عاجل
الخميس 28 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

دينا أبو الوفا تكتب : حين تتضارب المصالح

دينا أبو الوفا تكتب : حين تتضارب المصالح
دينا أبو الوفا تكتب : حين تتضارب المصالح

كل ما يعدى العمر بينا ونكبر فى السن ، مسؤولياتنا بتزيد و التزاماتنا بتكتر .....



و رغم كده انا مش ناويه أقعد أعد فيهم دلوقتى لان اللسته لا نهائيه .....

لكن اللى هختار اتكلم فيه، انا بعتبره واحده من أهم و أخطر المسؤوليات و الالتزامات اللى بتقع علينا ،،،،

 ياما بيحصل اننا لما بنكبر فى السن و شعرنا يبيض و نشيب، الناس بتعتبرنا مصدر جيد و موثوق فيه للنصيحه....

و بالتالي لما يقابلهم موقف، عليهم فيه اتخاذ قرار مصيرى و حاسم ،بيلجأوا لينا ،طمعانين فى تفكير رزين و منطقى

 يوصلهم لبر الأمان و القرار المظبوط !!!

و بيقع فجأه على عاتقنا هذه الامانه الخطيره ،،،،،

 و بقول امانه لان الشخص التانى بيعتمد علينا اعتماد كلى و بيأتمننا على مساعدته فى تحديد مصيره و مستقبله ........

وبقول خطيره لان الحقيقه اى نصيحه غلط مننا هو اللى هيدفع تمنها لوحده !!!!!

علشان كده بجد بجد النصيحه مسؤولية ، و لازم نبقى قدها ، دى ارواح ناس مش هزار !!!!!

لازم نسمع لهم كويس اوى ، نركز اوى ، نفهم اوى ، نستوعب اوى ، نحلل الأمور و نربط الخيوط مع بعضها بذكاء ......

نستدعي كل خبراتنا السابقه و نستحضر تجاربنا الشخصيه اللى مرينا بيها و دروس الحياه اللى اتعلمناها فى اللحظه دى.....

كل ده لازم ، بس اساسى كمان نراعي الفروق اللى بِنَا و بين الشخص اللى قدامنا ،،،،،

 ظروفه غير ظروفنا ، احتياجاته غير احتياجاتنا ، احلامه غير احلامنا ، زمانه غير زمانا واللى يناسبه مش لازم يناسبنا ....

لازم و احنا بنسمعه نتقمص دوره ، نحط نفسنا مكانه،ونلبس عبايته

 و ده بقى المعنى الحقيقى للخبره ....

ان يكون عندك القدره انك تنسلخ من نفسك و تكون حد تانى وانت بتدى النصيحه ....

و فى نفس الوقت تطبق تجارب حياتك بنتايجها والدروس المستفادة و القواعد العامه عليه !!!!!

يا ريت الموضوع على قد كده ، يمكن كانت بقت سهله و تعدى ....

ساعات بيكون التحدى أشد و تلاقى نفسك طرف فى القصه وجزء من القرار !!!!!

هنا تظهر أعلى درجات الحرفيه و التمكن .....

انك تطلع نفسك من المعادله فوراً و تستبعد عواقب اى قرار او نصيحه عليك ،،،،

 طبعاً بتقول ليه !!!!!

اقولك ليه !!!! لانه بمنتهى البساطه طلب منك النصيحه و القرار اللى فى مصلحته هو ، مش اللى فى مصلحة حضرتك !!!!!

و يا سلام لو صعبناها كمان و كمان وكانت مصلحته غير مصلحتك ، كلٌ فى الاتجاه المعاكس ....

أجمل حاجه فى اللحظه دى برغم صعوبتها ، انك غالباً بتكتشف و لأول مره القيمة الحقيقه للشخص ده عندك

لانه الاختبار الحقيقى للمعزه و الحب هو حين تتضارب المصالح.......

تابع بوابة روزا اليوسف علي
جوجل نيوز