عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي
زمن اللامنطق

زمن اللامنطق

بقلم : محمد دويدار

لو عايز تعرف انت تشبه مين من المشاهير دوس هنا اما لو حضرتك عايز تختبر درجة جاذبيتك للطرف الاخر فدوس هنا اما بقي لو نفسك تشوف مين اكتر واحد زار صفحتك مؤخرا فاضغط عالرابط ده لكن لو مش قادر ومستعجل وتحب تنعرف على سبب وفاتك وتاريخ الوفاه ومكانها فاللينك ده هيعرفك ! وغيرها من اللينكات الخزعبلايه العبيطه اللي للاسف قريت احصائيه مفزعه عنها بتقول ان عدد اللي بيزوروا الصفحات دي من الوطن العربي بيقارب عالمليار واحد يوميا ! المصيبه بقي ان حضرتك يا مدام سوسن مع احترامي الكامل لجانبك بتصدقي اللي بتشوفيه و بتقنعي نفسك بيه يعني لما الموقع المعتوه ده يطلع انك شبه انجلينا جولي ويحط صورتك عاليمين وجنبها صوره تانيه وانتي بتتحولي وهووب دبل كيك بقدرة قادر تبقي عالشمال انجلينا جولي وتختفي الخدود المكلبظه والمناخير المبعجره والتفاصيل اللي حضرتك اساسا مش متقبلاها في نفسك وما صدقتي ان حد خلصك منها ف تفرحي جدا وثقتك في نفسك تزيد و تجري علي جوزك تفحميه برأي الفيسبوك فيكي وطبعا هوه لو انسان محترم فاقل واجب هيقولك غوري يا وليه من وشي انتي والفيس ابن العبيطه بتاعك ده فتقومي سيادتك بالعند فيه عامله شير وكاتبه معقوله انا شبه القمر دي ! وهنا بقي هتلاقي اصحابك الحلوين الزهره البيضا و ميمي دي انا والعاشق بلا امل هيبدأو يكتبولك واو ايه القمر ده انتي احلي بالتأكيد يا جميله فتردي حضرتك وتقوليلهم دى عيونكم الحلوين يا غاليين وتستمر دورة النفاق الابديه في طريق مالوش اخر! ..



اما استاذ فهمي فبرغم انه اصلع وبكرش الا انه مقتنع جدا برأي الفيسبوك اللي قال انه فوله واتقسمت نصين من عمرو دياب لأ مش كده وبس حضرته كمان مش عاجبه عمرو دياب علي اساس ان اسماعيل ابن عم هريدي جارهم طلع شبه براد بيت وبيتنطط عليه وكده !..

يا جدعان فوقوا الله يكرمكم كل الحاجات دي اشتغالات وهبل وضحك علي عقولكم وتضيع لوقتكم وتفكيركم لا انتي شبه انجلينا ولا سيادتك براد بيت وده مش عيب على فكره ولا حاجه تكسف .. انتو صحيح ممكن تكونوا اقل جمالا منهم لكن اكيد جواكم حاجات حلوه واحلي من اللي عندهم كمان.. طب يا مدام سوسن تحبي تاخدي وش انجلينا وفلوسها ويجيلك اللي جالها ويتقطعلك اللي اتقطعلها ؟ ها ردى عليا تحبى  كده؟!  ايه ده استنى بس يا ست انتى ..  اه تحبي ازاي بس !! ؟ ايه هوه اللى عادى تركبى صناعى ازاى بس !! لا حول ولا قوة الا بالله ..  طب انت يا استاذ فهمى تحب تبقى زى براد بيت ويـ ..  , ياعم استنى بس هوه ايه اللى عادى اركب صناعى انت كمان الراجل لسه بخيره انا لسه ماكملتش السؤال انا قصدى انك تحب تبقى زيه وتطلق مراتك ويتخرب بيتك وعيالك يتشردو وتحطهم فى ملجأ وكده ؟! خلااص وصل الرد يا استاذ فهمى اصل اللى يخليك موافق تركب صناعى فعادى خالص عيالك تتشرد !!

لا حول ولا قوة الا بالله وصلنا لحاله فوضويه جدا والناس للاسف بقت بتنساق لاى كلام وتصدق اى امل كداب وتجرى ورا اى وهم ولا عزاء للعقل والمنطق فى زمن اللامنطق !

إلا صحيح انا شبه كيفين كوستنر اصل الفيسبوك بيقول كده ؟!!!

تابع بوابة روزا اليوسف علي
جوجل نيوز