لي في القول موال

بقلم : عادل عبد المحسن

قالوا عن الموال له أصل وفي الكلام له معنى، قلت أنا سوهاجي وناسها كلامهم أصول ومعنى.. يحكي ناسها عن حياتهم وفي الحياة تجارب ومعنى، لا تقولي "بحري وقبلي ــ ولا شرقي وغربي"، ما في الدنيا ناس لها أصل ومعنى غيرهم أولاد قبلي.

واسأل عن جدي "ريان" كان لقبوه بين الناس بالشيخ الأجل من هيبته وجلاله، مع شيخ العرب همام تحالف وصد الأعادي، وقال ولا مملوك يدخل بلادي، لا في الصعيد الجواني ولا البراني، وما قعد جنب "الفرن وجبان".. ولا تنسى المراغي وحكاياته في قول الحق ومن غيره يصطفى أصل الكلام، فرفض مجاراة الأعادي وقال عن الحرب بين اتنين أندال: حربكم ليكم وعليكم ما لنا فيها "ناقة ولا جمال".

سألوني عن الموال واش أنت تعرف عنه، قلت والله لي فيه من القول باع طويل وزاد من تعاملي مع أولاد الأفاعي فخلاني أقول في البلد موال، ولما أطلع بره يزيد في القول موالي.

قلت إمبارح وهاقول تاني، لا تعامل صغير ولا حقير ينهش في تيابك، ويقل مقامك وخليك مع الأكابر يحافظوا عليك وعلى مقامك، اوعى تنسى يا بلدياتي الحياة قصيرة، وزي ما قالوا السيرة في الزمن باقية وأطول من العمر مفيش كلام.

خليك ثابت على حجر جدك، فالناس في الحياة أساس، وربنا جعل الأحجار في الجبال أساس وفي الأرض أوتاد يا ولد خليك في الحياة وتد، لا تهتز من تصرف حقير ولا أوباش، وخليك على الأساس ثابت لا تفرط يوم في الأصول، وخليك ثابت.

لسه عاوزين تسألوني عن الموال إياكم نسيتم الضوي وأبو حسين، وإننا للمواويل أرباب وأصول وأنساب.. والا ما قول سوهاج بلد المواويل.