محمد حسن يكتب : أم كلثوم في بورتو سخنة (الجزء الثاني)
بعد أن انتهت أُم كُلُثُوم من الحفلة عادت الي منزلها استرسلت في نومٍ عميق ، ثم استيقظت في اليوم التالي مبكرا كعادتها ، دقائق قليلة وحضر احمد رامي والح عليها مع الخادمة ان تقص عليهم ما رأته في ذلك الحلم المُزعج بالأمس .
في البداية كانت مترددة لكنها وافقت امام الحاح رامي الشديد .
لم تكن تدري من اين تبدأ بالأخص ان كثيرا من التفاصيل لاتفهمها وكثيرا من الاحداث غير مترابط
ربما يشبه أسطورة أو حكاية من حكايات الخيال المثيرة ؟!
لكنّها تشجعت أخيرا وبدأت الحكاية :
صحيت علي صوت بيقول : يالا عشان تجهزي للسفر وحفلة بورتو سخنة ؟!
مافهمتش يعني ايه ، انا عمري ما أحييت حفلة في مكان بالاسم دا قبل كده ؟!
بعد كده نزلت ركبت عربية غريبة والسواق بيقولي يا كوكب ؟!
مشيت في شوارع فيها شبه لحد بعيد من شوارع القاهرة لكن مش هي ، زحمة مرعبة ومكنتش قادرة اتصور العربيات دي كلها ازاي تمشي في شارع واحد من غير ما يصطدموا ببعض ؟
شئ كأنه سحر !!!
بعد كده عيني وقعت علي حاجة غريبة جدا ؟
مقهي اسمه أم كلثوم علي اسمي وطالع منه الحان غريبة واصوات مش مفهومة
مهما اجتهدت اني اوصفلك مش هقدر .
أخيرا وصلت المكان دا اللي اسمه بورتو سخنة ، مكان عظيم يا رامي وتحس برضه انه مش في مصر !
الناس في المكان دا غير اللي في اول الحلم خالص !
مكان هادي وجميل بس لاقيت في حاجة مدهشة اسمها (التلفريك) حاجة كده زي سفينة الفضاء ليها باب تركبها وبعدين تطلع بيك من الارض علي ارتفاع كبير جدا
وتشوف الجبال .....حقيقي شئ بديع
منظمين الحفل كانوا مُصريين اخد جولة ، لكن انا رفضت كنت خايفة من مجرد الفكرة
بعد كده حبيت اروح اشوف مكان البروفة دخلوني studio وقالولي البروفات بتتعمل هنا
اتفاجئت ان عبد الوهاب موجود
مجرد دخولي للمكان لاقيت عبد الوهاب بيضرب ولد علي وشه بالقلم وبيقول :
_طلعوا اللص دا بره ، بيسرق الألحان !
الولد قعد يبكي ويقوله : انا ما قربتش لالحان حضرتك
_ وانا هستني لما تقرب لالحاني اطلع بره وانا همنع اي مطرب يتعامل معاك....
سألتهم الولد دا اسمه ايه : قالوا ملحن شاب اسمه قمر مصطفي
ايه مشكلته ؟
_بينحت الالحان
_بينحت ؟!
_حاجة زي السرقة كده بس مش بالظبط
حاولت اهدي الولد شوية كان غضبان وثاير وقالي : انتي لازم تتبرعي لصندوق تحيا مصر !
استغربت دا انا لسه من اسبوع متبرعة بأجر حفلة فرنسا للمجهود الحربي !
سيبته ورحت اسلّم علي عبد الوهاب ، اثناء ما بسلّم عليه فوجئت بشخص بيقولنا ابتسموا ، وبيصورنا بحاجة شكل الكاميرا وقالنا استأذنكوا الصورة هتنزل علي instagram ترويج ودعاية للحفلة ، اتهيألي انها مجلة فنية جديدة
قولتله : مفيش مانع
عموما خلصت البروفة جالي شخص من منظمين الحفلة قالي : في حوار صحفي من 9 _ 9:30 مساءا اخر حاجه وبعد كده حضرتك free
قولتله : وهو كذلك .
بالفعل وصل الصحفي في ميعاده ، وسألني اسئلة مافهمتهاش واللي مفكرني بيها انها غريبة زي:
_ ايه سر النجاح المُذهل لأغنية انت عمري لدرجة انها وصلت ما يقارب ربع مليون مستمع علي sound cloud
ومليون مشاهد علي You tube ؟؟؟
_اه سر قرارك المفاجئ بالبعد عن Facebook و Twitter ؟؟
ما اعرفتش ارد اقول ايه تحديدا وكلمات غريبة ومش مفهومة
اعتذرتله اني مش هقدر اكمل لاني مرهقة ومشيت .
حتي يوم الحفلة المسرح مش هو المسرح ، ولا الجمهور هو الجمهور
كنت قلقانة من شكلهم ، احساسي ان دا مش جمهوري بغض النظر عن لبسهم
حتي التصقيف غير التصقيف ، السعادة اللي علي وشهم مختلفة مش هي السعادة اللي علي الوشوش اللي اعرفها .....تفاصيل كتير يمكن نسيتها........
كويس اني صحيت من النوم أنا مابحبش أغني في مكان مش مرتاحه فيه
بس كل اما افتكر الولد اللي عبد الوهاب ضربه بالقلم اضحك
احمد رامي : ياااااااااااااااااه يا سومة دي حكاية تنفع فيلم جميل حقيقي تخيلي ويبقي اسمه (أم كلثوم في بورتو سخنة) هيكسر الدنيا
يتبادلان الابتسامة ثم يبدأ رامي في عرض كلمات جديدة علي كوكب الشرق
...............انتهت...........
جوجل نيوز
