كله بيعدي !!
بقلم : لبني المصري
ارجع بالزمن لورا....ارجع لأصعب وقت عدي عليك في حياتك....رجعت؟؟....افتكرت؟؟...كان عندك امتحان ثانوية عامة و مش مذاكر.....ولا كنتي خايفة تجيبي ملحق يوم النتيجة...كنت مش عايز تبعد عن اهلك و صحابك و تسافر و تتغرب....ولا كنتي خايفة من وجع فراق حد عزيز عليكي.....كانت لحظة فقدانك لصاحبك أو حد من أهلك....ولا كانت لحظة ما انفصلتي عن جوزك.....لحظات صعبة مش كدة....و ممكن تكون لسة هتعدي باللي اصعب منها....بس ثانية كدة....انت قلت ايه؟؟ "هتعدي"....يعني مش هتفضل عندها مش كدة....يعني الزمن مش هيقف....يعني الحياة هتمشي عادي صح..... من هنا بقي ابتدت الحكاية....
حكاية ان حياتنا مش بتقف علي حد....ولا علي موقف مهما كان الموقف ده صعب علينا....حكاية ان ربنا خلقنا بننسي و بنعدي عشان نقدر نكمل و مفيش حاجة توقف حياتنا مهما كانت.....حكاية ان زي ما الوقت الحلو بيعدي بسرعة....الوقت المر كمان بيعدي حتي لو مكنش بسرعة لكن المهم انه بيعدي و بيجي غيره......حكاية "هي السنة دي عدت بسرعة كدة ليه" اللي بنقولها مع بداية كل سنة جديدة مع إننا عمرنا ما اقتنعنا بانها بتعدي بسرعة و احنا جواها....حكاية ان العمر بيجري و انه مش هيستنانا مهما كننا مش قادرين نقوم و نلحقه.....
كان فيه مقولة كدة للحسن البصري بتقول إننا كبشر لسنا إلا عدد من الأيام....و إن كل ما يوم بيعدي....كل ما جزء مننا بيعدي معاه....
المقولة دي خليتتي ابص للوقت بنظرة تانية....نظرة بتقدر قيمته....و لكنها مش بتديله اكبر من حجمه..بمعني ؛ انك تقدر قيمة كل دقيقة و متخليش حياتك تضيع من غير ما تنتفع بيها....لكن في نفس الوقت متديش كل لحظة أكبر من حجمها.....متديش لللحظة الحلوة حجم كبير اوي في حياتك ﻷنها أما هتعدي هتزعل عليها.....ولا تدي لللحظة الوحشة حجم كبير في حياتك ﻷنك طول ما أنت فيها هتحس ان حياتك وقفت و انها عمرها ما هترجع تتحسن من تاني....
خليك عايش بمبدأ "كله بيعدي"....سواء حلو سواء وحش بيعدي......و بعد أما بيعدي بتنسي انك كنت فاكر في يوم من الايام انه مش هيعدي....
عشان كدة فكر نفسك ديما بحقيقة الوقت....و حقيقتك انك مش أكتر من عدد من الأيام....فمتخليش جزء منك يعدي بدون فايدة....ولا تخلي جزء منك يتحكم فيك....و متسمحش انه يجي اليوم اللي تقول فيه "العمر جري ولا لمحته"....قوم و الحقه قبل ما يمشي و يسيبك!!
جوجل نيوز
