بوابة روز اليوسف

بوابة روز اليوسف

23 يوليو 2019 - 54 : 19   Facebook twitter Youtube   RSS
بوابة روز اليوسف
رئيس مجلس الإدارة
عبد الصادق الشوربجي
رئيس التحرير
أيمن عبد المجيد

أنا والمدام والحكومة

1 يونيو 2017



محمد الشرقاوي
بقلم : محمد الشرقاوي

عزيزتي الحكومة : ترددت كثيرا في إفشاء سر من أسرار عائلتي خشية التعرض للمسائلة القانونية بتهمة إفشاء أسرار منزلية مقدرا إنشغالك باستكمال إجراءات رفع الدعم في يوليو القادم للتخفيف من عجز الموازنة لكن مضطر أن أفصح وأبلغك لعلك تفاضلين بين عجز الموازنه و عجز المواطن

أسف يا عزيزتي ! هتكلم عن غلاء الأسعار إللي بياكل في جلدنا ولحمنا ومصمص دمنا .. تخيلي ؟ بأكل ولادي رز نصه وأكتر شعرية .. وشوربة بالمرقة بدل الفراخ واللحمة .. وفينو من غير جبنة.. وعيش حاف من غير غموس .. أما إللي بيقولو عليه محشي فلم نعد نحشي .. وذاكرتي إتمحي منها البشاميل والكوردن بلو وجلاش ورقاق اللحمة.. حتي القطايف أسعارها خلتني مش طايق .. و أسعار عين الجمل و الجوز واللوز والبندق والفستق إللي بالجرام بقت دمار

حتي الفول والفلافل مش سند ليا وقت ما المهية متكونشي مكفية فكيس الفول المتلحس ب 2 جنيه.. و الفلافل قرصها "الميكرو" بقي بجنيه

والله أسف تحمليني قليلا ! كيلو اللحمه بقي 150 يعني علاوتك المضروبة في 2 إللي هتتصرف في يوليو الحزين متكفيش كيلوهين .. حتي اللبن بقي نصه مغشوش بمية وب 13 جنيه ..حتي شربة المية بنقطها من الحنفية نقطة نقطة علشان الفاتورة متعديش وتخرب القرشين إللي فاضلين .. وإن حد قال لي الجو حر والمروحة فين. طب نفتح التلفزيون يا بيه . طب نشغل لمبة مش لمبتين .أقول استحملوا ممعاييش ل فاتورة الكهربا تضيع فيها العلاوتين ..

أقسم بالله أسف بس هجيب منين دا الجبنه براميلي و فيتا وإسطنبولي بقت الطاق طاقين وبخلي اللحسه منها تكفي العيال شهرين وحرمت عليهم يأكلوا من الطبق وعلقته في السقف يلحسوا في الهوا علشان المهية تكفي أول يومين ..ولو حد قال رومي ولا حلواني أديله جزمتين وأطيح فيه ببوأين وأقول إنت مجنون عاوز تخلص المهية أول يوم.. ده الكيلو عدي ال 100 والمهية فيها كام مية ؟

ويبقي يوم إسود يابشمهندس شريف إسماعيل لو المدام قالتلي هات فروج ألاقي الكيلو ب 35 ؟ بلاها فروج هو من غيره هموت ..

والواد محمود إبني الكبير نفسه في بيبسي وشيبسي وبسكوت وشوكولاته يأكلهم قبل ما يموت بس أسعارهم غلت فوق المعقول ..وبقي أخري معاه مصاصة بجنيه علي قدر المسموح

والمدام إوعي تنسي دواء الواد حمزة المولود والكشف عند الدكتور ده يوم بيبقي يا معالي الوزراء فيه الحزن باين علي الوشوش منين ده الكشف عدي ال3 ميات ده لو دكتور عنده رحمة بالجيوب .. والدوا الدولار خلاه مجنون وأنا مش معايا بنكنوت

يا عزيزتي إستني لسه ما قولتش ليك عن الدروس الخصوصية والمس والمستر والمصروف دول لوحدهم ورب العزة كافيين من أول ما تقبض تقول إتصرف المقبوض وتمشي شايل بطيختك وجورنالك مهموم لحد ما تخبط في حنطور

معاليك رايح فين كلامي مضايقك ولا إيه ؟ طب هقولك ! فكر كده تروح عند الجروساري ( الخضاري يعني) وإنزل ب 100 أهيف ميجبوش بطيخة وشويه ليمون .. ترجع البيت مهموم ومش جايب حاجة ! ما الجيب مفهوش ؟

دول أخر 100 وكان عندي أمل يكفوا بعد خامس يوم . وأمد إيدي لليسلفني علشان اكمل ال30 يوم ..

لسة عندي أمل إن رفع الدعم مش هتعملوه





التعليقات



اخر مقالات للكاتب

مجلة روز اليوسف
مجلة صباح الخير
روز اليوسف اليومية

ثورة 23 يوليو

رؤساء جامعات افريقية

ثورة 30يونيو

انجازات في المحافظات

العدالة الاجتماعية

Rosa TV

اعلان شركة المرعشي

الشعب يجني ثمار الإصلاح

محمد صلاح
  • الأكثر قراءة
  • إخترنا لك

تطوير مصر

اعلان لاروش بعد العيد

اعلان مراتب سوفت