عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

شهد راشد تكتب:"عشانك يا بلدي"

شهد راشد تكتب:"عشانك يا بلدي"
شهد راشد تكتب:"عشانك يا بلدي"

بنت بتلعب عود و مع المدرسه راحت تعزف للمسنين في دار مسنين في الشرقيه. و هي هناك و بعد ما خلصت عزف؛ شافت أم فتحي و قرروا يروحوا البيت عند أم فتحي؛ عشان تعرفها على ولادها اللي في سنها. و بعد ما أستأذنت المشرفين راحت البيت اللي قدام دار المسنين. و سألت أم فتحي يلا نطلع البيت و أم فتحي قالت لها أن هي كدا جوا البيت-3 متر في 3 متر-؛ سألتها ولادك السبعه بيناموا أزاي و قالت لها بيناموا بالتناوب-يعني 3 بيناموا و 4 يستانوا لحد ما يخلصوا نوم و بعدين يبدلوا-؛ البنت حاولت تلاقي حاجه تقعد عليها مالقتش ف أم فتحي جابتلها جلابيه و فراشتها لها في الأرض؛ و بعد ما قعدت؛ سألتها انتم معندكوش تكيف؟ ف أم فتحي قالت لها لاء؛ ف البنت قالت طب مروحه ف أم فتحي بردو قالت لاء؛ و سألتها أم فتحي و عندك ايه كمان غير التكيف و المروحه؟ ف البنت قعدت تحكيلها على العربيه و الشقه و التكيف و اللعب و المدرسه و كل حاجه عندها؛ و بعدين أم فتحي قالت لها أنتي ناقص حاجه عندك و مقولتيهاش!؛ و البنت أستغربت أن أيه اللي ممكن يكون فاضل ماقلتهوش و نسيته! ف أم فتحي قالت لها بصي فوق و انتي هتعرفي! و طلع اللي عندها و مقالتهوش هو السقف!!
 و هنا البنوته مفكرتش في حر الصيف ولا سقعه و مطره الشتا؛ و فكرت في حاجه واحده بس و هي أن المدرسه بتعلمهم غلط و أضحك عليها! عشان طول عمرنا بنتعلم نرسم البيت مربع و مربعات صغيره عشان الشبابيك و مستطيل عشان الباب و مثلث فوق عشان السقف؛ بس البنت ما شفتش غير المربع الكبير و دا مش بيت أم فتحي بس دي كل البيوت كدا؛ في بيوت معندهاش سقف!! و بدأت تعمل ثوره ضد المدرسه عشان كل اللي بتتعلموا دا غلط و موجود بس في الكتب؛ و قررت أنها مش هتروح المدرسه غير لما تزور أم فتحي كل أسبوع ولا أسبوعين. و فعلاً البنت بقيت بتزور أم فتحي و تلعب مع ولادها؛ بالنسبه لها دا لعب بس مع الوقت أكتشفت أن دي تنميه مستدامه؛ لأنها كانت بتعلمهم أي حاجه هي تعرفها من كتابه و قراءه و رسم و فن؛ و عمرها ما ساعدتهم بفلوس ولا لبس ولا أكل. و في يوم أم فتحي ماتت؛ و سابت للبنت دي ورقه مكتوب فيها: "أنا عمري ما طلبت منك فلوس: بس الحاجه اللي عايزاكي دليماً تعمليها أنك تيجي و تلعبي مع ولادي."-كان قصدها متجرحيش ولادي و تديهم فلوس و أكل و شرب و لبس؛ بس تعالي و تعملي معاهم ك أنسان.-
و الموضوع كبر مع البنت و مبقاش بس الشرقيه و أم فتحي؛ بس راحت المنيا مع باباها و شافت "أطفال المحاجر" و دي طلعت مهنتهم! و دي كانت كدبه كمان في حياتها من المدرسه بردو؛ عشان في المدرسه كانوا بيعلموها أنها لازم تكبر و تتخرج من الجامعه عشان تشتغل؛ و دول أطفال أقل من 10 سنين و بيشتغلوا ولا عمرهم أتخرجوا ولا هيتخرجوا!! و من ضمن الكدب بردو أنها أتعلمت في المدرسه أن الفقر بس فلوس و أكل و شرب و لبس؛ مع أن أم فتحي لما سابت لها الورقه ما كنتش عايزه فلوس بس كانت عايزاها تسأل على ولادها و تلعب معاهم!! و بعد أكتشاف كل الكدب دا؛ قررت البنت تتعلم بطريقتها بعد كدا؛ الكراسه و الكتاب للمدرسه و الجامعه؛ بس الحياه هي اللي فيها التعليم اللي بجد. و بدأت رحلتها مع التطوع و تنميه المجتمع.
 
