فريدة محمد تكتب: الامل

 دايما خليك واثق ان ربنا شايل لك الاحسن ، مش معنى انك كنت فى فرص كتير و منجحتش و التجارب السيئة والاحلام الكتير اللى متحققتش ، بس انت لازم تعرف انك متخليش شخص هو السبب فى سعادتك او تعاستك ، عشان الحياة بتعلمك ان قرار السعادة ده انت اللى تقدر تحدده ، تحدد مصيرك ايه ، و لو ربنا محققش حلمك اللى انت عايزه ، اعرف ان مش دى النهاية ، دعوتك هتستجاب بس بطريقة اجمل هتبهرك ، اصلك لو موت و يأست محدش هيفيدك ، ولا الكون هيقف عشانك ، خليك من الناس اللى  قلوبها منورة و بتعرف تهزم وجعها ، او على الاقل مش بتخليه يتحكم فيها و يعزلها عن العالم و ينسيها حلمها ، و مش معنى انك فشلت مرة انك متجربش تانى ، لا دانت تجرب تانى و تالت و عاشر بس الاهم انك تكون واثق من اللى انت بتعمله و واثق فى ربنا انه هيجزيك و اوعى تتنازل عن حلمك بسبب الفشل ، عشان الفشل مش صفة و الفشل مش دايم ، الفشل ده موقف حصل و فشلت فيه يعنى الفشل "حدث " ، حاول تبدأ من جديد ، حاول تتحدى كل الظروف ، حاول تتحدى الضعف ، حاول تتحدى الملل ، ارسم ضحكة فى وشك و خلى يومك حلو زى ضحكتك ، جرب تنسى اللى فاات ، جرب تطمع فى الامل و اطمع فى حلمك ، بس قبل اى خطوة تاخدها فكر كويس الحاجة دى فى صالحك ولا لا ، قبل اى حاجة حلمك هيتحقق بالصلاة و انك تقرب من ربنا ، صدقنى ربنا عمره ما خذل حد ،ولو حلمك مجاش ،لازم تبقى راضى ، و راضى من جواك و واثق ان ده خير من عند ربنا و عايزاك تبقى عارف ان ربنا هيكافئك و هيجازيك على قد رضااك و تحملك ...