أدهم سليمان موهبة شابة تنطلق في عالم الغناء من "ساقية الصاوي"
حوار - نورهان خفاجى
تصوير - ريم نبيل
فنان شاب له جمهور عريض، مؤمن بالفن الذي يقدمه.. والدليل على ذلك وجود عدد كبير من الشباب في حفله بساقية الصاوي، أمس الأول، هو الفنان أدهم سليمان مواليد 21 سبتمبر 1986 بمحافظة الدقهلية، والحاصل على بكالوريوس الحاسبات والمعلومات من جامعة الدلتا للعلوم والتكنولوجيا بالمنصورة.
أدهم أكد لـ"بوابة روزاليوسف"، أن من لديه حلمًا عليه أن يسعى لتحقيقه، فبالرغم من أن دراسته مختلفة عن مجال الغناء سعى إلى تحقيق حلمه بالغناء الذي يعشقه منذ الصغر، حيث بدأ الغناء في حفلات بمدرسته الإعدادية في المنصورة، وسجل أولى أغنياته بالمنزل إلى أن وصل فنه للجميع وعرفه الشباب، وحفظوا كلماته ورددوها.. وإلى تفاصيل الحوار.
.jpg)
*تلاحظ أن هناك بهجة في أغنية "يا سمرة" رغم أنها أغنية حزينة؟
عادي جدا ده اتعمل في أكتر من تراك عربي بس إحنا عندنا مشكلة إننا مش بناخد بالنا من الكلام.. يعني ممكن ناخد بالنا إن الإيقاع سريع وراقص بس مش بناخد بالنا من الكلام، لسه الميجا ستار "الهضبة" عامل أغنية حلوة جدًا اسمها "أنت مغرور".
* أنت مغرور.. أنت معدوم الشعور أنت زي الزينة ديكور واللي عاشرك معذور... مغرور"!
والكلام فظيع وبيوصف حد صعب جدا الموضوع صعب أوي لما أقوله ككلام جد بس لو سمعت الأغنية هتلاقي الإيقاع بتاعها سريع مش مخلي الموضوع هادي وحزين ودرامي.. ده موجود بيتعمل من زمان أنا ماخترعتهوش."
*بالنسبة للوكيشن التصوير..هل كان اختيارك؟
بالطبع كان من "اختياري وفكرة الفيديو كله كانت فكرتي أنا وفريق العمل، وكمان فكرة اللقطة الواحدة مش بتتعمل كتير بس أنا شايفها كتير أوي بتتعمل برا وبشكل قوي جدا، وهي فكرة متعبة أكتر من الطبيعي ألف مرة.. يعني مبتجيش من أول مرة كدة وخلاص ومشينا وهزرنا وخلاص لا إطلاقا.. إحنا أخدنا الشوط ده 6 أو 8 مرات رايح جاي، ورحنا 3 أو 4 مرات مشوار 6 ساعات رايح جاي".
* إلى أين وصلت في مشوارك الغنائي؟
"في مراحل أنا ماستفادتش منها جماهيريًا قد ما استفدت فنيًا وفي مراحل استفدت منها فنيًا ماستفادتش جماهيريًا وفي مراحل ماستفادتش فنيًا أو جماهيريًا، لكن اتعلمت، ودي أكبر استفادة ممكن الإنسان يستفيدها أصلًا في العموم يعني"، لو كل خطوة عن الخطوة اللي قبلها بنتيجة كويسة للافضل يبقي انا كدة بتقدم.
*هل هناك علاقة بين دراستك الأكاديمية للحاسبات وهوايتك في الغناء؟
"أنا أخدت الشهادة علشان أريحهم في البيت.. دخلت حاسبات ومعلومات علشان أراضيهم ويحسوا إن في هامش من الأمان."
*ما تقييمك لحرص الآباء على حصول شهادة جامعية؟
"أصحاب النظريات مكانش معاهم شهادات لكن الشهادات اتعملت باسمهم زي"نيوتن" "فيثاغورس" "أرسطو" "ابن خلدون"، لذلك الشهادات بتتسمى بناءً على الأشخاص مش العكس.. اللي عنده قدرة وموهبة لأي حاجة في الدنيا يعملها لأن الدراسة هي أول الطريق مش الطريق."
* صف لنا إحساسك عندما وصلت الأغنية من أول يوم لمليون مشاهدة؟
"ده توفيق ربنا أدهم مش صاحب فضل فيه.. أنا بحاول آخد بالأسباب واشتغل واجتهد وخلاص لكن بحس إني مبسوط وفرحان جدًا حتى بالآراء السلبية يعني الآراء السلبية ببقي عايز أوضح لو حد مش فاهم أو لو حد فاهم حاجة غلط لكن بصبر لغاية م الحاجة تشرح نفسها بنفسها وبعدين لو حد عنده تساؤل أنا ممكن أجاوبه".