و بعد سنين كتير؛ الفكره كبرت!! و بدل ما تفكر في المساعده بالأكل و الشرب و اللبس و الفلوس عشان دا مش هيغير الواقع! فكرت في سنه 2000 أنها تعمل حركه طلابيه على مستوى مصر و سميتها "عشانك يا بلدي" و كان الهدف وراها التنميه المستدامه في المناطق الفقيره في مصر. و الحلم كبر أكتر و في 2002 اتعمل أول فرع من فروع الحركه بداخل جامعه؛ كانت الجامعه الأمريكيه. و في 2003 بدأت في جامعه عين شمس؛ و في 2005 شهرت "عشانك يا بلدي" ك جمعيه للتنميه المستدامه في مصر؛ و كبرت لحد ما وصل فروعها ل 12 فرع في 12 جامعه مختلفه؛ و دا غير الفروع اللي في المحافظات المختلفه. و مشاريع الجامعيه بتغطي مصر كلها.
رغده الأبراشي .. خريجه الجامعه الأمريكيه و دكتوره في الجامعه الألمانية بالقاهره و مؤسسه حركه و جمعيه "عشانك يا بلدي" للتنميه المستدامه. هي دي البنت اللي كانت بتلعب العود و راحت الشرقيه و زارت بيت أم فتحي و راحت المنيا و شافت أطفال المحاجر؛ و فضلت تروح أماكن و تكتشف حاجات و أتعلمت أكبر درس في حياتها- أن المدرسه بتعلمنا غلط؛ و التعليم الحقيقي في الحياه.-
"عشانك يا بلدي" مهتمه بالتنميه الأقتصاديه و الأجتماعيه للقضاء على الفقر و تقدير الأنسانيه في مصر؛ و دا عن طريق القروض الصغيره؛ و التوظيف؛ و التعليم و التدريب. و في مشاريع في 10 محافظات في مصر.
و كل جامعه من ال12 جامعه؛ مسوؤله عن منطقه زي: الجامعه الأمريكيه في عين الصيره؛ و جامعه عين شمس في عزبه أبو قرن؛ و الجامعه الألمانيه في المطريه؛ و جامعه AAST في بولاق أبو العلا؛ و جامعه القاهره في زينهم؛ و جامعه الأسكندريه في الحرامين؛ و جامعه قناه السويس-الأسماعيليه في بهتيم؛ و جامعه بورسعيد في بورسعيد؛ و جامعه حلوان في بولاق أبو العلا؛ و جامعه أسيوط في المجاهدين؛ و جامعه MUST في بولاق أبو العلا؛ و جامعه الأزهر في الدويقه.
 
التغير اللي حصل بسبب "عشانك يا بلدي في مصر" خلال ال14 سنه بيتقاس بتخرج الناس من الفقر-أو تخطي الناس لخط الفقر؛ يعني الناس في المناطق اللي بتطور فيها "عشانك يا بلدي" كانوا عايشين على أقل من 2 دولار في اليوم؛ يعني أقل من 400 جنيه في الشهر (تحت خط الفقر). بس دلوقتي بيكسبوا 2000 أو 3000 في الشهر!! 
في 2013 بس؛ "عشانك يا بلدي" ساعدت 3000 شخص عن طريق التدريب و توفير فرص عمل و القروض الصغيره؛ عن طريق القروض الصغيره تم أفتتاح 732 مشروع صغير- في القاهره و الصعيد و أسكندريه و كفر الشيخ و البحيره-؛ في 1611 شخص تم تدريبهم؛ و 773 تم تعيينهم؛ و 105250 طفل في المدارس الأبتدائيه تمت توعيتهم عن التغذيه؛ و 2600 طالب ثانوي تم تدريبهم على التخطيط للوظائف. و دا معناه 1505 أسره أو 7525 شخص بيستمتعوا بالأجر الثابت و في رحلتهم للتخرج من الفقر. 
و عن طريق ال12 جامعه في مصر-1267 متطوع-؛ تم محو أميه 118 شخص و المساعده في تعليم 552 طفل و أفتتاح 58 مشروع صغير و تعيين 10 أشخاص و تعليم حرف و كمبيوتر ل58 شخص و الوصول ل840 عائله-شنط رمضان و معارض لبس و بطاطين) و 51 حمله توعيه في أنحاء مصر. 
 
و دي قصه جمعيه واحده في مصر للتنميه المستدامه؛ أيه رأيكم لو في أكتر من واحده؟! دا مثال حي للي ممكن يعملوا المتطوعين الشباب في تطوير مصر. و على فكره العمل التطوعي مش بس مفيد للمجتمع؛ دا الأفاده الأول بتكون للمتطوع لأنه بيتعلم مهارات القياده و العمل الجماعي و الأحساس بالمسوؤليه و الأحساس بقيمه الحياه و الأحساس بالمسوؤليه علي حياه الناس اللي حواليهم. 
 

لو قررت تطوع و تشارك في "عشانك يا بلدي":



تابع بوابة روزا اليوسف علي
جوجل نيوز