عاجل
الخميس 28 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي
يحكى أن

يحكى أن

بقلم : محمد دويدار

جدتى زمان كانت بتحكيلى باستمرار حدوته غريبه جدا كانت بتقول فيها..



" يحكى أن كان فيه ملك حِلم إن سنانه كلها بتقع فـصحى من نومه مفزوع وقعد يصرخ وينادى يا حُراااس يا حُرااس هاتوا المنجميين هاتوا المفسرين وفعلا بسرعه جابوا اعظم مفسر احلام فى المدينه حكالوا الملك حلمه فالراجل بص بحزن وقاله للاسف يا جلاله الملك كل اولادك هيموتوا قصادك .. زعل الملك اوى وامر باعدام المفسر وطلب واحد تانى .. جاله مفسر تانى وبرضو حكالوا الملك حلمه فالراجل بص بخوف وقاله للاسف يا جلالة الملك اهلك كلهم هيموتوا قصاد عينك فزعل جدا الملك وامر باعدامه وطلب واحد تالت .. جاله الراجل التالت فحكاله الملك حلمه الراجل هلل وفرح وقاله ابشر يا جلاله الملك ابشر انها رؤيه عظيمه فإنك ستكون اطول اهلك عمرا واكثرهم شبابا وصحه" ففرح الملك جدا وامر بمكافأه كبيره للراجل وعينه مستشار له ".

ايوه الاتنين اللي فسروا حلم الملك كانوا صادقين جدا وقالوا الحقيقه لكنهم كانوا اغبيا جدا وقالوها بغشم وباسلوب منفر انما الراجل التالت استعمل عقله المتنور ولسانه الفصيح واسلوبه الجميل وقال الحقيقه برضو بس باسلوب اجمل فقاله انك اكتر واحد هتعيش في اهلك وده معناه ان كل اهله هيموتوا قبله برضو لكن باسلوب خلي الملك يتقبل كلامه ويكافأه كمان.

وبغض النظر انها حدوته من الفلكلور مافهمتش معناها الا لما كبرت الا ان جدتي قدرت بطريقه غير مباشره انها تغرز فيا مبدأ مهم جدا وهو ان الكلمه لازم قبل ما تطلع منك تتوزن بميزان حساس لان كلمه ممكن توديك فستين داهيه وتخسف بيك الارض ونفس الكلمه بنفس المعني لكن باسلوب تاني ممكن ترفع مكانتك وقدرك عند الناس..

علموا اولادكم واتعلموا معاهم ان رأيهم مهم وانهم مش لازم يكذبوا ولا ينافقوا ولا يخافوا لكن علموهم برضو انهم لازم يختاروا الوقت والاسلوب والطريقه المناسبه لابداء ارائهم ..

علم ابنك يقول الحق بس ماتعلموش يقول للاعور انت اعور فعينه لأن دى اسمها وقاحه مش صراحة.

 قول لابنك زي ما ربنا قال لرسوله "لو كنت فظا غليظ القلب لانفضوا من حولك".

                                                                                           

تابع بوابة روزا اليوسف علي
جوجل نيوز