مشهد بمسلسل "أرابيسك" يفضح جرائم الأتراك قبل "ممالك النار" (فيديو)

كتب - عادل عبدالمحسن

فيما يعد تاريخًا راسخًا حتى قبل توتر العلاقات بين مصر وتركيا بعد ثورة 30 يونيو  2013 كان مسلسل "أرابيسك" للسيناريست أسامة أنور عكاشة، قد فضح جرائم سلاطين آل عثمان في مصر، قبل مسلسل ممالك النار الذي يعرض حاليًا على قناة "أم. بي. سي"، ويظهر ذلك من مشهد بين حسن النعماني، الذي أجبر جده على تهجيره إلى الاستانة عاصمة الدولة العثمانية للقيام بمهمة صناعة كرسي للسلطان سليم الأول.

ويدور الحوار في مشهد بين حسن النعماني، الذي أدى دوره الفنان صلاح السعداني وبين الأستاذ وفائي ، وأدى دوره الفنان حسن حسني .

ويبدأ الحوار على لسان.. حسن: ده كرسي السلطان سليم الأول ؟!

وفـائي: آه.. أنت تعرف السلطان سليم يا حسن؟

حسن: سليم الأول !! مش ده اللي هزم قنصوة الغوري في مرج دابق وبعدين شنق طومان باي على باب زويله؟

وفـائي: هو بعينه.. كويس أنك عارف المعلومات دي يا حسن.

حسن: "لا ما أنا لسه مانسيتش دروس التاريخ بتاعة إعدادي وثانوي، وخصوصًا الحتة بتاعة الفتح العثماني لمصر.. دي بقه لازقة في دماغي بالغرا"

وفـائي: اشمعني المعلومات دي بالذات يا حسن ؟

حسن: "أقولك حاجة يا أستاذ.. وأنا صغير كنت دايما باسمع جدي وهو بيحكي لأصحابه وولاده عن جدي الكبير راس العيلة.."عبد الرحمن النعماني".. كان بيقول إنه مات في تركيا وقبره لسه موجود في إسطنبول لحد دلوقتي.. أنا لما كبرت سألت أبويا عن الحكاية دي فقاللي: أصل المماليك لما جم مصر استقروا فيها، واعتبروها بلدهم، وابتدوا يبنوا ويشجعوا الفنانين والصنايعية، وكانوا بيسابقوا بعض وبيتباهوا قصاد بعض باللي بيعملوه، وكل واحد فيهم كان عايز يعمل حاجة جميلة تخلد اسمه، عشان كده سابولنا كنوز في العمارة وفنون النقش والزخرفة ماليه مصر لحد النهاردة.. أبويا قاللي إن السلطان سليم لما دخل مصر جمع أحسن العمال والفنانين والصنايعية وسفرهم بالغصب على تركيا عشان يبنوله أحسن الجوامع والخانات والحمامات، عشان يخلوا اسطنبول أحلى من مصر المحروسة، أو على الأقل زيها، وكان جدي الكبير عبد الرحمن النعماني من الناس اللي راحوا هناك.. بس راح مرجعش".