الكبير والغفير

بقلم : طارق العكاري

دلف الغفير بعد أن طرق باب الكبير مستأذناً وقال

•  شيخ الغفر بره يا كبير.

فرد الكبير: أيامه سودا خليه يدخل.

دلف شيخ الغفر بمعطفه وسلاحه الطويل العالق على كتفه وألقى السلام على الكبير.

شيخ الغفر: صباح الخير يا كبير.

الكبير: هو أنت مش ناوي تبص على شغلك بقى وتشوف المصايب اللي في البلد وتسيبك من الهجايص اللي انت شاغل نفسك بيها أنت ورجالتك؟ قاعدين تختموا في ورق وتغتتوا على الناس واللي يفكروا يشتكيكوا تطلعولوا مية تعبان يقرصه.

شيخ الغفر: ليه كده بس يا كبير ده أني بنحبك.

الكبير: أنا لا عاوزك تحبني ولا تكرهني. أنا عاوزك تشوف شغلك وتخلي رجالتك تشتغل بما يرضي الله مش يشتغلونا بما لا يرضي الله.

شيخ الغفر: ايه اللى حصل بس يا كبير؟ مين مزعلك؟

الكبير: أنا نزلت الشارع إمبارح لوحدى بدون حرس ولقيت بلاوي سودا. لو انت عارفها وساكت تبقا مصيبة ولو انت مش عارفها تبقي مصيبتين.

شيخ الغفر: قولي بس ياكبير مين مزعلك وأنا أجبهولك في شوال؟

الكبير: شوال؟؟!! شوال ايه بس ومزعل مين؟ عربياتك كلها بتخرب بعد 6 شهور ورجالتك أول ناس بتخالف وبتمشي عكس الاتجاه ومحدش عارف هو مين اللي بيسوق ومين اللي متساق، موتوسيكلات ماشية من غير نمر ورجالتك واقفة بتشاور بأيديها في الاشارات للعربيات انها تمشى قال يعني كده السكة هتفتح والشارع حيسلك وسايبن المكروبصات تقف زى ماهيا عيزه فوق الكوبرى ماشى تحت الكوبرى ميضرش وممكن بعرض الكوبرى كمان لو السواق بيدفع كويس. ياراجل ده أنت لو شفت لبس رجالتك هتلاقي انك بترمي مليارات على الأرض علشان كلهم مش لابسين اللبس الميري اللي بندفع فيه دم قلبنا.

شيخ الغفر: ياكبير ما احنا ما بنعرفش نشتغل غير كدهون.

الكبير: لو مبتعرفش تشتغل غير كده يبقا امشي وسيب مكانك للي بيعرف.

شيخ الغفر: محدش هيرضى يا كبير.

الكبير: لا، أنا عندي ناس ترضى تمسك مكانك متقلقش.

شيخ الغفر: لا، مش قصدي كده يا كبير. محدش هيرضى من رجالتي يشتغل بطريقة تانية غير كدهون. هما أصلهم ما يعرفوش غيرها.

الكبير: إمال التدريب اللي بنصرفه عليكم ده كله والأجهزة والمعدات والموتوسيكلات والعربيات اخر موديل اللي راكبنها  وبتخربوها قاصدين علشان تفضلوا عايشين في الحرام كده ومحدش يحاسبكم؟؟

يدلف الغفير مرة أخري فجأة.

الغفير: إلحق يا كبير ناس متجمعة وقاطعة طريق الإصلاح.

شيخ الغفر: بتقول إيه؟؟!!

الكبير: وعاوزين إيه دول؟

الغفير: بيقولوا عايزين عدالة إجتماعية يا كبير.

الكبير: أيوه يعني إيه المطلوب؟ فجأة كده عدالة إجتماعية؟ ومن عيلة مين دول؟

الغفير: دول مطاريد العوائل يا كبير.

الكبير: ويعدين يا شيخ الغفر؟ هنعمل إيه؟

شيخ الغفر: أؤمرني يا كبير.

الكبير: إتصرف يا شيخ الغفر ومش عايز غشومية.

شيخ الغفر، وعلى وجه ترتسم إبتسامة خبيثة: محلولة يا كبير متحملش هم.

وخرج شيخ الغفر والغفير من قصر الكبير وإنفض الاعتصام فور خروجهم سالمين بدون حساب ويبقى الوضع على ما هو عليه.