أبوالسعود محمد يكتب: عرافة

البنت اللي بتعرف في الأبراج
عاملةلي كشف حساب
وخداني عتاب
تضحك وتقولي
طبعك غلاب..
كداب..
بتدادي وتحابي الناس
وعاملي شجاع
وأنت الخواف
عشمان بزيادة
وكشمان..
بتروح تقفل ألف بيبان
وتربس قلبك بالترباس
عارفاك..
برجك ناري معجون بتراب
طيب وعنيف
ودا طبع غريب
ما قبلتوش بين الأبراج
عصبي وكداب
مع إنه قلولي عليك شفاف
بيبان علي وشك أي أوصاف
برجك مايل الحال..
والحيلة..
بتخطط؟
اه بتخطط
وتربط كل وسيلة بوسيلة
بس حكايتك حكاية تقيلة
طويلة..
 
وبرجك نصه الناري ضلالي
هيولع قلبك..
والنص اللي ترابي
متغابي..
ممكن ينهار في يوم أو ليلة
كدابة أنا؟
لأ مش كدابة
أنت الكداب
وعصبي وخواف
هادي وعنيف..
متلخبطة فيك كل الأوصاف
كلك شفاف
وقلبي أنا شواف
وشك مكشوف
حبك كداب
كرهك كداب
صدقك كداب
كدبك كداب
ولا ألف كتاب وكتاب
هتلاقي فيه دي الأوصاف
وعلي فكرة..
ولا حتي أنا بعرف في الأبراج!