طارق العكاري
الزعيم والتعويم
بقلم : طارق العكاري
طلب الزعيم وزير الصحة لمتابعة أثار التعويم وحضربمساعديه.
وسأل الزعيم: إيه الأخبار يا وزير صحه مصر.
وزير الصحة: تمام يا فندم عندنا شوية مشاكل مع شركات الأدوية والتسعير، وإحنا في أخر مراحل المفاوضات معاهم.
الزعيم: والمفاوضات دي متمتش ليه من قبل القرار؟
وزير الصحة: كنا خايفين نقولهم القرار لا يحصل أزمة في الدوا.
الزعيم: يعني إيه يحصل أزمة؟ يبطلوا إنتاج يعني ولا يبطلوا يسلموا الدواء؟
وزير الصحة: الاتنين واردين يافندم.
الزعيم: والشركات دي عقودها مفهاش إلزام إنه علشان يوقف إنتاج أو يتوقف عن التسليم لازم يخطر الدولة اللى هو شغال فيها قبلها بمدة كافية لايجاد البديل؟
وزير الصحة: لا للاسف يا فندم.
الزعيم: ومغيرتش عقودهم ليه أول ما استلمت؟ يعني هما يجوا مصر يشتغلوا فيها ويبيعوا لتسعين مليون وما يصدروش ونعتمد عليهم وبعد كده يجي يقول مش لاعب ويعملنا أزمة في البلد. شوف ما هو يأما كنت أول ما مسكت الوزارة بصيت على الشركات وقدرت تعمل توازن تنافسى بالمنتج لضمان عدم احتكار شركة لمادة فعالة أو كنت جيبت الشركات دي واديتهم مزايا ضريبية أو اعفاءات جمركية في مقابل إنك تضمن إنهم ميقولوش لا هاخد الكورة وامشي.
وزير الصحة: من ساعة ما أنا جيت لقيت الشركات عقودها هشة جداً وبدون إلزام.
الزعيم: وإيه إجراءاتك لما لقيتها هشة؟
وزير الصحة: .................(صمت)
الزعيم: بص على نموذج الاردن كده شوف عملوا ايه في تصنيع المواد الفعالة. ايه اللى يمنعنا اننا نبقا زيهم؟
وزير الصحة: حاضر يا فندم ندرسه.
الزعيم: شوف يا سيادة الوزير احنا مش جايين نمشي الشغل ولا احنا وزارة تسيير أعمال، احنا أخدنا قرارت متاخدتش من نصف قرن. فالسكوت ده رد وزير تسيير أعمال مش وزير بيشتغل pro-active ولا عاوز يغير. طيب إيه مدى جدوى إننا ندعو شركات الادوية لعمل مصانع جديدة بظام B.O.T زي محطات الكهرباء يبنوا المحطة وينتفعوا بأرباحها عشرة خمستاشر سنة وبعدين يسيبوهلنا؟
وزير الصحة: ندرس الموضوع سيادتك حاضر.
الزعيم: أنت بتتفرج على المتحدث بتاعك وهو بيعمل مداخلات في برامج التوك شو؟
وزير الصحة: أه طبعاً يا فندم.
الزعيم: طيب المرة اللي فاتت مسكته إحدى المذيعات وقالتله أنا مبحبش الكلام الشعبي ده كلمني اقتصاد وهو رده كان عادي ولا كأنها بتقوله أنت مش فاهم حاجة او بتقول اى كلام.
وزير الصحة: هشوف الموضوع ده يا فندم حاضر.
الزعيم: هو مش واخد باله إنه بيتكلم باسم الوزارة، على الأقل يقولها أنا آسف مش هقدر أكمل الحديث بالمستوى ده حضرتك بتتكلمي مع المتحدث الرسمي لوزارة صحة مصر. يعني إيه تقوله كلام شعبي ولا شعبوي، عيب الكلام ده لازم يعرف امتى يتكلم ويتكلم إزاي، لو هو بيتكلم كلامي شعبي يبقى ميتكلمش تاني، ولو هو معندهوش حاجة يقولها تبقا مشكلة الوزارة كلها مش مشكلة المتحدث.
وزير الصحة: ..................(صمت)
الزعيم: هاتولي وزير الانتاج الحربي على التليفون.
وزير الانتاج الحربي: صباح الخير يا فندم (سبيكر)
الزعيم: صباح الخير يا سيادة الوزير. عاوزك تعملي دراسة لانشاء مصنع دواء للأدوية المتداولة مش أدوية الجدول. شوفلي كده التكلفة والعائد على الاستثمار. وزير الصحة معايا وسامعك هخليه يمدك بالبيانات المطلوبة.
وزير الانتاج الحربي: احنا كنا شغالين بالفعل في الدراسة دي يافندم من منظور ان الدواء من السلع الاستراتيجية وممكن تخلص خلال أسبوع وأراجعها مع السيد وزير الصحة وابعتها لسيادتك.
الزعيم: تمام
انتهت المكالمة.
الزعيم: سيادة الوزير تسمع عن صلاة المساجين؟
وزير الصحة: لا يا فندم.
الزعيم: يعني في السجن الامام او المؤذن يا قاتل يا تاجر مخدرات ، بس هما في الاخر بيئمو الصلاه.
وزير الصحة: مش فاهم يا فندم الاسقاط.
الزعيم: فكر فيها كده هتلاقيها منطقية.
هذا الحديث مستوحى من الخيال ولا يمت للواقع بأي صله
صلاه المساجين ماخوذه من احد الاصدقاء وليست من بنات افكارى.
جوجل نيوز
