شهد راشد تكتب: أسيب الشغل ولا أشتغل من البيت

أنا هكلمكم أنهرده عن فكره أقل ما يقال عليها أنها فكره عظيمه!! و لأني دايماً مقتنعه أن الحياه خطوط كتير أوي ماشيين جنب بعض والمفروض أن مفيش أي خط بيأثر على الخط التاني سلباً؛ و شايفه كمان أني أكون سيده عامله و سيده متزوجه و أم مش بيأثروا سلباً على بعض و أقدر أعمل كل دا في نفس الوقت عادي جداً. تعالوا نفكر سوا الأول؛ هو الواحد أو الواحده بيعيشوا عمر واحد بس ومش قابل للتجديد؛ و في العمر دا عايزين يتعلموا (12 سنه من عمرك) و يشتغلوا باللي أتعلموا دا (40 سنه من عمرك) و يحبوا ويتجوزوا و يخلفوا (من أول ال18 لحد الموت) . يعني كل بنت نفسها تشتغل باللي قعدت تتعلم فيه 12 سنه دا و نفسها تكون زوجه ناجحه في بيوتها مع اللي بتحبوه و تكون أم رائعه لأطفالها. من الأخر عايزين الدرجه النهائيه في كل دا شغل و بيت و أمومه؛ ومينقصش منهم حاجه عشان العمر واحد و مش قابل للتكرار!! و في أزمه أن كان الموضوع دا قابل للتنفيذ ولا دا أحلام ورديه؟!

في سيدات في خلال الحمل الدكتور ممكن يمنعهم من الشغل عشان الحاله الصحيه و في أمهات بعد الولاده مش بتحب الحضانه؛ و دا بيخلي فكره الشغل من البيت تكون الشغل الرئيسي و نزول الشركه بس عشان الإجتماعات و بس. ف عشان تحس أنها بتشتغل في البيت فعلاً بتحتاج تنظم مكان خاص بيها و بشغلها؛ يعني المفروض تأخذ الموضوع بجديه. و الحل في الصوره دي و المقال دا؛ حل بالنسبه لي سحري. يعني هتعملي كل حاجه و مش هتقصري في حاجه نسبياً؛ ست بيت و عامله في نفس اللحظه-كومبو يعني. الموضوع بس محتاج شويه ترتيب و تنظيم و تضحيات بسيطه مش أكتر.

الصوره دي عباره عن: مكتب صغير و عليه لابتوب و كوبايا للأقلام الملونه و شويه أوراق و أجندات و شويه علب لتخزين الشغل اللي خلص خلاص؛ على الحيطه في لوحه عشان يكون قدامك كل حاجه وراكي تخص بيتك أو شغلك أو دراستك أو جوزك أو ولادك. دي كدا أسمها Station للWorking from home women!! أيه دا؟؟ ببساطه جداً دا مكان صغير جداً في البيت بتشتغلي منه بنظام الFreelancing أو بالقطعه لشركات كبيره و بمرتب حسب المشروع اللي شغاله عليه؛ يعني أنتي بتكسري روتين الحياه بشويه تجديد عن طريق الشغل بدل الأيام اللي بيجي فيها أحساس "أنا مليش لزمه؛ و يا خساره دراستي و تعبي السنين اللي فاتت"!! 

 

أزاي تصممي المكان بتاعك أو الStation بتاعتك:

 

كراسات و أجندات شكلها حلو و مفرح.
أقلام ملونه كثيره.

لابتوب.

ملفات للشغل منظم.

لوحه كبيره عشان يكون قدامك كل حاجه وراكي في البيت و الشغل و للأولاد.

ترابيزه أو مكتب صغيرين في جزء من البيت أو أوضه.

صور كتير على المكتب و الحيطان.

زرع صناعي أو طبيعي حسب المكان.

كتب و مجلات للألهام.

ديكور على مزاجك عشان يكون للمكان حياه و روح.

 

عشان توصلي لأحسن نتيجه:

حددي وقت في اليوم للشغل؛ و الميزه هي أنك مش ملتزمه من 8 ل5 و لكن قسمي عدد الساعات برحتك على اليوم كله. و يفضل أن يكون الوقت دا و جوزك في شغله و أولادك نايمين؛ عشان تنجزي في الشغل و متأثريش على وقتك مع جوزك ولا أولادك. 

متنسيش أنك محتاجه أجازه؛ حتى لو الأمومه مفيش منها أجازه ولا الجواز و أكيد بيطلع حاجات مفاجأه في اليوم بس حاولي أن قبل (الجمعه و السبت) تكوني مخلصه الحاجات اللي بتخلص زي الغسيل و المكواه و الطبيخ على الأقل.

جهزي جزء صغير في أي أوضه (زي الصوره)؛ عشان تحسي أنك بتشتغلي فعلاً و تكوني في بيئه الشغل و المكتب و التركيز.
خاليكي مرتبه في شغل البيت عشان توفري وقت للشغل و وقت لجوزك و وقت لأولادك كمان.

