مجدى عبد الغنى وفن الماركتينج

بقلم : محمد دويدار

عايز تتعلم ماركتينج صح وتعرف ازاى تشتغل على نفسك وتوصل للناس بأقل امكانيات ؟

إتفرج على مجدى عبد الغنى كمثال حى للشخص اللى اكبر انجازاته جون من ضربة جزاء ومن سبعه وعشرين سنه كمان بس بالرغم من كده هوه فهم وعرف ازاى يشتغل على الجون ده وبدأ يردد جملته الشهيره بتاعت اوعوا تنسوا الجون الى جبتوا فى كاس العالم وبعدين بدأ يطور فى اسلوب وطريقة عرضه فبقى يحول اى مناسبه لاوعوا تخلوا كذا ينسيكم الجون بتاعى وهكذا لحد ما قدر يجمع من ورا طريقته دى ثروه وشهره ومنصب وبرامج ولقاءات ووصل لكل بيت مصرى وعربى ويمكن حقق اكتر من اللى ماحققو طول عمره وهوه فى الملاعب .. وخلى بالك مش شرط تكون حبيته وجايز جدا تكون ضحكت مره عليه و الف مره زهقت وماحبتوش لكن فى النهايه هوه اصبح واقع وموجود وواصل لعينك وأذنك وبيشغل جزء من تفكيرك وبيخليك تتفاعل معاه سواء بسلبيه او بايجابيه وده معناه نجاح منقطع النظير ..

مجدى عبدالغنى واحد من الناس اللى عرفت حدود امكانياتها واستغلت ماتملك الاستغلال الامثل أما سيادتك فممكن تكون صاحب علم او موهوبه او تمتلك طاقات ابداعيه اضعاف ما يملكه كابتن مجدى لكنك لا تجيد فن تسويق نفسك ..

الخلاصه : ربنا خلق لكل واحد فينا ميزه في حاجه معينه ممكن تكون اكتشفتها وممكن تكون لسه .. اعرف انت تمتلك ايه وبتتميز فى ايه وابدأ اشتغل على نفسك فى الحته دى وحاول توصل للناس هتلاقى اللى يقبلك وهتلاقى اللى يهاجمك لكن الاكيد انك فى النهايه هتوصل.