانتهازيين والمنتفعين والمطبلاتيه الناس دى ليها نسل وسلاله ممتده وارثه منهم كل الجينات "الوسخه" بتاعتهم دى، السلاله دي كبرت ونمت وترعرعت وعايشه فينا ووسطنا دلوقتي

* فى نفس الوقت اللى كانوا سبب فى نصر 73 من قادة عظماء واعلاميين مخلصيين ضحوا بعمرهم عشان ينقلولنا الحقيقه ومواطنين ضحوا برفاهية معيشتهم من اجل تحقيق النصر دول برضوا ليهم نسل وسلاله ورثوا منهم كل جيناتهم العظيمه دى ودول برضوا كبروا وترعرعوا وعايشين وسطنا دلوقتى ,

وبرغم ان الأتنين من جيل واحد تقريبا الا ان شتان الفارق مابين اللى قالولنا واوهمونا ان قواتنا على اعتاب تل ابيب وصحى المصريين تانى يوم لقوا اليهود بيتمشوا عالقناه وبيقزقزوا لب في سينا وبين اللى قالولنا احنا بنلعب كورة ومش هنحارب وصحى اليهود تانى يوم لقوا الجيش المصرى بيضرب قلب تل ابيب ..فرق جامد مابين اللى بيشتغل في صمت ومش همه الانتقادات لانه واثق من النتيجه وبين اللي بيهلل في كل مكان لانه خايف من النتيجه.

احنا حاليا عبارة عن ورثة دول وورثة دول متجمعين في نفس المكان مع اختلاف الزمان..ناس بتتكلم كتيير وفعل مافيش وناس بتشتغل كتير من غير كلام..

كل واحد له الحريه يفسر كلامي علي حسب هواه ويصنف الاشخاص ويوزعهم علي ادوار المقال وفقا للميول والانتماءات والاعتقادات والظنون لكن الحقيقه المطلقه هتظهر مع الايام وهيبان مين فينا ورثة الابطال ومين فينا ورثة النكسجيه.. ان غدا لناظره قريب..