إيمان أيوب: لم أبتعد عن الساحه.. وأرفض التواجد لمجرد الإنتشار
12:41 ص - الجمعة 24 أكتوبر 2014
إيمان أيوب: لم أبتعد عن الساحه.. وأرفض التواجد لمجرد الإنتشار
حوار: رينال عويضة
-"حسن الفللي" وراء عودتي للدراما
- أنا عايشه وسط عيله غرقانه في الفن ، وإبنتي "عائشه" كل حياتي
- أحلم بالوقوف أمام " عادل إمام و" ومحمود عبد العزيز"وتقديم شخصيه "جميله بوحريد"
فنانه شابه جميله من أصل صعيدي من ناحية الأب وتركي لبناني من ناحيه الأم إتسمت ملامحها بالبراءه وأدوارها القليله المؤثره ،خريجه معهد الفنون المسرحيه قسم اخراج وتمثيل كانت بدايتها علي خشبة المسرح أمام نجوم كبار مثل الفنان سمير غانم والفنانه سناء يونس وكانت إنطلاقتها الحقيقيه من مسلسل " حياة الجوهري" أمام الفنانه يسرا ومنها توالت الأعمال والتي كان أهمها
" عيش أيامك " امام الفنان نور الشريف ،وقدمت للسينما فيلم " العشق والدم" أمام الفنانه شيريهان
عنها وعن أعمالها كان لنا هذا اللقاء مع الفنانه إيمان أيوب .
ممكن تشرحيلنا أسباب غيابك عن الساحه الفنيه الفتره اللي فاتت ؟
المشكله والازمه اللي حصلت الفتره اللي فاتت هيا ظروف البلد و كان اغلب الممثلين مش شغالين ودى ازمه موش انا اللي بتعرضلها لوحدى يمكن كان اللي موجود مجموعه معينه وأنا بأمل ان شاء الله في الفتره الجايه ان يكون في تبنى من الدوله لاعمال جيده واعمال وطنيه وملاحم عربية تأثر فينا ونتأثر بيها ترجعلنا أخلاقيتنا الجميله بتاعه زمان، وأنا مكنتش بعيدة ولا حاجه أنا بالفعل كنت مشتركه في مسرحيه اسمها "بحلم يامصر" بطوله الفنان" نور الشريف" مع مجموعه من نجوم المسرح القومى واخراج الاستاذ" عصام السيد" بس للاسف لما الاستاذ نور اعتذر أنا اعتذرت وانسحبت من العمل لانى بصراحه كنت مشتاقه للشغل معاه بعد مسلسل " عيش ايامك" و كان نفسي الاستاذ نور يكون موجود وإن شاء الله العمل يطلع في المسرح القومي للنور قريب .
أفهم من كده إنك ضد التواجد أو الأنتشار؟
مبحبش انى اكون موجوده لمجرد الانتشار واعمل حاجات مكرره او اكرر فيها نفسي او تكون حاجه مش ملائمه انا دايما الحمد لله كنت بطله كل اعمالي وفي نفس الوقت رصيدى كبير في الدراما ولسه كان بيتم تكريمى في مهرجان يوسف شاهين الاخير عن فيلم " واحده 25 " كان بطولتي مع جمال عبد الناصر وأشرف فؤاد وإنتاج "مجدى أبو سنه" وتأليف" أنيس بوجواري "وهوه مؤلف ليبي عبقري وإخراج" رامي نصيف"
انا بمشي بخطى بطيئه صحيح بس ثابته وبدعى ربنا انه يوفقنى في الفتره الجايه واكون عند حسن ظن جمهوري .
أيه أخر أخبار فيلم " جنة أبليس" بطولة الفنانه هند صبري واللي المفروض تكونى مشاركه فيه ؟
للأسف احنا المفروض كنا نبدا بس حصل خلاف بين المنتج والمخرج "كريم نيقولا "والمنتج بيبتدي دلوقتى يحضر سيناريو تانى.
وقفتي قدام فنانين كبار زي " سمير غانم" و" سناء يونس" و" نور الشريف" و "يسرا" و"شيريهان" ، تقدري تشرحيلنا خلاصة تجربتك معاهم؟
عاوزه أقولك إن الناس دى مش هتتعوض والله وكل واحد فيهم علي حدي مدرسه لوحده ، للأسف أحنا في مصر معندناش ثقافه " صناعة النجم "معندناش ان الفنان كل مابيكبر بيقي زى حته الالماظه او الجوهره اللي المفروض تثقل للاسف كل ماحد بيكبر في السن بيشوفوا مين يعمل احلال بداله ومبيفكروش يستغلوه كنجم كبير زى ماعملوا بره مع انطونى كوين مثلا واللي مازالوا حتى الان بيقدموا افلام كبيره وعالميه وبتمتعنا جدا وحته التسليم والاستلام احنا مفتقدينها لان المفروض الفنان او النجم يبقي دايما عنده الحته دى لان مهم اننا نقدر نكمل الرساله مع بعض صغير وكبير واكبر .
