روجينا: أشرف زكي يفضل النقابة عليَ

كتب - محمد اسماعيل

انضمت الفنانة روجينا إلى إشادات الفنانين الداعمين لمواقف زوجها نقيب المهن التمثيلية أشرف زكي، الذي تصدر المشهد في جنازة وعزاء الفنان هيثم أحمد زكي الذي رحل عن عالمنا، الخميس الماضي، بعمر ناهز الـ35، إثر هبوط حاد في الدورة الدموية.

وسردت "روجينا" العديد من المواقف المشابهة لزوجها خلال فترة رئاسته للنقابة، فقالت: "ما أنا كنت صغيرة ومش فاهمة وبحبه وأنانية وعايزاه جنبي باستمرار، وكانت كل مشاكلنا أول الجواز أنت بتفضل النقابة عليا، يعني ممكن يلغي ميعاد مهم ليا عشان رايح مستشفى أو بيحل مشكلة في تصوير أو فيه واجب عزا".

وتابعت روجينا: "لغاية ما ربنا حب يعلمني أو يأدبني أو يربيني ما هو تربيته أعظم تربية فيحصلي حادثة موت وأقعد في المستشفى أربعين يوم ماهونش عليا غير أهلي والناس وزمايلي ووقفهم جنبي، مكانش فيه حاجة اسمها وقت زيارة، الناس على طول موجودة".

وأضافت: "الله على جبر الخاطر والناس بتطبط عليك وأنت في أشد الاحتياج لده، الناس دي ماكنش بتجيلي أنا كانت بتيجي لأشرف لأنها كانت بترد اللي بيعمله معاهم، لأن هو كل سعادته في الدنيا وهو بيساعد حد وهو واقف جنب حد، وهو بيواسي حد وهو بيحل مشكلة لحد وعمره ما فرق بين كبير وصغير".

وأردفت "روجينا": "من ساعة الدرس ده اتعلمت انوا فيه حد في الدنيا يبقى هو الأمان والسند هو ده اللي هكلمه أول ما يحصل لي حاجة ده نقيبي اشرف زكي واتعلمت كمان ان بيعملوا اشرف جوزي هيترد ليا انا وبناته وهيبقى في ميزان حسناتك، هعيش انا وبناتك فخورين بيك يا حبيبي، ربنا يحفظك لنا ويديك الصحة وطولة العمر".