كوكب عماره تكتب : نصايح ع الماشى عن الزواج

1- محدش بيتغير بعد الجواز، لو مش عاجبك دلوقتي مش هايعجبك بعدين
2- فيه حياة بتبتدي بعد الفرح والزفة والكوشة، الحاجات دي احتفال بالبداية مش بالوصول للغاية
3- المؤخر والقايمة والنيش والشبكة السوليتير والهني مون مش ضمانات لنجاح الجواز
4- لو مش حاسين إنكم أصحاب وبينكم اهتمامات مشتركة غالبا هاتبقوا تعساء 
5- نصائح الخالات والعمات والجدات والجارات غالبا بتودي في داهية
6- متستعجلوش ع الخلفه  أول ما تتجوزوا علشان انتوا مش داخلين سباق دا نصيب وله وقته و علشان لو الموضوع فركش ما يبقاش فيه عيال في رقبتكم 
7- ما تسكتوش على إهانات عنيفة، من الأول كده يا تتحل يا كل واحد يشوف حاله قبل الفاس ما تقع في الراس.
8- ما تتجوزوش علشان كل الناس بتتجوز أو علشان سنكم كبر، دي مش أسباب كافية للارتباط بشخص وعيلته وأولاده بقية عمرك
9- ما تتجوزوش علشان الناس بتحرجكم أو أهلكم نفسهم يشيلوا عيالكم، إنتوا مش مصدر للحيوانات الأليفة الآدمية، وأهلكم مش هايفرحوا لو اضطروا يشيلوكم إنتوا وعيالكم لو اتطلقتوا
10- ما تسمعوش كلام الناس اللي بتخزي العين وتشتكي وتخوفكم وتحبطكم، الجواز حلو لو مع الشخص الصح وبظروف ترضي ربنا
11- لو الطلاق حل خدوا قرار شجاع وما تخافوش من الناس، خافوا من ربنا اللي هايسألكم ضيعتوا حياتكم في إيه
12- اللي مش قد الخلفة ما يخلفش أحسن بدل ما يندم طول عمره ويقابل ربنا بذنب كبير
13- الجواز الفاشل ما بيتصلحش بإنجاب مزيد من الأطفال
14- الجواز الفاشل ما بيتصلحش بتجاهل مشاكله، يا تتفاهموا يا تتفارقوا. 
15- اطلبوا مساعدة في فك الاشتباك من ناس حكيمة وبتحبكم، مش عيب
16- روحوا لمستشار علاقات، مش عيب علي فكره
17- هاجروا لو جت الفرصه المناسب الل مفيهاش بهدله وبطريقه صح 
 إنتوا مش شجر إنتوا بني آدمين عندكم رجلين وكلها بلاد ربنا 
18- طلب الرزق في مدينة أو بلد تانية مش عقوق، واللي يحسسك بكده يبقى ده ابتزاز عاطفي
19- ولادك مش امتداد لك ولا مفروض يحققوا اللي انت معرفتش تحققه. سيبهم يعيشوا زي ما انت عشت بمزاجك وبطريقتك
20_ خليكم فى حالكم وبلاش الفضول الل بيضايق غيركم  ..
حبوا بعض بجد. افرحوا واضحكوا وإلعبوا مع بعض زي العيال علشان اليوم اللي بيفوت مبيرجعش تاني #آه_والله [✋]