رضوى نجيب تكتب : ايفوريا كافية 2

وصلت سمر لمنزلها وهى فى حالة من الراحه ربما او السعاده لانها اكتسبت شخص مقرب منها يثق فيها ، وفى صباح اليوم التالى دخلت سمر الى مكتبها وجدت صندوق هدايا على مكتبها وعليه كارت فى غاية الاناقه مكتوب عليه،

صباح الخير .اولا متشكر جدا على وقتك امبارح و اهتمامك وانتى بتسمعينى وان اشاء الله متكونش اخر مرة ، وليا طلب صغير اولا لانى يهمنى احافظ على شكلك العام ، فالتعامل جوه باب الشركة هو رسمى زى العاده وف الوقت اللى نكون فيه بره الشركة انا وليــــد وبس .. افطرى باللى جوه البوكس لانى واثق انك مفطرتيش ..يومك حلو

فتحت سمر الصندوق وجدت شيكولاته سنيكرز من النوع المفضل لها ..

ورن جرس الهاتف الداخلى ..مما افزعها وجعلها تستفيق من حلم اليقظة الذى كانت بداخله .

الو

سمر لو سمحتى هاتيلى الملف اللى اشتغلتى عليه امبارح لو خلصتيه .

حالا يا مستر

 ودخلت سمر اليه ف مكتبه وجدته منهمك فى العمل ومعه تليفون .فقال لها بأقتضاب

شكرا يا سمر ..اتفضلى انتى

خرجت سمر من المكتب قائله فى  حالة من الدهشه

ازاى فى واحد يقدر من 9 ساعات يبصلى بكل ابتسامه واهتمام ويرغى ويفضفض معايا . والصبح ميبصليش حتى .ايه الراجل العجيب ده .عموما مش مهم لو طلب منى تانى نتقابل ارفض .كفايه عليه شغلى بلا فضفضة ..بلا بطيخ

واندمجت سمر فى اعمالها لمدة ساعتان كاملتان .. حتى جاء و فصل تركيزها

سمر ..

نعم يا مستر (بنظرة كاملة الجديه )

ميرسى اوى الفايل شغله هايل.. انتى سهلتى عليا حاجه كنت هعملها (بنظرة مليئة بالامتنان )

شعرت سمر بأن الماء جرى فى جسدها من الارتياح (اخيرا ضحكت ف وشى)

ايه البوكس ده ، انتى عندك عيد ميلاد انهارده ولا ايه  (بنظرة يملؤها الخبث مع الثبات)

ههههه لا دى هدية جاتلى من حد، سورى لو عامله زحمه ،هاخدها وانا مروحه.

لا لا خالص ،البوكس ذوقه حلو ...يالا كملى شغل

ثم عاد الى مكتبه وبعد وقت قصير طلبها (سمر من فضلك ياريت بكرة تيجى بدرى نص ساعه ترتبي الميتنج رووم مع الاوفيس بوى عشان ف اجتماع مهم بكرة وهاتى ورد معاكى ..هسيبلك فلوس ع المكتب )

وبعد انتهاء يوم العمل  وهو مغادرا للمكتب ..ارسل لها رساله هاتفيه (لو ليكى ف الورد ايه اكتر نوع ورد البنات بيحبوه؟)  

التيوليب والليليام والجاردينيا

خلاص بكرة عايز فى الاجتماع  تيوليب  على ذوقك..

وأثناء الاجتماع الذى دار لمدة ساعتين مما اصاب سمر بالصداع من كثرة التفاصيل ، اتفقت الشركتان على  التعاقد سويا .

وبعد انتهاء الاجتماع ظل سمر ووليد يعملان ف غرفة الاجتماعات على اتمام كل بنود هذا التعاقد بنجاح ، ثم فاجئ وليد سمر بخبر ..

سمر التعاقد ده هيحقق لشركتنا مكسب كويس جدا وعلاقات ف صالحنا ، و لكن طبعا انتى عارفه ان بروتوكول العمل بينص على زيارات متبادله بين الشركتين ف مقرتهم ،عشان نتأكد من اتمام الشغل .. وبناءا عليه لازم شركتنا تروح مقرهم ف شرم الشيخ  ولو يومين ..

تمام يا مستر .. طيب وايه المشكله ؟ حاسه من كلامك ان ف حاجه؟!

سمر انتى لازم تسافرى معايا ..

_يتبع_