د. محمود مجدي يكتب عن : وتر العرقوب (اكيلس)

أية هو وتر  أكيلس وأية الإصابات اللي بتحصل ليه وأيه أسبابة وأية أعراضه  ؟
 
وتر أكيلس دة هو اللي ماسك من نص عضلة السمانة أسمها العضلة التوأمية (gastrocnemius)  لغاية عظمة الكعب , وهو وتر كبير وقوي ويعتبر أقوي وتر في جسم الإنسان أسمه ((Achilles tendon , وفي نهاية الوتر دة عند الكعب في كيس زلالي عشان يساعد علي الحركة بانسيابية , وعشان يقلل الاحتكاك بين الوتر والعظم
 
الوتر القوي دة بيحصل له إصابات الإصابات دي تتلخص في الأتي:-
(التهاب الوتر - التهاب الكيس الزلالي - المزق الجزئي أو الكلي )
 
** نتكلم عن كل إصابة بأسبابها :
 
1- التهاب الوتر : وده بيبقي نتيجة زيادة الحمل التدريبي , أو  نتيجة خبطة مباشرة في الوتر , وممكن يكون نتيجة  وجود تشوهات في القدم زى الفلات فوت  , ولو عضلة السمانة قصيرة بردو ده بيخلي الضغط كبير علي الوتر فيؤدي لحدوث التهاب , ولو في رجل أطول من رجل بردو يؤدي  للضغط علي الوتر, و من ضمن  الأسباب لالتهاب الوتر ضعف عضلة السمانة  وزيادة الوزن في العموم .
2- التهاب في الكيس الزلالي اللي موجود في نهاية الوتر أسبابة مشابهه لأسباب التهاب الوتر السابقة بالإضافة الي ارتداء الأحذية السيئة أو الكعب العالي عند السيدات او ممارسة النشاط الرياضية علي ملاعب صناعية  والالتهاب دة بيسبب كبر حجم الكيس الزلالي .
3- المزق الجزئي أو الكلي :  ده بيحصل نتيجة حدوث مزق جزئي في الأول ومتعلجش بصورة سليمة أو مخدش فترة الراحة الكافية وتم الضغط علي الوتر عن طريق الرجوع ثاني للممارسة الأنشطة اليومية أو ممارسة الرياضة فيحدث القطع الكلي  .
 
 
** الأعراض بقي
 
1- الالتهاب في الوتر : ألم في الوتر نفسه أو الم ماسك الوتر كله بيبقي ملاحظ أثناء المشي أو عند مسك الجزء المصاب .
2- التهاب الكيس الزلالي في نهاية الوتر : الأعراض غالبا ألم عند الكعب أو عندي ملامسة الكعب للأرض أثناء المشي وناس كثير بتتلغبط بينها وبين أعراض التهاب اللفافة الاخمصية (plantar fasciitis).
3- المزق الجزئي أو الكلي :  المزق الجزئي بيبقي أعراضه وجود ألم و احمرار وجود ورم خفيف والحركة تكون  محدودة يعني مش طبيعية أو كاملة .
المزق الكلي عدم القدرة علي الحركة سقوط القدم للأمام وجود ورم كبير وارتشاحات .
 
 
** بعض النصائح للعلاج
1- الاهتمام بتقوية العضلات المحيطة بالساق سواء السمانة أو عضلات الساق .
2- تقليل  الوزن الزائد .
3- استخدام أحذية مناسبة لممارسة الرياضة  .
4- أخد فترة الراحة المناسبة لكل إصابة .
5 - عدم الإفراط في الحمل البدني .
6-  تجنب ملاعب النجيلة الصناعية .
7 -الاهتمام بمرحلة التأهيل عند حدوث الإصابة وعدم إهمالها .

*أخصائي اصابات الملاعب