عاجل
الخميس 28 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

محمد موسى يكتب: عم الطيب

محمد موسى يكتب: عم الطيب
محمد موسى يكتب: عم الطيب

على أخر ناصيه في شارع بيتنا 
كان بيعدي يوماتي ف نفس الوقت تمام
يركن عربيته اللي زاققها لحد ماجلنا 
يسند ضهره ف سور الجامع 
ومن تعبه يغفل وينام 

يرمي ف حضن الشارع روحه 
يلقى ف عز البرد دفاه 
يتكلفت بهمومه ونوحه 
ع الافراح اللى مفارقاه
من همه بيحكيلي همومه 
وبفضفض بهمومي معاه

كنا بنقعد سوا ونأزأز
لب من اللي ايديه عاملاه 
من غير ما اشكيله من الدنيا 
كان يسرق من روحي الآه 
كان بيفسر حالى لحالي 
وكأنه فيه شيء لله
 
شال طول عمره هم عياله 
من ساعه ما الحجه اتوفت 
داين روحه وجهز بنته 
وماشفهاش من يوم ما اتزفت 
والواد لما يكون محتاجله 
كان بيزوره
بس بقاله كتير مش باين 
من ساعه ما جيوبه اتدفت

كان محبوب م الشارع كله 
وطيبه قلبه 
كانت بسهولة تبان في ملامحه
كنت استغرب لما بشوفه بيدعي لبنته
وان جت سيرة الواد الغايب 
كان بيقول : والله يسامحه 

راجل طيب بس الطيب 
يبقى ف حظ الدنيا ملوش 
رغم حياته بكل أساها 
لسه الضحكه مافرقتهوش 
وانا لقبته بعم الطيب 
صاحب أعجز وش بشوش

إتعودت أنى اسمع منه واتعودت انى احكى معاه 
كنت يوماتي بروح ع الناصيه قبل المغرب واستناه
يجي ونحكي ساعات وساعات
بس ف مرة قعدت استنى عدى المغرب ومعداش 
واما سألت عليه في الشارع ردوا عليا: روّح يابنى ماتستناش 
صاحبك عم الطيب مات



تابع بوابة روزا اليوسف علي
جوجل نيوز