تأثير الدراما وأثرها في المجتمع

بقلم : محمد دويدار

للأعمال الدرامية سواء كانت سينما أو تليفزيون أو إذاعة أو حتى كتابا بنقراه أو بوست فيسبوك تأثير خطير جدا ومن غير ما ناخد بالنا بيكون ليها دور مؤثر في اتخاذ قراراتنا المصيرية، لأن المعلومات اللي بنكتسبها من الدراما بتتخزن في عقولنا لفترات طويلة وفي الوقت المناسب بيتم استدعاؤها، يعني مثلا على سبيل المثال اعرف واحد كان جايب مجموع عالٍ جدا في الثانوية العامة يدخله كليات قمة لكنه كان مصمم يدخل كلية حقوق بدون سبب واضح واتضح فيما بعد ان عشقه لأحمد زكي في فيلم ضد الحكومة كان هو السبب الرئيسي في قراره ده، كمان تعالوا نفتكر احنا جيل الثمانينيات مين فينا ماكانش عايز يبقى بطل زي رأفت الهجان وكام واحد قرر يدخل حربيه عشان يبقى ظابط مخابرات زي عزيز الجبالي ومحسن ممتاز، يا راجل ده فيه واحد من كام سنة أتمسك مخدرات ولما حكى قصته اتضح إن بداية تفكيره في السكة دي كان تأثره بزينهم (أحمد زكي في فيلم الإمبراطور)، طب مين محبش مهنة الأرابيسك وأتمنى يبقى شهم وجدع وابن بلد زي حسن النعماني (صلاح السعدني في مسلسل أرابيسك)، ليا صديق بعد فيلم همام في أمستردام اخد همام قدوة وفضل يحاول لحد ما فعلا قدر يعيش وينجح في هولندا، كتير جالهم فوبيا من ركوب السُفن والمراكب بعد فيلم تايتنيك وكتير مانزلوش البحر تاني بعد ما شافوا فيلم الفك المفترس، واحد صاحبي بيقسملي إنه كل يوم جمعة وقت الصلاة بيحس انه خايف ومقبوض جدا لدرجه انه راح لطبيب نفسي واكتشف في النهاية ان في وقت صلاة الجمعة من تلاتين سنة كان بيتذاع برنامج اذاعي مرعب اسمه من الجاني وده اللي عمله حالة الخوف الرهيبة دي، باتمان وسوبرمان وكام طفل مات في محاوله تقليدهم، بكار وقد إيه حبينا النوبة وشعبها من شخصيه كارتونية، ماتكلمتش كمان عن تأثير كتب بعينها في صناعة قرارات وشخصيات بعينها برضة زي كتاب الأمير لميكافيللي اللي أكاد أجزم انه مرجع لأي حاكم معاصر وكتاب مزرعة الحيوانات لجورج أوزويل اللي بيعتبر المحرك الرئيسي لكتير من المعارضين والأمثلة كتير جدا.. صحيح مش لازم كل الداتا اللى بنستقبلها تكون إيجابية ومش لازم كل القرارات المبنية عالداتا دي تكون سليمة لكن في النهاية هي مؤثرة وبشدة والعلاقة ما بينهم مؤكدة مهما حاول البعض انه ينفيها أو يقلل من تأثيرها.

أنا بقول الكلام ده عشان أوصل في النهاية أن البطل لما بيكون قدوة وناجح ودوره فعال ومؤثر ده في حد ذاته ممكن يخلق جيلة كاملة عنده إصرار على النجاح والعكس صحيح البطل لو منهزم ومدمن وسلبي ومغلوب على أمره ممكن ده يخلق جيل بنفس الصفات دي.. وبالمثل البطلة لو كانت كيوت مطيعة بتحب جوزها وبتغسله رجله لما ييجي من الشغل زي أمينة مع سي السيد مثلا مثلا يعني ده هيخلي الحياة بييس والبيوت مستقرة والدنيا وردي والعكس برضة صحيح يعني لو البطلة اتحولت لست مفترية نكدية بتعذب الرجالة وبتتباهى بالحياة وحدانية من غير راجل والموضة بقت الأغاني التحريضية على الطلاق زي ما هو سايد اليومين دول واصبح شعار المرحلة للستات هو استرونج اندبندنت وومان ده بدوره هيطلعلنا جيل ابن ستين في تسعين والدنيا هتبقى سواد اكتر ما هيه الحقيقة!

أنا عن نفسي هحاول انتقي مواضيعي حتى لو كانت على سبيل التسلية والضحك والهزار لأني مش عايز أتحمل وزر ولا ذنب أي حد يتأثر سلبيا بكتاباتي واسأل ربنا اني أكون مؤثر تأثير ايجابي واني اكون سببا في فرحة أو ضحكة أو ابتسامة تترسم على وشوشكم وتدخل قلوبكم ويا رب ابعد عني دايما وأبدا اني أكون سبب في ضلال أي حد بقصد أو بدون قصد.

{اللهم اني أعوذ بك أن أضِل أو أضَل}