بوابة روز اليوسف

بوابة روز اليوسف

29 يونيو 2017 - 27 : 7   Facebook   Youtube  RSS
بوابة روز اليوسف
رئيس مجلس الإدارة
عبد الصادق الشوربجي
رئيس التحرير التنفيذي
عبد الجواد ابوكب
البنك العربي الافريقي الدولي

حلا محمد الهواري : أنا نجمة فعلا .. وبحب الرسم وبطاريق مدغشقر

17 يونيو 2015 - 40 : 8



حوار : أمل وافى

كنت في اصعب موقف امر به في حياتي وقتها رزقني الله بها كأنه يريد أن يسعدني ويريح قلبي ، حلا ابنتي ذات الخمس اعوام ضرتي في كثير من الاحيان ، كف صغير يضم ويحب، نتعامل سويا ليس بلغة الام والابنه، خفة دمها تجعلني في عز غضبي تنتابني هستريا الضحك ، كلمات كبيرة تخرج من فم صغير ،شقاوة ودلع وجنان ، وفي أمر اعتبرته غريب جدا طلب مني رئيس التحرير اجراء حوار معها في البداية ضحكت لكني رضخت لهذا الامر فاجريت حوار مع حلا أو النجمة كما اطلق هو عليها والتي اصبحت بالفعل تعيش هذا الدور وتتعامل مع الجميع على انها النجمة.
 
 
اسمك ايه ؟
ايه يا ماما نسيتي بنتك اسمي حلا نسيتي والا ايه.

 


في مدرسة ايه ؟
سان جوزيف كنت في بيبي كلاس وخلاص خلصت.

 


طيب انت بتحبي المدرسة  ؟
أه بحبها.


ليه ؟
جميلة قوي علشان بنفضل نذاكر ونرسم بالالوان ونعمل صلصال وحاجات حلوه.


وايه اكتر حاجه بتحبيها هناك؟
المراجيح.


والميسات؟
بحب الميسات ميس فيولا ومس ناتالي ومس هبه بحبهم قوي.


والسيرات ؟
بحب سير سعاد وسير صوفي وسير روز وسير نيفين بحب اجري عليها احضنها قوي.


نفسي تطلعي ايه لما تكبري ؟
نفسي اطلع مهندسة علشان لما العمارة بتاعتنا احنا الاتنين اتهدت ابنيها ابنيها ، هو مش احنا في بيت بعض هي دي بقه ، فلما البيت ده كله يتكسر هبقي ابني واحد جديد.


مين صحابك واكتر حد بتحبيه ؟
في المدرسة جنا وبتول وبربتوا في البيت بقه يوأنا والاء وبسملة.


ومين اكتر حد بتحبيه فيهم كلهم؟
جنا صحبتي.


بتحبي بابا وماما والا انت ايه رايك؟
اه بحب بابا وماما.


طيب بتحسي بإيه وانت قاعده معاهم؟
بحس انهم جايبنلي حاجه حلوه !!


بتزعلى من ماما من حاجه او بابا؟
اه بزعل منهم ساعات لما ما بيجبوليش حاجات حلوة.


وبتفرحي امتي ؟
لما بيجبولي لعب وحاجات.


طب مايمكن مش معاهم فلوس ساعتها يعملوا ايه ؟
عادي يروحوا الشغل بتاعهم يجيبوا فلوس ويجوا تاني مفيش مشاكل.


بتحبي تسافري المنصورة ؟
اه بحب المنصورة جدا علشان بشوف تيته وتيته وبشوف احمد وشوده وكنزي وكنده ، وبعدين هم في المدرسة ادوني عروسة لونها موفي والبرنيه بتاعتها لونها موفي وعندها ورده من الليفت  وورده من الرايت.


