عاجل
الخميس 28 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

ساره التونسي تكتب : انا عايزة ايه ؟؟

ساره التونسي تكتب : انا عايزة ايه ؟؟
ساره التونسي تكتب : انا عايزة ايه ؟؟

انا عايزة ايه ؟؟ السؤال ده كلنا بنسأله لنفسنا كل يوم ؟ مننا اللى بيلاقى الإجابة فى وقتها و مننا اللى بيقعد بالأيام و الشهور و ممكن السنين عشان يعرف الإجابة ،، فى رأيى فى مجتمعنا البنت بالذات لازم بتلاقى متطوعين بيحاولوا دايما يأثروا على قراراتها و دايما فى الإتهام بتاع اصل انتى مش هتعرفى تفكرى لواحدك ..اصل احنا اكبر منك و فاهمين.. اصل احنا عايزين مصلحتك.. اصل انتى مش عارفة انتى عايزه ايه ،،!! فى الأول لما كان حد بيقولى جمل زى دى كان دايما ردى لا انا عارفة انا عايزه ايه .. لا انا فكرت و قررت .. لا انا خلاص مش هغير رأيى ،، و كان فيه كم من التبريرات لسانى بيرددها من غير ما افكر .. لحد لما قعدت مع نفسى و فكرت و بقى ردى ،، اه انا ساعات مش ببقى عارفة انا عايزه ايه بس مش مهم و مش غلط .. انا هجرب و هفشل و هفشل تانى و هتعلم و هغلط كتير و مش هغلط كتير و هخبط و فى الاخر اكيد هنجح و اقرر و مش عايزة حد يقررلى حياتى .. عايزة اعيش تجربتى كلها بنفسى .. عايزة اسمع صوتى و رأيى .. عايزة اكون نفسى .. مرة قبل كدة حد قاللى سارة انتى مش كنتى بتكتبى مقالات بطلتى ليه !! و لا هى كانت موضة .. !! كان ردى ببساطة انا مش كاتبة .. انا بحب الكتابة و بحب اطلع اللى جوايا على الورق .. و ببقى مبسوطة فى ده و بتبسط لما الناس تقراه و يعجبها و لما بعوز اكتب بكتب و بنشرها ،، لقيت الرد كان لا انتى مش عارفة انتى عايزة ايه !! ساعتها ابتسمت و رديت رد هادى جدا ( بس انا مبسوطة ) .. ده اهم حاجة بجد ان الواحد يكون مرتاح و مبسوط من اللى بيعمله .. مبسوط فى شغلك كمل فيه .. مش مبسوط متفكرش سيبه و متسمعش للى هيقولك انت كل شهر فى شغلانة مختلفة و بتتخبط ليه .. كمل طريقك روح ٢٠ شغلانة لحد ما تلاقى الشغل اللى ترتاح فيه و لو ملقتش سيبه و جرب تانى و تالت و رابع و سبعين .. اللى اتخطبت مرة و اتنين و جات عند التالته و قالت انا مش هينفع اسيبه عشان سمعت للى قالولها  المشكلة اكيد فيكى .. متعمليش كدة متقبليش بحد لمجرد كلام الناس .. استنى اللى هيخليكى فعلا مبسوطة لو كان عاشر واحد او رقم ٢٦٦٣٨٢٩٦٢ ،، اسمعى صوت نفسك .. اسمعى احساسك و رأيك انتى ،، من ضمن الإنقادات اللى بتعرضلها الفترة دى .. شغلى فى preschool مع اطفال كلهم معدوش ال ٤ سنين ،، و اللى يقولى بقيتى (دادة) اد الدنيا ماشاء الله و اللى يقولى شغلك متعب اوى يا حرام بتلعبى و تتصورى طول النهار .. و محدش بيشوف اللى ورا الصور و لا اد ايه فعلا التعب و المجهود اللى عمرى ما هحكى عنه لإنه فعلا ميساويش حاجة جنب ضحكة طفل او فرحة اهله بالحاجات اللى بيتعلمها و بيكتسبها كل يوم .. الناس دى بيبقى ردى عليهم نفس الرد ( انا مبسوطة ) و دة فعلا بيصبرنى على كلامهم .. لما بفكر اد ايه واحد ممكن بيكمل فى طريق مش عاجبه لمجرد كلام ناس او لمجرد انه بدأ فى حاجة و مش هينفع يوقف اللى ابتداه بحس اد ايه انا قوية .. اد ايه انا اللى صح مش هما اللى صح ! ليه مجربش كل حاجة ليه متعلمش كل اللى عايزة اتعلمه .. ليه مفشلش .. ليه موقفش نفسى على رجلى بنفسى و انجح فى اللى انا عايزة انجح فيه مش اللى غيرى عايز ينجح فيه  ! لازم البنى ادم يحب نفسه .. يثق فيها و يثق انه قادر يقرر .. قادر يعرف هو عايز ايه بس بعد ما يجرب و يفشل و يقوم تانى و تالت و يجرب تانى و يحاول و يتعب لحد ما يوصل للراحة النفسية اللى تخليه يعيش مبسوط و يلاقى سعادته فى اللى يحب يعمله :) 
اعمل اللى انت عايزه .. عيش حياتك بالطريقة اللى تريحك من غير ما تضر اللى حواليك .. حب نفسك و اسمع صوتك انت مش صوت حد تانى :)  



تابع بوابة روزا اليوسف علي
جوجل نيوز