لبني المصري تكتب: "الراجل بطبعه خاين !"
الجملة الشهيرة اللي ياما سمعناها قعدت افكر كده هل هي صح فعلا ؟! هل الراجل بيميل للخيانة عامة ؟! ولا احنا ظالمين الرجالة ؟!
قصة Brad pit و Angelina jolie رغم ان الكل باصصلها ان الراجل بس هو اللي وحش و هو اللي خان.....فمعلش هي كمان خانت لما كانت سبب في وجع مراته قبل كده.
و بما ان كما تدين تدان....فزي ما خانت كان لازم تتخان !
اما بالنسبة ليه هو فمسيره هيتخان بس دوره لسة مجاش !
بعيدا عن قصتهم لأن مش هي دي بس اللي تخلينا نسأل هو فعلا الراجل بيميل للخيانة ولا لأ.....فيه قصص كتير حوالينا تخلينا نسأل السؤال ده و نحاول نوصل لإجابة!
الحقيقة ان علي مدار الكام سنة اللي فاتوا اكتشفت ان الراجل و الست عكس بعض تماما !
الست لما بتحب حد ممكن تفضل تحبه عمرها كله....لو مات ممكن تفضل عايشة علي ذكراه من غير ما حتي تفكر بس في حد تاني....لو انفصلوا ممكن تقعد سنين عشان بس تنساه و تنسي الحب اللي حبيتهوله.....حتي ساعات اما بيوجعها بتيجي علي كرامتها عشانه و عشان بتحبه و عايزة تكمل معاه !
الست ممكن تضحي عشان البيت و الاولاد.....الست ممكن تضحي عشانك حتي لو انت عمرك ما ضحيت عشانها.....الست ممكن تدي من غير ما تستني اي مقابل و متبقاش عايزة بس غير انك تحبها و تحسسها بالأمان !
اما الراجل....(و هحاول اكون حيادية و انا بكلم عنهم ! )
بس الحقيقة ان فيه رجالة كتير اوي فعلا خاينين بطبعهم....ممكن يحب مرة و اتنين و تلاتة و عمره ما بيشوف ان واحدة بس كفاية ! بيفضل طول عمره يوجع في كل اللي بيحبوه بجد و هو فاكر نفسه بيمارس حقه في انه يعيش حياته زي ماهو عايز....مش مهم وجع مين....المهم هو و بس !
الرجالة دي انانية بشكل غير طبيعي.....مش بيكونوا بيفكروا في حد غير نفسهم !
في نوع تاني من الرجالة بقي ممكن يكون مخلص....بيحب بجد و ممكن ست واحدة تملا عينه فعلا....بيكونوا مراعيين ربنا في اللي بيحبوهم.....و بيخافوا اوي انهم يوجعوهم.....و هنا ممكن حتي لو في يوم حصل انجذاب لواحدة تانية هيفرمل نفسه لأنه بيحترم الست اللي معاه !
النوع ده بقي نادر جدا دلوقتي و بقينا اما بنشوف حد كده بننبهر من المفاجأة ! مبنكونش مصدقين ان لسة فيه حد قد كلمة "طول العمر" !
بس الحقيقة ان كل الرجالة بيجتمعوا في صفة واحدة و هي سرعة الMoving On.....اللي انا بحسدهم عليها !
معندهومش فكرة ان حياتهم تقف و لو كام يوم عشان تعبانين من الفراق !
مهما كان حبهم كبير.....لو الزوجة ماتت ولا انفصلوا ممكن يروح يتجوز بعد كام شهر....و هو شايف ان ده طبيعي جدا و انه اداها اكتر من حقها بزعل الكام شهر دول (اللي ممكن يكون كان مقضيهم في التعارف علي الزوجة الجديدة اصلا)
الراجل عنده قدرة غريبة انه ينسي و يعدي اي حد كان في حياته..الراجل ممكن يرمي كل الذكريات في الزبالة ...و الحاجة الوحيدة اللي ممكن تخليكي في باله شوية ان العلاقة تكون انتهت قبل ما هو يقررلها انها تنتهي (انتي اللي سبتيه) ....او انك تكوني وجعاه في كرامته بزيادة فيفضل حاطك في دماغه لحد ما يردلك الألم ألمين !
اه اصل الرجالة معندهومش ياما ارحميني !
الست ممكن تسامح لو اتخانت....بس الراجل لو اتخان ممكن يقتل الست اللي خانته !
كأن المجتمع عايز يأكدلنا حاجة واحدة....و هي ان الراجل ليه كل الحقوق.....الحرام عالست حلال عليه....و اللي الست ممكن تقبله و تستحمله هو ميقبلوش !
ويجوا بعد كده يقولوا عالست المطلقة "معيوبة" او معرفتش تكفي جوزها فبص برا !
الست دي اللي ممكن تكون عملت كل حاجة عشان تخليه سعيد و تبقي حلوة في عنيه ! بس في الاخر هو شاف ان كل ده مش كفاية بالنسبة له و حسسها بالنقص و الاهانة و الوجع و كل المجتمع اتفق معاه انه ليه الحق انه يتجوز بعدها و يعيش حياته و انها هي المعيوبة !
وطبعا بما ان هي المعيوبة فلو قررت تتجوز بعد كده فأكيد هيبصوا للي قرر يتجوزها انه بيضحي تضحية رهيبة و طبعا ان هي قليلة الادب اتجوزت مرتين !
عشان احنا مجتمع مريض !
هلخص الكلمتين عشان طولت بزيادة !
من الاخر الست لما بتحب بتخلص بجد بتحب بكل جوارحها و صعب اوي انها تعرف تخون....بس الراجل اما بيحب بيكون حبه محدود علي مدة اقامة معينه و يا عالم قابلة للتجديد ولا لأ !
جوجل نيوز
