عاجل
الخميس 28 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

علا البكاتوشي تكتب : رمضان جديد

علا البكاتوشي تكتب : رمضان جديد
علا البكاتوشي تكتب : رمضان جديد

كل سنة وانتم طيبين 
 
رمضان المفروض انه شهر عبادة وصيام وقيام
 
 ..ليه اتحول معانا لشهر عزايم وأكل وشرب ومصاريف ومسلسلات   ؟؟؟

ليه بنبقي قرفانين طول اليوم وكل واحد مش طايق نفسه بحجة انه صايم ؟؟؟
 
ليه استهلاك المصريين في الشهر الفضيل بيتعدي استهلاك  شهور كتير ؟؟؟؟
  وعلي الرغم من الاسعار الفلكية للياميش والمكسرات ..الناس بتستميت وممكن تستلف كأن رمضان  لا يجوز غير بالياميش 
والزوج اللي ميجيبش الياميش لا يمكن يعيش !!!!!!
 
ليه لازم نعزم ونتعزم بالذات في شهر رمضان  ؟؟؟
 
تلاقي يا عيني الستات قاعدة من قبل رمضان بأسبوعين وممكن شهر تخزن في البيت ..كاننا داخلين علي مجاعة !!!!
 و  من قبل رمضان بأيام معتصمين في المطبخ بيجهزوا  لعزومة أول يوم رمضان بكل ما اوتوا من قوة  
وييجي أول يوم رمضان وكل بيت في مصر عامر بما لذ وطاب  ..وطبعا أكتر من نص الاكل ده بيترمي  ومبيتاكلش ..وست البيت بعد الفطار  مش قادرة حتي تقف علي حيلها مش تصلي المغرب 
 ناهيك بقي عن المواعين (هذا الكائن الذي يتكاثر ويتوغل ولا يفني )  اثناء عمل الفطار  و بعد الفطار 
ونخلص بقي من بند الفطار ييجي بند المشروبات ..لازم يكون فيه تنوع في المشروبات بالاضافة للخشاف والفاكهة 
ايه ده ..ده احنا لسة محلناش ..أدخل عليه بقي بالقطايف والكنافة بالمانجة اللي غزت البيوت وبيدفع فيها بنفس راضية  مرتب طبيب في بداية حياته  !!!!
تفتكروا بعد كل الطقوس دي بيكون فيه جهد اصلا بقي لأداء فروض ربنا ..والقيام بالطاعات اللي ممكن نكسب بيها ثواب ونغتنم بيها الشهر الكريم 
ليه فيه عادات وطقوس غريبة مسيطرة علي تفكيرنا وبايدنا نغيرها ؟؟؟؟
يعني بالنسبة للعزومات لو ضروري جدا ..بدل ما كل عيلة تعمل عزومة ويضيع وقت الصيام في الطبخ ووقت التراويح في غسل المواعين  ..ممكن تبقي فيه عزومة واحدة وكل عيلة تشترك بأكلة ..ونوفر باقي الايام للعبادة 
ويا ريت نقتنع ان الياميش والمكسرات مش ضمن اركان الصيام 
 وبالنسبة لقلبة الوش بحجة الصيام ..افرد وشك محدش ناقصك 
 برامج المقالب السخيفة  والمسلسلات ..ممكن نستبدلها ببرامج هادفة تدبرية فكرية تحترم عقلك 
عاوزين في تلاتين يوم ننتصر علي عاداتنا الغلط ونتجه لتغييرها للأفضل 
 نحاول نترك المظاهر الفارغة ونركز في عمل الخير  والقرب من الله 

كل عام وكل قرّاء روزاليوسف بألف خيــر .. رمضــان كريم مبارك على الجميــع ..



تابع بوابة روزا اليوسف علي
جوجل نيوز