أيه هي أكتر الصعوبات اللي واجهتك خلال مشوارك الفني ؟
أكتر الصعوبات اللي قابلتنى هي النفوس الضعيفه يمكن احنا كفانينين بيكون في بينا دايما تصارع مع اننا في وسط لو حبينا بعض ومدينا ايدينا لبعض كلنا هنظهر وكلنا هنور لكن دايما بيكون في كل مجال احقاد ودسائس مع العلم ان في ناس كتيره كويسه لكن لو أحنا غيرنا اللي ف أنفسنا وحبينا بعض هنلاقي الدنيا جميله اوى وكلنا هنشتغل لان محدش بياخد رزق حد.
أوصفيلنا علاقتك بالمسرح؟
المسرح كان اول خطواتى واول حاجه اشتغلت فيها كانت مع استاذ الكبير سمير غانم في مسرحية " دوري مى فاصوليا " مع استاذي الكبير "محمود ابو جليله" الله يرحمه وهوا اللي دربنى واشتغلت مع الفنانه الكبيره سناء يونس واشتغلت مسرحيات كوميدى كمان، أنا من وجهه نظري إن المسرح أصعب وممثل المسرح أقوي ممثل.
أيهم أقرب لـ" أيمان يونس " المسرح، السينما، التلفزيون ؟
انا بحب السينما لان احساسها ليه طعم خاص انتى بتقدر تعبري ممكن بالنظره او بإاحساسك الداخلي فبتظهر ع شاشه كبيره اوى بيرسم بورتريه متكامل مليان مشاعر يحس بيه المشاهد
اما المسرح ده عباره عن "لغه جسد" وبتقدري انك تاخدى استهجان او استحسان من الجمهور ف ساعتها
حتى الاذاعه والفيديو بستمتع بيهم أهم حاجه يكون عندك إجاده للدور وتحبي الشخصيه اللي انتى بتقدميها.
أخر أفلام شفتيها في السينما ، وعجبتك؟
شفت "الفيل الازرق" وشفت" صنع ف مصر" و"جوازه ميري" بصراحه إحنا عندنا مجموعه من نجوم الشباب الواعى اللي بيقدر يقدم حاجه متميزه بعيدا عن افلام الرقص والابتذال والاسفاف اللي ظهرت مؤخرا ،و في نجوم كتير واعيين ومثقفين وفاهمين بينقوا ازاى اعمالهم .
أيه هي الأدوار اللي نفسك تقدميها ؟
في المسرح نفسي أقدم مسرحيات إستعراضيه زى شيريهان السينما نفسي أاقدم حاجات وطنيه لان إحنا في إحتياج شديد إليها زى" جميله بوحريد "
الاذاعه مسلسلات زى الف ليليه وليله بتاعه زوزو نبيل الدراما نفسي اقدم حلقات اجتماعيه توصل للجمهور.
من هو الفنان الحلم بالنسبه لـ إيمان أيوب ونفسها تقف قدامه ؟
من النجوم الكبار طبعا الزعيم عادل إمام ،و الفنان محمود عبد العزيز ومن النجوم الشباب أحمد حلمي وكريم عبد العزيز وأحمد السقا .
بعيدا عن الفن حدثينا عن حياتك الخاصه؟
حياتي كلها هي بنوتي الوحيده "عائشه" وبس .
طب في بوادر فنية ليها ؟
أكيد طبعا إنتي ناسيه إن والدها المخرج تامر سامي و والده المخرج محمد سامي وأخوه المخرج ياسر سامي ، يعنى إحنا عيله غرقانه في الفن .
أكتر الهوايات اللي بتحبي تمارسيها ؟
اليوجا والقرايه وبحب أسمع مزيكا كتير .
وإخيراً ، أيه هي أخر أخبارك الفنية؟
مضيت مسلسل " حسن الفللي " من إنتاج "صوت القاهره" لـ "سامى محمد علي "
وبحضر لبرنامج اجتماعي بيناقش سلبيات المجتمع ودورنا وجهودنا في حفاظنا علي بلدنا ومجتمعنا وده هيكون من انتاج " قناة النهار" .
تابع بوابة روزا اليوسف علي
جوجل نيوز
