فئات مستفيدة من انقطاع الكهرباء وكوميديا الظلام تسود الفيس بوك وهاشتاج عاوزين كهربا يشعل فيس بوك وتويتر

تغطية- سماح زيدان

منتجات الظلام تغزو الأسواق المصرية والصين وحيتان الاستيراد هم المستفيدون

 

 

 لم تخل الصحف المصرية طوال الأسابيع الماضية من المواضيع المرتبطة بانقطاع الكهرباء..منها ما كتب تحت عنوان "بيزنس الضلمة" ومنها ما كتب تحت عنوان مصر منورة بأهلها .. ومنها كارثة إجراء عملية جراحية علي أضواء كشافات الهاتف المحمول. 

 

و قررنا نحن أن نرصد الفئات المستفيدة من انقطاع الكهرباء من خلال حكايات يرويها الناس في الشارع  وكيف يتعاملون مع هذا الواقع المظلم

؛ فيقول الحاج محمد صاحب مخبز عيش بأحد الأحياء الشعبية أنه اضطر لشراء مولد كهرباء مرتفع الثمن لأن أغلب ساعات عمل المخبز صباحا يكون التيار الكهربائي قد انقطع وهذا يؤثر علي انتاج الفرن يوميا من العيش " والناس مذنبهاش حاجة تقعد في الضلمة وكمان متاكلش!" هكذا تحدث الحاج محمد مكملا حديثه أن المستفيد من قطع الكهرباء هم : الصين اللي بتصنع والمستوردين   لمولدات الكهرباء  ..

 

أما الحاجة فاطمة فتري أن المستفيد من قطع التيار الكهربائي هم فنيين تصليح الأجهزة الكهربائية لأن انقطاع التيار ومجيئه المفاجئ أدي إلي تلف الثلاجة وقامت بتصليحها مقابل خمسمائة جنيه..

 

أما بائعوا الشمع ولمبات الجاز التي كانت تستخدم قديما فقالوا أن هذه التجارة القديمة راجت مرة اخري بسبب الانقطاع المستمر للكهرباء.

أما مصطفي بائع كشافات بميدان رمسيس فيقول :" الكشافات كلها مضروبة  تتشحن مرتين تلاتة وتبوظ والزبون بيضطر ييجي يشتري تاني والصين هي المستفيدة والمستوردين الكبار يلاقوا الكشافات بتتباع بكميات كبيرة يغلوا سعرها والزباين مضطرين يشتروها حتي لو بتبوظ وحتي لو غالية .. في لعبه بتتعمل لصالح الناس الكبيرة ديه"..

 

 أما رضا أحد باعة الملابس بميدان رمسيس يقول: "إحنا عاوزين نفهم مين اللي بيقطع النور..كانوا بيقولوا مرسي.. واهو مرسي وجماعته مشيوا , مش السيسي راجل كويس وراجل محترم وواقف معانا لمصلحة البلد ..عاوزين نعرف بقي مين اللي بيقطع النور النور بيقطع اكتر من 7 مرات  احنا عاوزين نعرف ايه اللي بيحصل في البلد ليه النور بيقطع كل ده عيالنا جالهم أمراض جلدية من الحر ومش عارفين نعمل ايه ابني الصغيرعنده سنة مبيتحملش الحر باجيب طبق مياه وأضعه فيه"

 

 

بيشوي حنا تاجر مولدات كهربائية يصف المولدات قائلا:المولدات الكهربائية أنواع منها الصيني ومنها الهوندا الألماني  ويتجه الغالبية العظمي من الناس  للصيني لأنه الأرخص سعرا وعلي حسب الاحتياج والأحمال فاحتياجات الشقة مختلفة عن احتياجات وأحمال بيت كامل من الطاقة الكهربائية والسحب الأغلب حاليا لأفران العيش ومصانع الملابس بينما الشركات الكبري والفنادق تلجأ إلي المولدات الضخمة التي تباع بالدولار حينما يوجد ضغط علينا في شراء المولدات ترتفع اسعارها بشكل كبير ففي فترة من الفترات كان المولد ب 700 جنيه ووصل سعره بسبب ضغط الطلب ل 2000 و3000 جنيه

 

 أما أحمد عامل بأحد المصانع يروي معاناته يوميا مع انقطاع الكهرباء قائلا: النور بيقطع وانا نايم كل يوم باضطر اخرج انام علي السلم ..انا تعبان طول النهار في الشغل هاعمل ايه ..لازم انام.

