عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

رانية المهدي تكتب : عند أم ترتر

رانية المهدي تكتب : عند أم ترتر
رانية المهدي تكتب : عند أم ترتر

( عند أم ترتر ....عند أم التيتي ...عند أم بيجي اللي بتروح وتيجي )



من منا لم يسمع هذا الرد عندما يطلب طلب ما

وخصوصا المتزوجات ...فكل منا عندما تطلب شئ من زوجها يكون أسرع رد هو

( عند أم ترتر يا حببتي )

وطالما قال عند أم ترتر فمعني الكلام أن هذا الطلب دخل دائرة الإستحالة ... ويجب علينا كزوجات محترمات أن ننسي هذا الطلب نهائيا وبلا رجعة

وهنا كانت الوقفة والسؤال .......

مين هي أم ترتر دي اللي عندها كل حاجة ؟؟!!

لا ومش مسموح ولا ممكن نقدر نرجع اللي عندها  !!

بصراحة معرفتش أوصل لحاجة ...ومازال السؤال مطروح

مين أم ترتر دي؟؟؟ ....وفين مكنها بالظبط ؟؟!!

..................................................................

والموضوع كبر في دماغي

 و قولت أشوف الناس اللي حوليا بقا....ياتري الست أم ترتر خدت منهم اية ؟

ألاقي الهانم دي عاملة زي البير اللي ملوش قرار ...وماشية تلم في حقوق الناس وتخبيها عندها بمنتهي البجاحة

مثلا وليس حصرا

_ ورد المفروض الأستاذ يجيبة للست بتعاعتووووووووووو

_ كلمة طيبة من الهانم للراجل إلي قانيها

_ فسحة حلوة ولو في السنة مرة

_ طبخة لحمة ... بس ندوقها للعيال

_ الحما إلي ممكن يعني ...تحب مرات إدي العدي إبنها

_ مدرسة محترمة نتعلم فيها

_ معاملة طيبة في مستشفي

_ دكتور يشوف شغلة بضمير

_ شغل محترم

_ عيشة تنفع للبنادمين لا مؤخذة

_ حكومة تبطل تكدب ع الشعب

_ بلد نحس فيها بالامان

هار أسود ...........

هي الست دي مش سيبنا حاجة ولا أية ؟؟!!

كل الحاجات دي عند أم الترتر !!!

وكمان لسة في ناس كتير مش عايزة تتكلم وتقول خدت منهم إية تاني ....

ومن مكاني هذا وفي هذا الحر الشديد بقول وأعلن بقلب مفيهوش رحمة

 

سؤال هام

( إنتي فين يا جهاد ؟؟؟؟........أوبس .......قصدي إنتي في يا أم ترتر ؟؟؟؟

عودي بالذوق ورجعي اللي عندك ...)

ومن اليوم هبدأ حملة البحث عن الست الحرمية اللي إسمها أم ترتر دي وأي حد شبهها

#حملة البحث عن أم ترتر

مين هيدور عليها معيا ؟؟

 

 

 

 

 

تابع بوابة روزا اليوسف علي
جوجل نيوز