كوكب عمارة تكتب : عشان ترتاحي بلاش
بلاش تكلمي جوزك بعد الأكل الراجل مابيتكلمش بعد الأكل
الراجل مابيتسئلش تاكل أيه...الأكل بيتحط قدامه إي كان نوعه أوكميته بياكل والسلام
الراجل ما بيحبش الأسئله قولا واحد وبإجماع الفقهاء وبالذات السؤال الغلس هنعمل أيه دلوقتي؟؟؟
الراجل بيظبط المنبه من باب أعمل اللي عليك وسايب الباقي علي ربنا ثم عليكي
زي الست مابتبقي (عايزه ورد ياإبراهيم) هو كمان عايز(a little personal space )يا زينب
الراجل عنده طقم واحد صيفي وواحد شتوي بيتلبسوا اول الموسم ويتقلعوا آخر الموسم فأي محاوله لتغيرهم او حتي غسيلهم بدون إنذار مسبق قبلها بيومين وتمهيد نفسي وإحتواء وجداني ممكن تهدم البنيان النفسى للراجل وترجعه عيل عنده سنتين مش عارف يروح الحمام لوحده
الراجل مايعرفش الست من شكل العين ولا من نبرة الصوت إن ماكنش يسمع صويت ويشوف لطم بيبقي المشهد بالنسبه له عادي جدا
الراجل اللي بياخد باله من تغير نوع البرفان ده معدل وراثيا مش أصلي الأصلي مش بيشم
أكاد أجزم إن كل الشرور والبلاوي سببها راجل إتسأل وهو داخل ينام هتصحي أمتي؟؟؟
الراجل في جميع مراحل نموه من ساعة مايصحي من النوم ولحد مايوصل الحضانه او المدرسه او الجامعه او الشغل ولمدة ساعتين تلاته بيبقي مرشوش عليه بيروسول بس بكميه لا تكفي لقتله بصوا علي اي راجل ماشي علي رجله او راكب مواصلات تحس انه ناموسه تتعافي جزئيا من رش مبيد حشري
عايزه تخسري راجل إسأليه هتنزل بكره الساعه كام ولو عايزاه يكرهك من قلبه أسأليه يوم الخميس هتنزل الشغل يوم الحد الساعه كام
الرجاله مش بيتفقوا مع بعض علي مواعيد للخروج الحاجات دي بتحصل رباني
دور البرد بيسحب الحياه من الراجل فبلاش تقوليله شد حيلك وقوم اتفرج علي التليفزيون وتعالي نعقد في الشمس والكلام الفارغ ده........ برد يعني سرير وكلفته بالطانيه
الراجل أخرس واللي بيتكلم مش بيتكلم في البيت اي محاوله لتغير مجري الطبيعه هتؤدي الي كوارث
اي محاوله لتغير معلقتين السكر الي معلقه واحده هتفشل وده ينطبق علي اي حاجه في الحياه
نصيحه بقي ودي المهمه جدا..... في اي زمان ومكان ومهما كانت درجة تعقيد المشاكل مافيش حاجه ممكن تمنع الراجل انه يبتسم قدام طبق بطاطس محمره
عايزه تعرفي الراجل بيحبك قد ايه خليه جاي من بره ومش شايف قدامه وحطيله الأكل ومع أول لقمه في بقه قوليله عملت أيه في الموضوع اللي كلمتك فيه من كام يوم لو فضلتي عايشه يبقي بيموت فيكي لولا قدر الله السؤال طلع القشه أللي قسمت ظهر البعير يبقي أدعى الموضوع يقف علي الطلاق بس.
وبالنسبه للراجل المصري في فجوه زمنيه غير محسوبه من ساعة الخليقه اسمها الجمعه قبل الصلاه.... اقتراحات الفطار بره والتمشيه والشوبينج ده تعمليه مع صاحباتك لان الفتره من ليل الخميس حتي ظهر الجمعه الراجل بيعتبر نفسه فيها في رحله صوفيه.
خدي الكبيره بقي وحطيها حلقه في ودنك (كيم كارداشيان خط أحمرررررررررررر #آه_والله#
جوجل نيوز
