عاجل
الخميس 28 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

كوكب عماره تكتب: كن لطيف محدش نقصك

كوكب عماره تكتب: كن لطيف محدش نقصك
كوكب عماره تكتب: كن لطيف محدش نقصك

الموضوع بقي بايخ أوي خالص.... أنا واحده من الناس بقيت أخاف أقول لحد كلمة"عقبالك"علي أي حاجه في أي حاجه أحسن أبقي زي الطنطات الوحشين اللي بتضايق الحلوين الكيوت بمجاملاتها اللي هي عاديه جدا واللي ممكن ماتكونش في دماغهم تنغيص ولا تبكيت أصلا وتلت تربع كلامهم بيطلع بتلقائيه وحسن نيه مش أكتر... يعني أنا مثلا بقيت أخاف أقول لحد كلمة"معلش"وهو مضايق علشان مايقولش جواه دي فرحانه فيه ولا يجري يكتب علي الفيسبوك أنا مش محتاج"معلشه"من حد أنا بعرف أمعلش نفسي كويس..... مع إني ممكن مايكونش في إيدي غير الطبطبه عليه بكلمة معلش وفعلا ماعنديش حل لمشكلته وعلي فكره أنا عمري مازعلت من حد لما قالي"معلش"بقيت أخاف أسأل أو أطمن عن أحوال أي حد علشان ماتتاخدش عليه أنه فضول وحشرنه في اللي ماليش فيه..... بقيت أخاف أقول لأي واحده حامل مثلا أي كومنت ولا أسألها عن نوع البيبي كسؤال عادي ومنطقي وطبيعي لأن في ناس أختارت أنها تقعد تكتب بوستات طويله عريضه علي الفيسبوك تحدد للناس أشكال العلاقات وجمل محدده تتقال ومين يقول أيه وأمته ومين قليل الذوق لو قال أيه ومين حشري لو عمل أيه.... بقيت أخاف أسأل أي حد ماكلمتوش من فتره عن أي حاجه هتفيدني علشان مايتقالش بتاعة مصلحتها زي مابيتكتب علي الفيسبوك مع أني بنبسط جدا لما حد ماعرفهوش أصلا لابينا كلام أو حد تاني مابنتكلمش من فتره طويله يدخل يسألني علي حاجه تفيده أو حتي يدخل يفضفض بكلمتين... عمري مازعلت ولا قولت عليهم دي ناس مصلحنجيه ولا هاه بعد السلامات والتحيات أدخل عليه بقي بجملة بقولك أيه و أطلب المصلحه..... بقيت أخاف أقول لحد علي أي حاجه أنها حلوه ولو من باب المجامله أو جبر الخاطر لأن ممكن أوي بعدها بست سنين عربيته تتخبط فيقول عني أن أنا حسدته...  



ياجماعه بلاش مبالغه في كل حاجه بلاش تخدوا كل حاجه علي صدركم...... 

أرتقوا بقي وصفوا النيه لأن خلاص روحي بقت في مناخيري إتعملوا مع بعض من غير كتالوج ولا مصمصة شفايف صدقوني هتنبسطوا وهترتاحوا أوي #آه_والله [✋]
 

تابع بوابة روزا اليوسف علي
جوجل نيوز