هناء مطر تكتب: يالي بتسأل مصر إية؟

يالي بتسأل مصر إية؟
مش هاقول محفوظ والنيل وزويل 
ولا مجدي يعقوب والقلوب
ولا حتى السادات ونصر أكتوبر المجيد
ولا هاقول برج القاهرة والأهرامات 

بس هاقول..
مصر صوت الأذان في الفجرية
والندى ع الزرع في الصبحية
عُمال تقابلك بضحكة وعيونها نايمة

تلاميذ بشنطها وللمدرسة رايحة

صوت فؤاد المهندس وأبلة فضيلة
ولا شويكار وضحكتها في الإذاعة الصبحية
 ‏
صوت ميكروفون بينادي على جنازة بعد الضهرية‎ 
كوباية شاي في العصرية
صوت عيال بتلعب كرة المغربية
وإزاز ينكسر وتطلع تقول لهم أمشي يا واد أنت وهو
صوت زغاريد في الشارع الناحية التانية
ده فرح بنت الجيران والعيلة قايمة

سبوع مولود لسه جاي للدنيا
ولا رمضان واللمة
والعيد والصلاة والعيدية
والكحك والضحية
ومولد العدرا
والحُسين والغورية
ولا الكنيسة وماريا القبطية
مسجد عمرو بن العاص وشارع المعز والسبتية

وسط البلد والعتبة
وإسكندرية ماريا

الأقصر وقنا وأسوان وسوهاج والناس السمرة الحلوة ديا

مصر ناسها الطيبين
وموسيقى أم كلثوم على القهوة وف العربية

عمر خيرت وعلي الحجار
حتى أغاني المهرجانات في الأفراح 
ورقص البنات 

كل حاجة فيها حلوة
‏ يكفي بس فيها قبر أمي
فيها شوارع وروايح  للفول والطعمية

فيها ذكرياتنا وإحنا عيال بنلعب
ولما كبرنا واتمردنا
وأول دقة قلب حبيتنا
وأول حب ف حياتنا
فيها أنا وأنت وغيرنا
فيها صحيح طابور للعيش
فيها خناق فيها زحمة
بس ف كل ركن فيها حتة من روحنا
فيها دم الشهدا
فيها أصولنا
فيها ‏‎ ‎إحنا

مصر مش بس تراب 
مصر مش بس ذكرياتنا
ولا آثارها وأهراماتها
مصر فيها روحنا فيها إحنا