السعدني عن وفاة طليقته: كانت بتكلمني قبلها بساعة

كتب - محمد اسماعيل

خرج الفنان أحمد السعدني عن صمته لأول مرة بعد وفاة طليقته أمل سليمان إثر تعرضها لأزمة قلبية مفاجئة.

وروى السعدني تفاصيل الساعة الأخيرة في حياة أمل سليمان، وكذلك تفاصيل حياتهما وكيف بدأت قصة حبهما، وأخذ يسرد قائلا: "عمري في حياتي ما اتكلمت عن حياتي الشخصية لكن حسيت اني لازم اعمل كده دلوقتي فذكر إن الذكرى تنفع (المؤمنين) او الكافرين او المستهبلين او تنفع اي حد ححس اني عملت حاجة".

وأضاف في منشور عبر حسابه بموقع إنستجرام: "يوم ٩/٩/٢٠٠٣ حب من اول نظرة في الشارع ما بين معهد السينما حيث كانت تدرس ومعهد فنون مسرحية حيث كنت ألهو وأدرس برضه ميضرش كنت راكب عربية وكانت ماشية على رجلها كنت حخبطها لكن حصل خير لا محصلش قوي خبطتني هي في قلبي حب تقطيع شرايين سنة خطوبة سنة كتب كتاب شهر جواز خلفة اول ولد هنا بدأت المشكله اللي بكتب الكلام ده عشانها".

وتابع السعدني: "انا زي كتير للاسف شباب anti تحمل مسؤولية بص لنسب الطلاق وانت تفهم انا بيجيلي ارتيكاريا لما احس اني مسؤول وهي برضه حبيبتي زي بنات كتير بتقول طلقني اكتر مبتنطق اسمي كانت النتيجة في اول سنة بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالى يا عم طبق الشروط ادي اول طلقة.. قشطة يا باشا عشت حياتك؟ اه.. ارتحت؟ لا".

وأردف: "وحشتني وحشني حنيتها وحبها وهبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكاريا بس المرادي صموووووود مش حينفع نتطلق تاني لا تصدق نفعت الجانب الاناني في شخصيتي غلبني يا عم كبر مخك وعيش حياتك المشكله اني عمري ما ارتحت كنت عايز حضنها وحنيتها وهبلها بس كنت بأجل الرجوع يمكن اكبر او اعقل او اقدر اتحمل المسؤولية بجد حددت لنفسي سن معين ارجعلها فيه قال يعني حبقي نضجت بس ملحقتش".

وكشف السعدني أنه هاتف أمل قبل ساعة من وفاتها، فقال: "ماتت في لحظة كانت بتكلمني قبلها بساعة ومكانتش عيانة كان عندها ضغط زي اغلب الشعب المصري الحمد لله.. ماتت ومشيت وقررت تسبني للابد كنت فاكرها حتستناني ومتأكد من ده مستحيل تحب حد غيري مجاش في بالي انها ممكن تموت دلوقتي صغيرة واكتر واحدة في حياتي شفتها بتحب الحياة وعندها طاقة ايجابية.. ماتت وسابتلي الولدين والندم".

واستطرد: "أنا متأكد انك في الجنة رحتي للي خلقك يوم عرفة واميرة وست البنات والستات ونضيفة وكريمة وصنتي ولادي وبيتي. بحبك يا امل حياتي اللي اتهد وبوعدك المرادي حشيل المسؤولية للاسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من احن ام ربنا يقدرني واربيهم احسن ما كنتي عايزة بحبك ومش بطلب منك غير انك تسامحيني.. ربنا يرحمك ويرحمني ويرحم ولادنا يا حبيبة عمري الوحيدة".