كل اللي يجي في الريش بقشيش

بقلم : شهد راشد

"كل اللي يجي في الريش بقشيش" مقوله معروفه جدا بنقولها مثلا لما العربيه تتخبط بمعنى ان مش مهم اللي حصل في العربيه دا بقشيش اننا بصحتنا و كويسين .. طب ليه مش بنعمل نفس الحاجه مع باقي المشاكل اللي بنقابلها !!

 

مثلا اتخنقتي مع صحابك او حبيبتك سابتك او خطيبك فركش معاكي او اطلقتي او سيبتي شغلك او فشلتي في مشروعك .. ليه بقا مش بنقول ان كل اللي يجي في الريش بقشيش .. ما طول ما انت لسا ليك عمر و عندك صحه كل المشاكل اللي عدت دي جات في الريش مش أكتر ف نعتبرها بقشيش ...

 

الحياه صعبه و يوم حلو و يوم مر .. و كلنا عارفين دا و متأكدين منه لأن ربنا مش جايبنا يعذبنا أكيد !! و بما أن الحياه فيها صعوبه اللي هي المشاكل و المصايب اللي بتعدي بينا فيها الحلو بتاع ان لينا في العمر بقيه و كمان عندنا صحه و الحمدلله ^_^ ف نبوس ادينا وش و ضهر و نكمل حياتنا زي ما احنا عايزينها ...

 

هو الطفل اول ما بدأ يمشي قام و جري ولا واحده واحده مشي و وقع و قام و اتسند و مشي تاني .. و تاتا تاتا وصل للمكان اللي هو عايزه !! طب ليه بقا عايز نفسك اول ما تصاحب ولا تتخطب ولا تتجوز ولا تشتغل ولا تتعلم تجري الدنيا معاك زي السكينه في الحلاوه و متقبلش ولا مشكله .. لازم تقع و تقوم و تكمل و لو وقفت في النص تبقى غلطان و خسران كمان و متستهلش الحياه :)

 

أوعى تفقد الأمل و أوعى تكتأب و أوعى تتمنى تموت .. دا الميتين بيتمنوا يوم كمان يعيشوا فيه بحلوه و مره و فرحه و حزنه !! أحمد ربنا و كمل طريقك .. وقعت قوم أقف و لو أتعورت في يوم هتخف .. المهم انك لسا ليك عمر و تقدر تغير الحاضر و ترسم المستقبل و كمان عندك صحه تغير بيها اللي مضايقك و ترسم بيها اللي يسعدك ^_^

 

أرسم بسمه على وشك و أتحدى الأحباط و الزعل .. عيش عمرك و أتمتع بصحتك و حقق احلامك و لا تبكي على اللبن المسكوب لأن كل اللي يجي في الريش بقشيش .. و هيجي يوم و تقول ياريتني عيشت شويه كمان بحلوهم و مرهم و فرحهم و حزنهم ؛)