"ع القهوة " معرض للفنان محمد حمدي

كتبت - سوزى شكرى

ع القهوة تهرب من زحمة ضغوط الحياة وتفضفض، ع القهوة حياة، ع القهوة تقابل شخصيات من كل طبقات العامة والخاصة، مثقفون شعراء أدباء مطربون فنانون شباب ع القهوة لقاء الصحبة خارج حدود البيوت .

 "ياللا بينا نروح ع القهوة في كلمتين لازم أقولك عليهم...ماشي أروح معاك بس أنا اللي عازمك على فنجان قهوة بن مخصوص وصاية ..لأ ما يصحش تعزمني أنا الكبير يا جدع عيب عليك ..

تسمع صوت "أم كلثوم " بتغني الأولة في الغرام، ويسمعها الولد العاشق هات قهوة مظبوط يا عم حسين ده الست بتغني، ع القهوة الكرة المصرية صوتها عالي على الجميع ... اسكت يا محمود الأهلي ها يلعب عايزين نتفرج، يا برنس النهاردة الزمالك اللي ها يلعب مش الأهلي، مش مهم الأهلي ولا الزمالك المهم، مصر تكسب ونفرح شوية بقى، أنا سامعكم وساكت أنا عايزة أشوف المسلسل مش عايزة الماتش، لاه بقولك أيه أنت صاحبي وحبيبي النهاردة يوم الماتش لو أنت عايز المسلسل روح اتفرج فى البيت.

على قهوة صداقة وأخوة وعشرة ..أقولك يا باشهمندس متعرفش دكتور عيون شاطر أروحله، أيوه طبعا اعرف وكمان هاروح معاك الف سلامة عليك يا راجل طيب. على قهوة نصايح الكبار للشباب ..أنت عارف بقى أنا لما كنت في سنك كنت بلف مصر وتعبت في حياتي والحمد لله ربنا كرمني انتو بقى جيل خفيف يا بنى لازم تتعب وتكافح أنت لسه صغير على قاعدة القهوة، يا خال هو أنا لا يقيت فرصة وما روحتش، يا بنى الفرصة أنت بتخلقها مش تقعد على القهوة تستناها ..!

ياحسين الشبكة ضعيفة شوف كدة وصلة الأنترنت عايز أحمل شوية حاجات يا جدع، أقولك لو تشرب شيشة اقعد بعيد شوية أصل عندي حساسية من الدخان.

ع القهوة فن القافية ومباراة كلامية خفة الدم وسرعة البديهة والقفشة وتطلع الضحكة الصافية، وتوصل للكل ويليها قهقهات رودا القهوة، ع القهوة نلعب ونتسلى، للورق حظوظ ها نلعب كوتشينة واللي ها يتغلب يدفع ويعزم، على القهوة تقابل المعقد والفليسوف، تلعب شطرنج يا محمود، لا ما ليش يا عم في الشطرنج دي لعبة الكبار فيها أسود وأبيض وفيها مكر وانا راجل ماليش في المكر..! طيب تلعب طاولة، لاه الزهر بيفكرني بالدنيا لحظة كسبان وسنين خسران ..! طيب تلعب 31، لاه ياعم ولا 31 ولا 41 أساسا بقى الكونشينة حرام ...!!

 عالم المقاهي روايات وتاريخ وقهاوي مشهورة بأسماء روادها مثل قهوة نجيب محفوظ قهوة أم كلثوم، وقهاوي مشهورة بأسماء المكان قهوة الخديو – خان الخليلي الحرافيش الفيشاوي رمسيس باب اللوق وغيرها .

كل ذلك تشاهده في 30 لوحة، تجمع بين الرسم والتصوير بتقنيات ومعالجات فنية مختلفة يحكى الواقع المصري المعاصر، يرصد الفنان حياة المقاهي الشعبية برموزها وشخوصها وبأسلوبه الفني الساخر المميز بالتعبيرية والمبالغات في الشخوص، وذلك في معرض الفنان محمد حمد تحت عنوان "ع القهوة" وذلك يوم الأحد القادم 17 فبراير بقاعة الشهيد "أحمد البسيوني" بكلية التربية الفنية بالزمالك، والذى يفتتحه أ.د محمود حامد عميد كلية التربية الفنية، د. مها مزيد وكيل الكلية لشئون المجتمع وخذمة البيئة، ويستمر المعرض إلى 21 فبراير الجاري .