عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

عندما حاورت أم كلثوم إحسان عبدالقدوس

كتبت - سمر سيد

- كوكب الشرق مذيعة والرومانسي ضيفها.. اقرأ ماذا قالا!!



- أم كلثوم: هاسألك أسئلة جامدة شوية.. والرومانسي يرد: الجامد منك حلو.

في حوار نادر تحوّلت فيه كوكب الشرق أم كلثوم إلى مذيعة، وأديب الرومانسية إحسان عبد القدوس ضيفها، اتسم بالبساطة والرقي، وظهر في حديثهما كل ما تميزا به في فنهما، حيث بدت كوكب الشرق جادة كعادتها، وبدا إحسان رومانسيا وهادئا ويتغزل فيها رغم جديتها، ودار الحديث حول الفروق بين الجيل الجديد والقديم، وبماذا يتسم الجيل الجديد عن الأجيال القديمة.

وفيما يلي تقدم لكم "بوابة روزاليوسف الإخبارية"، تفاصيل الحوار:

أم كلثوم: هاسألك أسئلة جامدة شوية!!

إحسان: الجامد منك حلو.

أم كلثوم: دايما بتتكلم عن الجيل الجديد ومتحمس لكل حاجة جديدة إيه السبب؟ إيه رأيك في الجيل الجديد والفرق بينه وبين الجيل القديم؟

إحسان: في الحقيقة، أنا مبفرقش بين الجيل القديم والجديد تفريق ثابت، مفيش حاجة في نظري اسمها جيل قديم وجيل جديد، العمر مش هو اللي بيخلق الناس.

في الجيل القديم بتاعنا، ناس كويسين أوي وناجحين أوي، وفي ناس كمان منجحوش، وفي الجيل الجديد كمان كده، إنما إحنا بنحكم على الجيل الجديد بظروفنا مش بظروفه، وهو ده اللي بيعمل القلق والأحكام اللي ممكن متكنش أحكام صحيحة، يعني مثلا بشوف شاب في الجيل الجديد بيعمل حاجة، فبتصور وأنا في سني كنت بعمل إيه وأقيس اللي كنت بعمله على اللي هو بيعمله، ده مش صح، لان الظروف اللي أنا مريت بيها وعشت فيها بتختلف عن الظروف اللي هو عاش وبيتحرك فيها.

أم كلثوم: أنا بشوف الجيل الجديد واعي أكتر من الجيل القديم.

إحسان: في الجيل الجديد شبان واعيين جدا وبيبنوا نفسهم على دراسات مهمة وثمينة وعميقة، إنما في الجيل الجديد ناس بتلعب ومعندهاش عمق، زي الجيل بتاعنا، كان في ناس دارسين أوي وبيفكروا بعمق، ويوصلوا وينجحوا، وكان في ناس متسواش، الأحكام واحدة، وأنا كتبت في ناس عندهم 65 سنة وطريقة تفكيرها أكتر تقدما من شبان عندهم 20 سنة.

أم كلثوم: الجيل الجديد الحياة بتتقدم ومتاحة له للفهم والدرس، بشوف إنهم أوعى وأكثر تفهم لكل حاجة، وبعدين أنا بشوف إن الجيل الجديد أكثر صراحة، بمعنى إن الجيل القديم الولد كان بيشرب سجاير ويعمل كل حاجة لكن مش قدام أهله لكن دلوقتي بيعمل كل حاجة قدام أبوه ووالدته، ده في نظري أنا مش كذب.

إحسان: ده كله نتيجة تطور، الجيل اللي جاي بعد الجديد ده هيبص يلاقي إنهم أكثر تطورا وأكثر تقدما من اللي قبليهم.

أم كلثوم: من الناحية دي أنا بفضل الجيل الجديد، مش بتكلم عن نجاحه أو فشله، أنا بتكلم من ناحية أنه واعي وصريح ومتفتح حاجة تانية غير الجيل القديم.

إحسان: وأنا صغير كنت متربي في بيت جدي، وكان رجل من الأزهر ومتدين، كان لو بنت صغيرة تبص من الشباك كان بيديني أنا عصايا أضربها عشان بصت من الشباك.

أم كلثوم: طب وجدك ليه مضربهاش

إحسان: عشان يربوني على التقاليد بتاعتهم، لكن أنا مقتنعتش بالكلام ده والجيل كله مقتنعش، والنهارده البنات بتقدر تعيش بحرية.

 

تابع بوابة روزا اليوسف علي
جوجل نيوز