عفوا، لقد نفذ رصيدكم!

بقلم : أمل حجازي

 

تجربة جديدة هأخوضها معاكم النهاردة...هأكتبلكم المقال ده باللغة العامية. ما تسألونيش اشمعني ده بالذات، لأني فعلا مش عارفة! بس يمكن علشان الموضوع قريب أوي من قلبي، ويمكن علشان قلبي موجوع أوي، أو يمكن علشان عيزاكم تحسوا بكلامي أوي.

" عفوا، لقد نفذ رصيدكم!"

 الرسالة دي بنسمعها في التليفون لما ما يكونش معانا رصيد فلوس نتكلم بيه. الجملة دي تنطبق على حاجات كتير أوي ممكن يكون نفذ رصيدها عندنا، بس مين عنده الجرأة أنه يقولها؟! تعالوا مع بعض نشوف إيه الحاجات اللي ممكن فعلا ينفذ رصيدها في حياتنا.

رصيد العشم:

   لما الشخص اللي كان دايما بيبقى جنبك، الشخص اللي ممكن تعتمد عليه، الشخص اللي مهما حصل بيكون " عشمك" فيه كبير أوي يبطل فجأة بدون أي أسباب يعمل كل ده! لما تاخده الحياة منك وينساك، اعرف ساعتها أن رصيده في العشم قد نفذ وعليك البحث فورا عن شخص جديد، بس المرة دي اختار صح!

رصيد الحنية:

  لما يتحجر قلب حنين، لما تتسرب الحنية والطيبة منه، لما يحس فجأة أن حنيته عليك دي أنت مش محتاجها، لما قلبه الحنين يبطل يطبطب على قلبك، ابعد فورا وشوف قلبه هيقدر يحن على حد تاني ولا لأ، لو قدر يبقى أنت خلاص مبقاش ليك مكان!

رصيد الثقة:

    الثقة زي لوح الازاز؛ اللي لو انكسرعمره ما هيرجع زي الأول أبدا. أي محاولة منك لإستعادة الثقة دي هيجرحك اكتر. "لا تلعب بالزجاج المكسور من فضلك"!!...لما الثقة تتكسرعمرك ما ها تحس بنفس الاحاسيس تاني ابدا. عمرك ما هترتاح للشخص ده ابدا تاني، مهما حاولت تقنع نفسك أنك سامحته أو أديته فرصة تانية. لما يخلص رصيد الثقة عندك من شخص معين بيبعد تلقائيا من قائمة المقربين إلى قلبك.

رصيد الاحساس بالأمان:

     صاحبتي حكت لي عن حياتها مع جوزها. حياتها اللي من غير أمان. سألتها وهي دي تبقى حياة؟ قالت لي أنا عمري ما حسيت بالأمان مع جوزي. الأمان مش فلوس وشقة ورصيد في البنك، الأمان يعني القرب، يعني الاهتمام، يعني الونس. وللأسف كل ده هي عرفت طعمه كويس جدا في بيت أبوها بس. الأب هو رصيدك الحقيقي بالأمان في الدنيا دي. حبه هو شهادات الاستثمار ذات الفائدة العالية جدا جدا في بنك الحياة.

رصيد الصبر:

  لما تفقد روحك وانت بتحاول تصبر علشان الحياة تعدي. لما يكون مفروض منك أنك تستحمل وتعيش وخلاص. لما يكون كل اللي حواليك شايفين أن مصلحتك أنك تصبر وتكمل. لما يقولوا لك أن ده نصيبك ولازم ترضى بيه. وفجأة تحس أنك بدأت تتخنق وأنت بتحاول تتنفس حتى الهوا، ساعتها بس هتعرف أن " للصبر حدود"، وأي محاولة منك للمقاومة ستحولك من انسان ذو مشاعر وأحاسيس لإنسان آلي فقد الشعور بالحياة.

رصيد السعادة:

 لما الدنيا تقرر فجأة تكشر في وشك. لما كل حاجة تمشي عكس التيار. لما كل محاولاتك للوقوف في وش الصعاب تفشل في كل مرة. لما يتسرب اليأس لروحك. لما تخذلك الدنيا بقسوتها مرة وبغدرها مرات. لما ينسيك الوجع كل الأوقات الحلوة. لما تحس أن حياتك ما بقاش ليها طعم ولا لون من غير ناس كانوا دايما جنبك. لو كل ده حصل رصيد السعادة هيقل بس عمره ما هينفذ ابدا. رصيد السعادة هو الرصيد الوحيد اللي قابل للتجديد، وعلشان كده لو الدنيا جت عليك شوية استحملها وافتكرلها الأيام الحلوة اللي عيشتهالك، والمرة الجاية لما تزعل منها أنبش في قلبك بمنكاش على حلاوتها... وصدقني هتعدي!

   رصيد الحب:

  رصيد الحب هو الرصيد الوحيد اللي مش ممكن أي حاجة في الدنيا تعوضه. لما تبطل كل الحاجات الحلوة اللي أنت كنت بتعملها؛ لما روحك تبطل ترفرف، لما تفقد كلمات الحب معناها، لما تبطل تصدق كلامه الحلو اللي كنت زمان بتغمض عينيك من الفرحة وأنت بتسمعه، لما تقرأ رسايلكم القديمة وتشتاق لنفسك لما كنتم سوا، وترجع تفتكر أن كل ده كان وهم وأنت كنت عايش فيه ومصدق نفسك، لما يبطل قلبك يدق اعرف أن رصيد الحب قد نفذ تماما!

ملحوظة: هذا هو الرصيد الوحيد الذي يترك أثرا مؤلما في قلبك، فمهما حاولت نسيان حب مر في حياتك ستظل تلك الندبة في قلبك تذكرك به من حين لآخر.