عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

علشان محدش يضحك عليك.. اعرف حقك

علشان محدش يضحك عليك.. اعرف حقك
علشان محدش يضحك عليك.. اعرف حقك

كتبت - هبة عوض

ارتفاعات متوقعة لأسعار السلع والخدمات، خلال الفترة القادمة بعد قرار خفض الدعم عن المحروقات والطاقة، تحت مبرر ارتفاع تكاليف الإنتاج، وهي كلمة حق يراد بها باطل، لأن الارتفاع ده لازم يتقسم على إجمالي عدد الوحدات المنتجة والمنقولة، لكن بعض التجار بيحاولوا يستغلوا أي قرار حكومي ويلووا دراعه لتحقيق أرباح ومكاسب خيالية، ويكون المواطن الغلبان هو الضحية.



"بوابة روزاليوسف" عبر السطور القادمة هتعرفك الحقيقة وحقوقك كاملة وإزاى تاخدها كمان.

أولا لازم نفهم إن السلع الاستراتيجية، زي الإسمنت والخبز المدعم والسلع الغذائية والكهربائية، تم استثناؤها بالكامل من القرار، فمايجيش حد يقولنا رفعنا الأسعار أصل البنزين زاد.

ثانياً أحمد الزينى رئيس شعبة مواد البناء، في تصريحات صحفية، قال بنفسه: إن أسعار الحديد لن تتأثر بتلك الزيادات غير المؤثرة في تكاليف الإنتاج.

ثالثاً أحمد الوكيل، رئيس الاتحاد العام للغرف التجارية، أكد أن الزيادات المقررة على أسعار الوقود، لن تؤثر بشكل كبير "كما يشيع البعض"، وده معناه إن التأثير هيكون محدودا وقابلا للاستيعاب، في حالة تحمل كل واحد مسؤوليته تجاه بلده وأبناء وطنه.

بحسبة بسيطة لو بننقل طن من أي سلعة غذائية، من القاهرة لإسكندرية مثلا بقيمة نقل 100 جنيه، وزادت تكلفة النقل إلى 120 جنيها بنسبة الزيادة المقررة 20%، ووزعنا قيمة 20 جنيها الزيادة على الطن اللى هو 1000 كيلو، يا ترى نصيب الكيلو من الزيادة هيكون كام؟ تخيل هيكون 20 قرشا، يبقى مش منطقي التاجر يبيعه بأزيد من سعره بحوالى 2 و3 جنيهات.

كمان في وسائل المواصلات، بمثال بسيط حدث بالفعل، بمحافظة سوهاج، الميكروباص بين سوهاج للقاهرة، حمولة 14 راكبا، كان بياخد من الفرد 100 جنيه أصبح بياخد فجأة 120، يعني النقلة الواحدة أخد فيها 280 جنيها زيادة، طب نحسب بقى السولار زاد عليه بكام، الميكروباص ده بيفول بالصفيحة وبيستخدم 2 صفيحة في النقلة، والصفيحة الواحدة زادت 35 جنيها، يعني الصفيحتين زادوا بإجمالي 70 جنيه، يبقى الفرد المفروض يزيد عليه 5 جنيهات، ومش منطقي أبدا يزيد 4 أضعاف الزيادة المنطقية.

طب دلوقتي انت فهمت الزيادة بتتحسب إزاي، المفروض تعمل إيه لو واجهت مواقف استغلال للموقف؟

خليك إيجابي وافهم كويس إن الأجهزة الرقابية للدولة، بتتلقى كل شكاوى المواطنين، ولديهم تعليمات واضحة بالتعامل بمنتهى الجدية والحزم معاها، واتخاذ كافة الإجراءات القانونية حيال مستغلى الأوضاع وعدم فهم المواطنين لحقهم.

طيب هتقدم الشكوى لمين وازاي؟

لجهاز حماية المستهلك، من خلال الخط الساخن "19588"، إضافة لرقم الواتس آب "01281661880".

الرقابة الإدارية خصصت رقم "15333" لتلقي شكاوى مخالفات الوقود وتعريفة الركوب

وفيه إدارة مباحث التموين بمديريات الأمن بتحقق في أي بلاغ يروح لها وتتخذ الإجراءات القانونية اللازمة فور التأكد من المخالفة.وأخيرا لازم نفهم كلنا، إن لو كل رفع الأسعار في مجاله، هنعانى كلنا وممكن تحصل حالة ركود توقف البيع والشراء، ونتضرر كلنا، ولكن لو حاولنا استيعاب الزيادات المنطقية هتفضل المركب ماشية بينا كلنا.

تابع بوابة روزا اليوسف علي
جوجل نيوز