غادة حامد تكتب : مختلفين و لا متشابهين مش فارقة

سيناريو رقم ١-

مش عارفة ازاي الاتنين دول عايشين مع بعض و هما عكس بعض علي النقيض للدرجة دي؟  عكس بعض في كل حاجة !، مختلفين تماما ، كأنهم بيتكلموا لغتين مختلفين في بيت واحد. عارفة حوار الطرشان؟ التشبيه دة بيتقال عليهم  بالذات.كل حاجة  هي بتشوفها صح، ينتقدها و يشوفها غريبة ، و كل تصرفاته االلي هي بتشوفها غريبة و مستفزة ،بيشوفها منطقية ! انا بجد مش عارفة هو اللي جاي من المريخ و لا هي؟ بصراحة،الحياة بالشكل دة شكلها مستحيل"

سيناريو رقم ٢

مش عارفة ازاي  الاتنين دول شبه بعض كدة ! كل خناقاتهم عجيبة جدا ، كل واحد بيحكي حكاية مختلفة تماما توصف نفس ااخناقة! انا بيجي لي ذهول و انا باسمع كل واحد و هو بيوصف التاني بنفس التهم، من وراه، و ساعات بنفس الاوصاف ! كأنهم واقفين قدام مراية، كل واحد مستني من التاني نفس الحاجات و بيتعصب علي التاني بنفس الطريقة في كل موقف و بيستغرب من التاني نفس التصرفات ، اللي هو كمان بيعملها! كل واحد فيهم تسمعه تتعاطف معاه و تقول دة  اعقل واحد في الدنيا ، تقعد مع الطرف التاني تلاقي نفس العقل و ترتيب الكلام و الحقيقة ، الاتنين تصرفاتهم اجن من الجنون و لا يمكن تعرف هو ولا هي اللي  بيحكي الصح! انت هنا مش بتحتار مين وجهة نظره اصح، لان الاتنين بيقولوا نفس وجهة النطر! هما متشابهين لدرجة لا يمكن تصديقها!!!

طيب ايهما افضل؛ السيناريو الاول و لا التاني؛ انك تكون عكس شريك حياتك و لا شبهه؟  انك تكمله و لا تتوحد معاه؟

انا رأيي ان مفيش مشكله في الحالتين . المشكلة أصلا بتكون فيك انت ، انت اللي عايش في البيت و لازم تتعايش مع الطرف الاخر. لازم تفهم الطرف التاني او تفهم طبيعة الخلاف اللي بينكم سببه ايه . و لازم  تغير نفسك، تغير طريقتك و اسلوبك في التعامل معاه. ايوة تغير اسلوبك لانك مش هتقدر تغير الطرف التاني و لانك مش المفروض تسيبه برضه عشان انتو مختلفين او عشان متشابهين. لو سبتوا بعض للسبب دة بس ، معناه ان انت فشلت  لانك مش عارف تتعايش  و مش عارف تلاقي طريقة ذكية للحياة.

الاسباب اللي بتسبب الانفصال ، في رأيي بتكون عادة بسبب الخيانة او الاهانة او حاجة كبيرة كدة. و عشان تفهم اقصد ايه بحكاية  الاسلوب الذكي للتعايش مع الطرف الاخر، لازم توصل لمرحلة التأكد من انه مفيش حد بيغير الطرف التاني، و اي تغيير ممكن تحققه هيكون في حاجات بسيطة جدا في شخصية الطرف التاني زي انه يحترم مشاعرك،  او  يشيل مسؤلية دفع فاتورة الكهربا مثلا ، و حتي دة ممكن يتحقق بعد تقريبا خمس سنين علي الاقل من المحاولة. و بالتالي اكيد الاسهل انك انت اللي تتغير لانك تقدر تتحكم في نفسك اكتر ما تقدر تتحكم في غيرك. يعني مثلا ، لو الطرف التاني عصبي، الاسهل انك تعرف ايه الاسلوب اللي بيعصبه و تبطله او انك توقف المناقشة قبل ما يتعصب ،بدل ما تعصبه و تطلب منه في كل مرة انه يتحكم في نفسه. لو الطرف التاني نرجسي، اكيد الاسهل عشان تمشي الامور بشكل يرضيك،  انك تدي له شوية وضع بدل ما تحطم نفسيته و نفسيتك ، و عشان عايز تعرفه حجمه الحقيقي و اكيدكدة  هيعند في تحقيق اي حاجة انت عايزها منه. الموضوع ما فيهوش مين صح و مين غلط، فيه اننا تتقبل عيوب بعض و نتحمل اخطاء بعض .

طالما في حب ، و  الطرفين ما وصلوش لدرجة الكره،  يبقي في امل في حياة مشتركة، مفيش نجاح من غير تعب وبذل مجهود، مفيش حاجة هتيجي لك بسهولة ، و لو سبت شريك حياتك عشان مش عارفين تتفاهموا ، يبقي احتمال انك تعرف تتفهم شخص اخر احتمال ضعيف برضه، لان الرغبة في النجاح و الاستمرار بتبقي جوانا احنا ، بس احنا بنستسهل ان الطرف التاني  هو اللي يتغير ، لأننا عارفين ان التغيير دة حاجة صعبة و بتاخد وقت  ، فمش عايزين نتعب نفسنا. خصوصا لان التغيير لما بيكون  في عادات و طباع اتربينا عليها و كبرنا بيها ، اكيد هتاخد وقت طويل و محاولات كتير منها الناجح و منها الفاشل، لحد ما  يحصل التغيير او جزء منه . النجاح عايز صبر و طولة بال زي اي مشروع بتعمله في شغلك او زي تربية اولادك،.. مفيش حاجة نتايجها بتظهر بعد شهر ولا اتنين، الحاجات دي بتاخد سنين!

و أكيد لو اي طرف حاول يغير نفسه ، الطرف التاني ،بعد فترة هيسلك نفس السلوك. بس مش في يوم و ليلة يعني،  دة حتي الجبل بيلين مع الوقت و بتأثر فيه عوامل الطبيعة، يبقي شريك حياتك مش هيتأثر لما يلاقيك بتحاول ان الحياة تفضل مستمرة  و مستقرة! بس الصبر، شوية صبر، ربنا خلق الدنيا في ستة ايام مع انه يقدر يقول لها كن فتكون ، صح و لا ايه؟