 

ومن جانب آخر عبر مستخدمي الفيس بوك عبر "هاشتاج عايزين كهربا" عن رأيهم في الأزمة فمنهم من عبر بغضب   وقدموا  العديد من المقترحات للتعبير عن هذا الغضب مثل التظاهر أمام وزارة " قطع الكهرباء" كما أطلقوا عليها..ودعوات لعدم دفع فواتير الكهرباء..

 

 

 فكتب أحمد مدحت: من يومين، كلمتني واحدة ست، أثناء شيفت التدريب بتاعي في دليل المصرية للاتصالات "140 دليل".. عاوزه رقم وزير الكهربا، وبتطلبها بانفعال شديد.. حاولت أفهمها بهدوء إن رقم مكتب الوزير مش بيتسجل في الدليل، مفيش فايدة طبعا.. وهنا بقى ابتدت تدخل في حالة انهيار هيستيري، وبكاء عنيف، باﻹضافة للعصبية..

ببساطة، الست دي أمها عندها سرطان، وعايشة على جهاز تنفس بيشتغل بالكهربا، والكهربا قاطعة عندها بقالها 4 ساعات متواصلة، وبالتالي، وهي بتكلمني كانت أمها بتحتضر تقريبا، بسبب غياب الكهربا..

فضلت تبكي وتصرخ وهي بتترجاني أتصرف بأي شكل، وتشتكي من إنها في الدور ال14 لوحدها، معهاش حد، ومش عارفة تتصرف إزاي.. اديتها رقم كذا مستشفى كبير، وقلتلها تتصل بيهم وتطلب عربية إسعاف فورا، وقفلت السكة وأنا حاسس بخنقة الدنيا كلها بتحاوط رقبتي.

كانت أول مرة أحس فعلا دعاء الرسول محمد "عليه الصلاة والسلام": اللهم أشكو إليك ضعف قوتي، وقلة حيلتي..

انقطاع التيار الكهربي بالشكل ده، بدون أي احترام ﻵدميتنا ولو في إجراءات تنظيم انقطاعه حتى، بيحسسنا كلنا، يوم بعد يوم، أد إيه إحنا رخاص.. حتى التعذيب لا يضاهي إحساس كل واحد فينا، وهو قاعد مخنوق في عز الحر، بلا حول ولا قوة، ذليل تحت رحمة الدولة.. هنا بقى الدولة بتقدر تتحكم في تفاصيل حياتك بمعنى الكلمة، أدقها.. بتحددلك امتى تاكل وتشرب وتنام وتقرا.. حتى بتحدد مواعيد العلاقة الزوجية مع مراتك!

انقطاع الكهربا مش هيقوم ثورة.. انقطاع الكهربا بالشكل ده هيطمس ما تبقى من آدميتنا بالكامل، وساعتها ممكن تكون "الثورة" شيء كيوت جدا مقارنة باللي هنشوفه من جموع الممسوخين.

إياكم من غضبة من هانت نفوسهم على أنفسهم ‫#‏عايزين_كهربا

 

وكتبت شيماء سامي علي صفحتها: يعنى ايه يبقى فى نقص فى الغاز ينتج عنه دخول البلد بأكملها فى حالة من الظلام الدامس أو توقف مصانع كبرى تعمل ماكيناتها بالغاز وفى نفس الوقت يستمر تصدير الغاز لدولة الصهاينه !!!!!!!
يعنى ايه يبقى الكهرباء مبتقطعش فى اسرائيل دقيقة واحده دولة إحتلال وفى حالة حرب وبتستعمل غازنا والحكومه عندنا بتكذب وتقول أسباب صغيره غير السبب الرئيسى !!!!

يعنى حكومه خاينه وفاسده وفاشله

‫#‏عايزين_كهربا

 

وعبر البعض الآخر عن تلك الأزمة بشكل كوميدي فكتب  ابراهيم داوود أحد مستخدمي الفيس بوك علي صفحته : " يعني رفعتوا الدعم ومش عارفين ترفعوا سكينة الكهربا تنور للناس شوية  " ‫#‏عايزين_كهربا

 

 

وكتب احمد البلتاجي علي صفحته:

 

ربنا قادر يخلي اللي عمل موبايل بكشاف يعمل واحد احدث بتكييف !!
‫#‏عايزين_كهربا

 

وكتب محمد مجدي:

#‏على_هامش_ازمة_الكهرباء . . 
بيقولك الواد اللى كان بياخد 20 جنيه و يشد سكينة ‫الكهربا و يقطعها ايام ‫ مرسىكان ‫ عقد_مؤقت  بس  ‏السيسى عينة و ‫ اتثبت فى الشغلانة الحمد لله   ‫#‏عايزين_كهربا