أحمد سعد يكتب : الحياة خد وهات
تأملاية أو فتياية أو اجتهاد، ومن اجتهد وأخطأ فله أجر وإن أصاب فله أجران، كلنا كلنا بلا استثناء محتاجين التقدير .. التقدير الى بيخليك تكمل اى حاجه فى حياتك فى الوقت الى بتحس فيه فعلا ان تعبك او مشاعرك مش فستك !
أوقات كتير بنسأل نفسنا هو احنا مهمين بالنسبه لغيرنا ؟ والغريب إن السؤال ده بنوصله فى مرحله متأخره بعد ما بنكون قدمنا كل الى عندنا عشانهم بس بنتفاجأ ان لللأسف كل ده بردو فستك.
حياتنا مش ماشيه فى اتجاه واحد أو بالأحرى مش إنسان بيبنى وإنسان بيهدم, الحياه أسمى واكبر من كده واوقات بنحاول ندارى احتياجنا لتقدير الناس ونقول العبارة المشهوره ( اعمل الخير وارميه البحر ) انا مش معترض ان ربنا خلقنا عشان نقدم الخير للناس ونعمل الى ربنا قدرنا عليه بس لو استمر الوضع ده كتير بنوصل لحالة احباط سواء فى شغلك او مشاعرك او طموحك , بتبقى مستنى لو حتى الاهتهام كأول وابسط جزء من التقدير.
زمان كان فى بنت شاطره جدا وديما المستر يقولنا هى اشطر واحده فيكم وعشان كنا " عيال " الغيره والحقد كان ملينا مش على شخصيتها لأ بالعكس كنا بنحبها بس عشان هى مش احسن مننا عشان توصل للدرجه دى من التفوق ..
افتكر ان اليوم ده روحت ذاااكرت كتير جدا وعملت المستحيل عشان اكون زيها واحسن لحد ما المستر قالى باقى خطوه واحده وتبقى زيها ومن الفرحه استمريت فى ده لحد مابقيت من اشطر الناس الى معايا ..
فى فترة تانيه من حياتى قابلت ناس محبطه جدا زى ماتقول كده بيرسمولك طريق فشلك فى الوقت الى بتحتاج فيه دعمهم وبتاخدنا الحياه ومواقفها لحد مابنكتشف ان الناس مهمين بدرجه كبيره لنجاحك بس مش الاساس ..
الانسان مايعرفش يعيش لوحده سيبك من شعارات " وحدى لكن ونسان " و " مش محتاج حاجه من حد " بلاش افورة ..
انت فعلا مش محتاج حد يصنعلك نجاحك بس انت على الاقل محتاج حد يقولك " برافو " .
حتى المشاعر محتاجه تقدير , فى عز ماانت بتساعد حد او تقف جنب حد او حتى فى قلبك حب لحد بتبقى محتاج ولو معامله حلوه منه مش شرط يكون مناسب لتوقعك لاننا بنختلف بشكل مؤكد فى نظريتنا فى التعامل بس على الاقل ماتحسش انك ولا حاجه ..
وعشان ماتفهمنيش غلط .. تانى انت مش محتاج حد يصنع نجاحك ولا فرحتك ولا ضحكتك ولا شخصيتك بس محتاج حد يساندك ويقدرك عشان تقدر تكمل ..
جوجل نيوز