طيب انت فاكره جدو دوح"والدي الذي توفاه الله "؟
اه فاكراه لما كان بياخد الدوا انا كنت بديهوله وكان بيبوس ايدي وكان بيحبني قوي ومرة تيته جابتليي سبوره وهو رسملي عليها وماما اللي هي انت ياماما قعدت تقولي جدو دوح زمان كان بيمشي وكان بيرسم كويس بيرسم ناس على الشط وبيرسم رمل وبيلونهم والناس بيقولوا احنا عايزينهم.


 
طيب لما اخدتي الشهاده حسيتي بايه وانت ناجحة؟
اصلا مكنتش اعرف ان العروسة اللي ادوهاني في المدرسة بتغني فقلت لما اجي ادوس عليها لقتها بتغني!!!!


مين اللي قال عليكي نجمة ؟
استاذ عبد الجواد الريس بتاع ماما اللي هي امل اللي هي حضرتك وبتسجليلي دلوقتي يعني هو بقه اللي قالي يا نجمة.


طيب مبسوطه وهو بيقولك بكلمه نجمة ؟
اه اتبسطت وبحب كمان حد يقولي يا لولا كده يعني


 
ايه رايك في ستايل لبسك عاجبك يعني والا ايه ؟
اه جدا انا زمان وانا صغيره !! كنت بزعل من ماما علشان بتلبسني بنطلون لكن دلوقتي سمعت كلامي وبقي عندي فساتين كتير علشان اصلا انا بنوته فلازم البس فساتين كتيرة.

 
 
بتحبي الرسم ؟
بحب الرسم والتلوين وبحب اعمل حاجات بالوان المية وماما اللي هي امل يعني ودتني مدرسة بنتعلم فيها الرسم.


بس انت ساعات بتضايقي ماما ومش بتوضبي الاوضة ؟
انا بحب اتفرج علي حاجات وبعدين انا مرة والله وضبتها لا مرتين وكانت جميلة جدا وماما قالتلي ميرسي.


ايوه مرتين بس يا حلا ؟
ما انا ببقي مش قادره تعبانه وضهري بيوجعني.


اه انت بتهرجي طبعا ؟
بصراحه اه بهرج انا بحب اطلع كل الالعاب واخلى صحابي يلموها.


بتتبسطي من ايه؟
لما الميس بتزعق لاصحابي بحس اني هعيط.


بس اكيد بيعملوا شقاوة؟
اه بيعملوا شقاوة وبيفضلوا  يتكلموا في البريك وفي الكلاس وانا بصدع منهم رغي رغي رغي.


ماما بتعمل معاكي ايه كل يوم ؟
ما انت ماما ، ماما انت بتهرجي صح.


بتحبيها تقعد معاكي ؟
لما ببقي قاعده لوحدي اه بحبها تقعد معايا لكن لما بيبقا اصحابي هنا لا تعمل اي حاجه او تشتغل.


ايه اكتر كارتون بتحبيه ؟
انا بحب توم اند جيري بحبه قوي وبطاريق مدغشقر بشوفه مع بابا وماما ومستر بن بحبها قوي.

       
بتعملي ايه لما بتروحي الشغل عند بابا وماما ؟
 عند بابا مش بحب اسلم على ولاد لانه بيعاكسوني فأنا مش بحبهم اصلا ، وعند ماما برضه مش بحب اكلم ولاد بس بحب اكلم استاذ عبد الجواد علشان بيقولي يا نجمة.


حلا وحشة والا حلوة؟
حلا وحشه لما بتزعل مامتها لكن لما مش بتزعل مامتها بتبقي حلا الحلوة وبعدين احنا بنمشي حلا الوحشه وبنجيب حلا الحلوة.


حلا الوحشة دي بتيجي امتي؟
مش كل يوم ساعات وساعات وبنمشيها على طول وترجع حلا الحلوة.

 

 

 

 

 

 

 

 

 

 

 

 

 

 

 

 

 

 







التعليقات



سيعجبك أيضاً

  • الأكثر قراءة
  • إخترنا لك
صيدليات نورماندي
مركز الاورام جامعة المنصورة
كينج إم
مستشفي جلوبال كير