بلاش تكوني موجوده بجسمك بس مع الأولاد و جوزك و لكن مش موجوده بعواطفك (يعني مش مركزه معاهم)؛ لازم تكوني متواجده 100% في كل حاجه أنتي بتعمليها عشان تنجزي فيها و تحققي حاجه و تنجحي.

أوعي تسمعي لكلام الناس من نوع "أنتي أكيد بتأثري على الأولاد و على زوجك" و الكلام دا؛ في الحقيقه أنتي بطله لأنك بتعملي الحاجتين: سايبه شغلك و قاعده في البيت؛ و بتعلمي كل اللي تقدري عليه عشان تنجحي في الحاجتين (البيت و الشغل).

أنتي حره في ترتيب يومك؛ يعني تقدري تكتبي حاجه للشغل و بعدين تأكلي الأولاد و بعدين ترجعي تشتغلي و بعدين تطبخي و بعدين تقرأي و هكذا بس السر عشان متتوتريش ولا تنسي حاجه هو أنك تكتبي كل حاجه مطلوبه منك أنهرده في ورقه و تعلمي على اللي يخلص.

أشغلي أولادك في حاجه جديده و أنتي بتشتغلي؛ يعني جيبلهم لعبه جديده أو كارتون جديد عشان ينشغلوا و أنتي بتشتغلي و متأثروش على بعض ولا يحسوا أنك مشغوله عنهم.

دايماً حافظي على بيتك منظم و مرتب؛ دا هيأثر على هدوء الأطفال و على أنتاجك و أنجازك في الشغل.

أهم حاجه في الموضوع دا أنك تعرفي أولوياتك؛ لأن في وقت ما هتحتاجي تختاري و هتحتاجي تغيري شغلك اللي قبل الجواز أو اللي قبل الأولاد عشان تقدري تشتغلي من البيت أصلاً.

الشغل من البيت حتى لو مش بيكون مصدر دخل كويس بس هو دعم نفسي حتى لو فيه شويه ضغط زياده؛ أحساس أن أنتي ليكي حاجه بتعمليها و ليكي فلوس حتى لو قليله بتكسبيها من شغلك دا أحساس رائع.

 

مزايا الشغل من البيت:

الشغل من البيت مريح جداً.

الشغل من البيت فيه حريه تنظيم الوقت ما بين البيت و الشغل.

تقدري تشتغلي متأخر جداً أو بدري جداً طول ما أنتي ملتزمه بمواعيد التسليم.

مش محتاجه تشتغلي في جو الشركات و الضغط و التعامل مع الناس المزيفه.

بتوفري وقت الزحمه و الشوارع؛ مش بتنزلي غير في الأجتماعات المهمه و بس.

عيوب الشغل من البيت:

الشغل من البيت فيه بعض الضغط لأنك مش بتبعدي عن البيت و ضغوطه.

الشغل من البيت أحياناً بيكون ممل لأنك مش بتقابلي ناس كتير و أغلب المقابلات بتكون أفتراضيه على السوشيال ميديا.

الشغل من البيت أحياناً بيفقدك الأستمتاع باللبس المميز و أنتي بتشتغلي (سيده عامله و بدل و كدا).

الشغل من البيت أحياناً بيكون مرهق لو عندك يوم خاص مليان و لازم تخلصي الشغل في مواعيده في نفس اليوم.

شعور الناس عن الشغل من البيت أنه مش بجد و أنك بس بتمثلي مشغوله.

 

أزاي ممكن أوصل للوظائف/الشغل:

لو الشغل بتاعك له علاقه بالكتابه ف في مراكز نشر كتير بتحتاج شغل مش بيستدعي النزول للشركه و ممكن جداً يتعمل من البيت بسهوله.

الشركات الجديده أو الشركات الصغيره بتحتاج خبره و ناس تشتغل من غير القدره على دفع مرتبات كبيره؛ ف الشغل من البيت هو الحل ليهم.

الناس مش فاهمه أن الفكره دي موجوده كتير جداً و بالأخص برا مصر؛ و عشان كدا في فكره الCo-working space أو مكان للعمل المشترك و أي حد بيشتغل على مشروع معين ممكن يشتغل في المكان دا.

 

**تنبيه: أنا مش زوجه ولا أم؛ و لكن الفكره دي أنا متحمسه لها جداً لأنها حل لمشكله كبيره جداً كانت بتوترني مع أني لسا مش عايشه فيها "لما أتجوز و يكون عندي أولاد هعمل أيه؟ هضحي بسنين الدراسه و الشغل و الأحلام!! ولا هضحي بأستقرار البيت!!"؛ فكره الشغل من البيت هي أني مش هضحي بأي حاجه من الأتنين.

**شكر خاص جداً ل"ديانا فريد" زوجه و أم لتؤام و بتشتغل من البيت. شكراً لمساعدتها في كتابه المقال دا و مساعدتها أني أفهم الفكره أصلاً.

**شكر كمان ل"شيماء الجمال" زوجه و أم لولد و تؤام و بتشتغل من البيت. شكراً لمساعدتها في شرح الفكره و تقريبها ليا أكتر.