هنا الزاهد تعلق على وفاة طليق والدتها طلعت زكريا

كتب - محمد اسماعيل

نعت الممثلة الشابة هنا الزاهد وفاة الفنان طليق والدتها شيرين المنزلاوي، الفنان الراحل طلعت زكريا، الذي رحل عن عالمنا عصر أمس الثلاثاء.

وشاركت الزاهد متابعيها بآخر صورة جمعتها بالفنان الراحل خلال حفل عقد قرانها على الممثل أحمد فهمي في سبتمبر الماضي، عبر حسابها على موقع "إنستجرام"، وأرفقتها بنعي مؤثر إذ قالت: "دي آخر صورة اتصورتها في كتب كتابي مع أبويا وحبيبي وسندي اللي كبرت معاه سنين.. أنا فتحت الصورة دي من بدري وعايزة اقولك أنك ربنا هيدخلك الجنة يا أطيب خلق الله أنت ربيت 3 بنات وكأنك أبوهم أكتر".

وتابعت بقولها: "أنا عايزة أقولك إني معرفتش كلمة بابا غير وأنا معاك، عمري ما قلت أصلًا تقريبًا بابا غير ليك، كنت بجري عليك أول معمل حاجة غلط عشان تدافع عني قدام ماما.. فاكرة أول بيض أومليت وقلتلي اعملي مطعم (بالهنا والشفا) وأديتني 100 جنيه عشان تشجعني أطبخ، كنت دايمًا تقولي إنتي هتبقي حاجة كبيرة وكنت بتشجعني كنت فخور بيا لما اتخرجت وعيطت اليوم ده".

واختتمت رسالتها المؤثرة قائلة: "أنا عمري ما حسيت إنك مش أبويا اللي مخلفني، أنا مش مصدقة إني مش هشوفك تاني وأقولك زازي يا زازي، نفسي ترجع وأقولك قد إيه إحنا بنحبك كلنا وأقولك أنك أعظم ممثل، أنا بحبك أوي ومكنتش أعرف إني بحبك أوي كده، هتوحشني يا أحن إنسان عرفته في حياتي، أرجو الدعاء".