*أدهم موهبة شاملة.. كيف استطعت أن تخلق ذلك بداخلك وتنميه؟
بالمحبة محبة العمل ومحبة الشيء نفسه.. إني اقرأ شعر لوحده وأسمع أغاني لوحدها واقعد مع ناس بتلعب مزيكا كويسة جدا وقوية جدا وناس بروفيشنال جدًا.. ومكنتش لوحدي، يعني أنا عملت كام حاجة لوحدي لكن في الأول والآخر في فريق عمل قوي جدًا واحنا أصحاب في المقام الأول وبعدين بنتعامل ونشتغل مع بعض ومعايا أحد أعز أصدقائي "محمد سامي" الموزع الموسيقى لأغنية "اسمي" "المراية" "المقام"، ولدينا تاريخ طويل معًا، وبالنسبة للكتاب والشعراء أنا غنيت بالفصحي والعامية.. أدهم مش لوحده أدهم جرب يعمل كام حاجة لوحده علشان أنا أحب دايمًا أجرب مش أكتر."
*هل فكرت أن تدخل مجال التمثيل؟
مفيش حد يعرف يعمل كل حاجة بنفس النسبة دايمًا لكن لو لقيت فرصة تمثيل كويسة طبعًا مش هتأخر.
*معنى ذلك أنك تملك موهبة التمثيل؟
معرفش المخرج هو اللي يقول لكن أنا مقدرش استنتج ده، لكن لو في فرصة كويسة قدامي ومخرج شاف، إن أنا ممكن يطلع مني حاجة كويسة يبقي ليه لا.
*من مثلك الأعلى من المطربين؟
"أنا بعشق عمرو دياب ومحمد منير مع حفظ الألقاب للقيم والمقامات الكبيرة اللي بتكلم عنها وبعشق أصالة.. الناس دي أنا اتعلمت منهم هما ميعرفوش أدهم بس أنا اتعلمت منهم كتير".
فمن الجيل القديم بالنسبة ليا في المقام الأول عبد الوهاب هو حالة خاصة جدًا، بالنسبة لي على مستوى الموسيقى وعلى مستوى الصوت والغنا والتطور السابق عصره في عصره.. هو حد كان بيدور على فكرة الأوركسترا السيمفوني في أوروبا واحنا في الأربعينيات يعني ده تفكير بدري أوي على المرحلة دي ف ربنا يقدرنا ونعرف نبقي بالتطور ده في وقته إحنا كمان.
*ما الأمنية التي يسعى أدهم سليمان لتحقيقها؟
"نفسي أسيب حاجة تأثر في الناس تأثير إيجابي يعني نحاول كلنا نبقي أحسن على المستوى الإنساني والسلوكي والأخلاقي، أنا نفسي أقدر أوصل الفكر ده يعني نفسي أقدر أعمل فن كويس، وطبعًا زي كل اللي في سني نفسي أنجح واتشهر وفلوس والكلام ده بس لسه بدري جدًا.. أتمني إني أسيب رسالة كويسة للناس من بعدي.
* كيف اقتحمت مجال الغناء وصقلت موهبتك؟
"اتعلمت بالسماع والممارسة وبالاحتكاك.. مأخدتش كورس في مكان معين لكن نزلت الشارع والبروفة والحفلة والمدرسة والجامعة وكل حتة في الدنيا.. التعليم بيكون من خلال جامعة أو أكاديمية أو بتعلم نفسك بنفسك واحنا عندنا مشاكل في فكرة تعليم الموسيقي والكورسات يعني حاجات بسيطة، ومش فعالة أغلب الوقت ف أنا بنصح أي حد حابب يمارس المهنة ينزل يحتك بالمجال في المقام الأول لأن دي أكتر حاجة هتعلمك".
لاحظت "بوابة روز اليوسف"، وجود عدد من الشباب الفنانين، سواء شعراء أو مطربين، بجانب أدهم سليمان في حفله يدعمهم ويدعمونه، مؤمنين بروح العمل الجماعي تاركين رسائل جيدة لجمهورهم من الشباب الذي يقتدي بهم ألا أحد ينجح بمفرده.
وخلال الحفل ظهر الشاب أحمد مختار، عازف الكمان، والشاعر عمرو حسن والشاعر محمد إبراهيم والمطرب هيثم محفوظ والمطرب أحمد كامل والمطرب أمير يوسف وفريق "أسلفت"، وكان في وقت الحفل متسع لكل منهم ليعرض فنه.. حتى إن تفاعل جماهير الشباب معهم جميعًا كان رائعًا في حفظهم للأغاني والأشعار.
جوجل نيوز
