زيزي عاصي
ضميرك مرتاح؟
بقلم : زيزي عاصي
الشعب المصرى بيموت فى الرغى والهرى .....القيل و القال و قعدات النميمه و خصوصا الستات انا شخصيا رغايه موووووت .....اسيب منابى فى الفرخه بس مسبش منابى فى الكلام .... بس المشكله فى موضوع الرغى ده انه بيوقع الواحد في الغلط ... يعني ميمنعش ان الواحد لازم يجيب فى سيره فلان او علان .... و بعد ظهور مواقع التواصل الاجتماعى بقى الهرى و سيره الناس علي نطاق واسع, الي تعرفه و الي متعرفوش و تعدى الانتشار المحلي, ففي بعض الاحيان يصل الي العالميه...
و عادتا بيبدا الموضوع بخبر صغير, ثم يكبر و ينتشر و يتوغل و يوبيد...
قد يكون خبر عن انسان مغمور و بقدره قادر يصل الى شهره مكنش يحلم بيها و لا ابطال السيما , او خبر عادى من الى بنقراه كل يوم , بس بشويه تحابيش يبقى خبر الموسم و نقعد نهري فيه بالايام و الاسابيع ... و ساعات كتير الواحد بعد ما يعمل كده ضميره يوجعه ...
بس الحق يتقال الشعب المصرى مشكور ابتدع بعض مسكنات للضمير ...
ديما يبدا الكلام بكلمه " بيقولوا " و دى بقى بنضرب بيها عصفورين بحجر ... اولا بنحكى القصه بتحابيشها زى ما احنا عايزين , و ثانيا ببنفى بيها عن انفسنا صفه مروجى الاشاعات, هما الي بقولوا ....
تكلمى صحبتك فى التليفون بعد ما تقرأى خبر قتل الفنانه فلانه
منال : شوفتى الفنانه فلانه , بيقولوا لقوها فى بيتها مقتوله
رندا: يا شيخه مش معقول ...و عرفوا مين الى قتلها ؟؟
منال : بيقولوا عشقها
رندا : بيقولوا عليها ملعب
منال : اه ده حتى الجيران بيقولوا ان كان فى رجاله كتير بيجولها البيت
رندا : تلقى حد منهم هو الى قتلها ما هى دى اخرت المشى البطال
و بعد ما تقطعوا فروه المرحومه و تقولوا عليها الى قاله مالك فى الخمر , مسبوقه بكلمه بيقولوا و تشيلوا شويه من ذنوبها وتدولها حبه حلوين من حسناتكم من باب المشركه يعنى
تقومو ختمنها بالجمله المعهودة و تنتهى المكالمه " ياله اذكروامحاسن موتاكم" و ندفن الجثه بالكلمتين دول و لا اكننا قلنا حاجه ما هما الي بيقولوا...
و فى قعده صفى مع الاصدقاء بعد السؤال عن الصحه , نبدا نجيب فى سيره فلانه الى اطلقت علشان جوزها خنها .......ولا فلانه الى اتجوزت فلان فى السر علشان مراته متعرفش ........و لا جارك الى شوفتيه قاعد مع واحده غير مراته قعده موريبه كده فى كافى شوب ...... و كل قصه من القصص ديه سر و لازم نحلف واحد واحد ان الكلام ده مش للنشر .....اصل دى سمعه ناس... و نختم القعده بالجمله المأثورة " ياله ملناش دعوه بحد دع الخلق للخالق "
او قعدات الشكوه الجماعيه و ندب الحظ و اللطم على الخدود و دى الاكثر انتشارا
نقعد نشتكى من الغلاء و ان مشوار السوبر ماركت ده بقى تعذيب , الواحد بقى بيدور على الحاجه الارخص مش الاجود, و ان المرتب مش بيكمل حتى نص الشهر و ان انتى بطلتى تجيبى الشغاله الى كنتى بتجيبيها مرتين فى الاسبوع علشان توفرى الفلوس لحاجه اهم.........
ويدخل الي بعده بلى فيه القسمه من الشكوه ....مش عارف يدبر مصاريف المدارس للعيال و انه كان لازم ميسمعش كلام مراته و يدخل الاولاد مدرسه غاليه كده ......و ان العربيه عايزه عامره لاكن مش وقتوا خالص .............
او قصيده التعاسه الزوجيه الست تشتكي ان جوزها مطلع عينها و مسود ايامها و خنقها , و لا بتروح ولا بتيجى و انه شايل ايده من مسؤليات البيت و الاولاد , و ان كل حاجه فوق دمغها , و كل و ظيفتها فى الحياة انها بقت شغاله بكيزه ........ و الراجل يشتكى ان مراته تخنت , و اهملت نفسها و اهملته , و ان كل الي بيسمعه منها عايزه فلوس و بس... حنسكت على كده لأ طبعا حنريح ضمرنا ازى بالكلاشيه المناسب " ياله الشكوه لغير الله مذله و الحمد لله احنا احسن من غيرنا"
كله كوم و الى بيحصل لما حد مبتحبوش يحصل له حاجه وحشه و تبتدى الشماته .... و فى الايام العجيبه الي بنعشها دلوقتى تصل الشماته الى حد الشماته فى المرض و الموت ....
فلان مات حادثه قطر طسه اوتوبيس ... "يستاهل ده ارهابي" ...
الضابط فلان مات فى انفجار ... "خليهم يدوقوا الى عملوه فى الناس من اعماليكم صلت عليكم "....
و بعد ما نخلص وصله الشماته اللا وعقوله ندخل بقى على حبايه مسكن الضمير
"يلا ربنا يرحم الجميع اللهم لا شماته"
اهم حاجه ان الواحد يبقى ضميره مرتاح
جوجل نيوز
