رمضان فى مصر

بقلم : محمد دويدار

رمضان فى مصر هوه رمضان اللي اتربينا عليه من واحنا صغيرين.. رمضان الفانوس في ايد العيال والزينه فى البيوت والفرحه اللي دبت فجأه في القلوب.. رمضان بروحانياته و بمسلسلاته ، بقرانه وبصلاته ، وبلمة الاهل والاصحاب.. بصوت الشيخ رفعت وبإصحى يا نايم وحد الدايم وبفرحة اول ليلة تراويح وبالبكا فى ليلة سبعة وعشرين وبنرفزة نهار تقول بعدها اللهم اني صايم وبكوباية خشاف تخلى الدم يجرى فى العروق .. رمضان بكام ختمة قران ختمتها وبكام مسلسل تابعته ومين عجبك ومين عزمك ومين كلمك يباركلكُ .. رمضان للي يصومهُ واللي يقومه واللي يفرح بقدومهُ .. رمضان في مصر هوه الحاجه اللي بتهون علينا بقيت السنه وبتغير مودنا وبتلين قلوبنا وبتقربنا من بعضنا.. رمضان يعني تتسحر فول وبلاش فلافل عشان ماتحماش علي قلبك ، رمضان يعني السمك من الممنوعات عشان ماتعطش بالنهار،رمضان يعني مصر سهرانه مابتنمش، يعني فرحتك بإبنك اول يوم صيام ، يعنى اخر خمس دقايق قبل المغرب وكام مره بصيت في الساعه، يعني بؤ المايه ونفس السيجاره قبل الفجر، يعني خالك يقولك صايم ولا زي كل السنه.. رمضان يعنى الزبادى الراعى الرسمى للسحور ، يعنى التهجد وليلة القدر ، يعنى دعوه تدعيها وتلح عليها فمايجيش رمضان اللي بعده الا وربنا محققهالك..

رمضان يعنى مصر غير مصر باقى السنه ومصر يعنى رمضان غير رمضان فى اى مكان تانى ..

اللهم بلغنا رمضان لا فاقدين ولا مفقودين واكتبنا عندك من هؤلاء الذين انعمت عليهم بالرحمه والمغفره والعتق من النار ..