دينا أبو الوفا تكتب: سبحان مقلب القلوب
عارفين .....
فعلاً سبحان " مقلب القلوب "
ازاى ممكن بمنتهى السهولة ننتقل من احساس حسيناه و عيشناه بكل ما فيه من روعة و جمال لنقيضه
ازاى احساس كان مالى كل كيانا ، مجتاحنا بكل قوه ، مسيطر علينا برضانا ، بنعرف نطرده من جوانا و نزيحه بعيد عننا
ازاى بنقدر نتغلب عليه و نقهره و ننفيه بره حدودنا
ازاى ممكن الشعور يتبدل من منتهى الحب آلى منتهى اللامبالاه
ومن قمة الاشتياق الى قمة الجفاء
و من شدة الاحتياج الى شدة الاستغناء
و من فرط الرضا الى فرط السخط
و من منتهى الأمل الى منتهى اليأس
فعلاً " سبحان مقلب القلوب "
لكن ورا التقلب ده بيكون غالباً فى معظم الأحيان ، سبب وجيه و منطقى
بنكون غالباً اتوجعنا اوى ، اتجرحنا اوى ، و شفنا كتير و مرينا بخيبات أمل واحده ورا التانيه ، لحد ما مع الوقت ضربه فى التانيه ، اتسببوا فى شرخ جوانا
و تصدعت كل المشاعر الجميله جوانا و بقت قايله للسقوط فى أى لحظه
لا نافع فيها ترميم و لا يصلبها من تانى حاجه
بتبقى خلاص خلصت و فات الوقت
لازم تهد صرح المشاعر جواك و تجيب عاليه واطيه
و تبنى من تانى صرح جديد
ده اذا مقررتش تسيبها أرض فاضيه ، غير قابله للسكن ، غير قابله للحياة
و فى عز ما انت بتهد الصرح ، بتهد معاه كل حاجه حلوه فى يوم حسيتها
بتهد " المعبد على فيه " ميلزمكش !!!!
و بيكون اهون عليك تعيش بين الانقاض عن انك تعيش بين جدران مشروخه
بتستقوى بعد ما كانت قوتك فى ضعفك قدام اللى بتحبه
بتتغير و تتبدل ، و اللى كنته زمان بيصبح حطام
بتملاك القسوه ، و يحلالك الظلم ، و تستطعم الانتقام
ما هو " كتر الأسى يعلم الجفا "
جوجل نيوز
