وزير السعادة المصرى

بقلم : محمد دويدار

من كام شهر الامارات العربيه الشقيقه عملت وزاره اسمها وزارة السعاده وكلنا وقتها اتكلمنا عليها و"قلشنا" على نفسنا كالعاده وبدأنا ننزل بالنكت و"الكوميكس" على السوشيال ميديا وشويه واتنسى الموضوع ومافكرناش ناخد اى خطوه ايجابيه او حتى سلبيه لكن كل اللى قدرنا نعمله اننا وقفنا ثابتين فى نفس المكان ومن المعروف والمتفق عليه ان الكون كله بيدو وبيجرى وبيطير وبيسبق بمراحل واللى بيفضل واقف فى مكانه او بيدور ببطأ بعد فتره هيفاجأ انه بقى بعيد جدا وكل مدى بيبعد اكتر واكتر وده بالظبط اللى حصل معانا يمكن ماحصلش جديد فى حياتنا لكنك احساسنا ان الحياه بتضيق علينا اوى وكل شويه الامور بتزداد صعوبه ده راجع لاننا ما عملناش اى جديد يساعد على اننا نتقدم ولو خطوه او حتى لو عملنا فببطأ شديد لا يواكب سرعة التقدم حولنا .

طيب تعالوا نشوف بعد اقل من سنه عملت ايه وزارة السعاده فى الامارات ومش هتكلم اطلاقا عن مضاعفة المرتبات او عن اى نواحى ماليه لان اللى مايشوفش مالغربال يبقى اعمى لكن كل كلامى هيكون عن حاجات بسيطه جدا فعلا ممكن تعمل الفارق فمثلا كوكب الامارات السعيد عمل فى الفصول الدراسيه زرار على مكتب الطالب بحيث لو شعر بالملل او عدم الفهم يدوس عليه وبالتالى المدرس هيفهم ان فيه حد مش فاهم او حاسس بملل وفى نفس الوقت ماحدش خالص هيعرف مين الشخص ده عشان مايسببش للطالب احراج ولا المدرس كمان هيعرف لكن كل اللى هيوصله ان فيه طالب مش فاهم او فيه طالب يشعر بملل فسيادة المعلم المحترم هيبدأ يشرح بأسلوب مختلف او يعمل "بريك" وبعده يبدأ يكمل .. حاجه تانيه عملتها وزارة السعاده وهى سيارات السعاده اللى مهمتها مكافأه السائقين الملتزمين .. ايوه سيارات بتلف شوارع الامارات ومهمتها انها لو شافت حد بيسوق كويس وملتزم بقواعد المرور بتديله هديه او بتشيل نقاط سودا او مخالفات سابقه مقابل التزامه ..

طيب تعالوا بقى نرجع من الحلم الجميل ده وننسي كوكب الامارات السعيد ونهبط على ارض الواقع الاليم فى ام الدنيا ونشوف هل ممكن نطبق افكار زى دى هنا !!. ؟ جايز يكون الجواب البديهى لكتير منكم هو لأ قطعا وجزما وحسما لكن انا شايف انه ممكن جدا بس بشرط واحد هوه الاستعداد النفسي للشعب والحافز لدى الناس يعنى ماينفعش شعب كارهه للفرحه ومحب للالش والسخريه فى المصائب انه يعمل وزاره للسعاده بل الافضل اننا نعمله وزاره للمواساه .

الابتسامه على قد ما هى سهله الا انها ممكن تبقى صعبه جدا والاصعب منها انك تكون فى موضع او مكان بتحاول فيه ترسم بسمه على وجه انسان محبط او حزين .. الموضوع صعب لكن اتضح لى انه ممكن وعشان كده بدأت منذ فتره اغير اسلوب كتابتى تماما واحاول انى اكون سبب فى ادخال الفرحه ورسم الضحكه على ناس زهقت وتعبت من الاخبار الصادمه والمحبطه وبرغم انى حسيت ان الناس محتاجه ده وعايزين يتبسطوا ويضحكوا ولو بكلمه الا انى وجدت صنف اخر كاره للضحك وللفرح بل كاره لنفسه وكل مهمتهم هو التشكيك واحباط محاولات غيرهم للفرحه بلا اى سبب سوى انهم قرروا ان يكونوا بؤساء ولهؤلاء اقول افرحوا واضحكوا ولو مره واوعدكم انكم بعدها هتكرروا المحاوله مرات ومرات ..

وزارة السعاده المصريه فكره ممكنه جدا ولكن بمنظور مختلف فلسنا بحاجه لمبانى ومسئولين وحلف يمين واوراق وما شابه  كل اللى محتاجينه مواطنين عايزين يسعدوا انفسهم ويسعدوا غيرهم بلا اى هدف سوى احداث حاله عامه من الرضا النفسى ولو مؤقت ولو دقائق وسط اجواء غايه فى الصعوبه , كل اللى هنحتاجه كلمة حب ووجه بشوش ونيه صافيه , ابتسم فالحبيب محمد يخبرك ان تبسمك فى وجه اخيك صدقه , ابتسم وكن انت وزير السعاده المصرى الجديد ..